ಪಾಚು-ಪ್ರಪಂಚ

ಲಾಲ್ ಬಾಗ್ ನಲ್ಲಿ ಒಂದು ಮುಂಜಾನೆ

2010-12-15T03:20:00.000-08:00

ನಮ್ಮ ಬೆಂಗಳೂರಿನ ಹೆಮ್ಮೆಯ ಸಸ್ಯೋಧ್ಯಾನವನ ಲಾಲ್-ಬಾಗ್. ಹಸಿರಿನ ಹುಲ್ಲು ಹಾಸು, ವಿವಿಧ ಬಗೆಯ ಹಕ್ಕಿ ಸಂಕುಲ, ಅಳಿಲು ಮುಂತಾದ ಪುಟ್ಟ ಪ್ರಾಣಿಗಳು, ವಿಶಾಲವಾದ ಕೆರೆ ಎಲ್ಲವನ್ನೂ ಒಳಗೊಂಡ ಸುಂದರ ಪರಿಸರ (ಎಲ್ಲರಿಗೂ ಗೊತ್ತಿರುವ ವಿಚಾರ..!)
ಕಳೆದ ಶನಿವಾರ ಮುಂಜಾನೆ ನಾನು ಮತ್ತು ಕಿರಣ್ ಇಲ್ಲಿಗೆ ಹೋಗಿದ್ದೆವು. ಫೋಟೋ ಕಲಿಕೆಯು ಮುಖ್ಯ ಉದ್ದೇಶ. ಸುಮಾರು ೪ ಗಂಟೆಗಳ ಕಾಲ ಸುತ್ತಾಡಿ ಮನಸ್ಸಿಗೆ ಬಂದಿದ್ದು ಕ್ಲಿಕ್ಕಿಸಿ, ನಮ್ಮ ಫೋಟೋಗ್ರಫಿ ಕಲೆಯನ್ನು ಹೊರಹಾಕಲು ಪ್ರಯತ್ನಿಸಿದೆವು....! ಹತ್ತಿರದಲ್ಲೇ ಇದ್ದರೂ ಇಲ್ಲಿಗೆ ನಾವು ಭೇಟಿಕೊಡುವುದು ವಿರಳ.

ನಮ್ಮ ಪ್ರಯತ್ನದ, ಮನಸ್ಸಿಗೆ ಖುಷಿ ಅನ್ನಿಸಿದ ಒಂದಷ್ಟು ಫೋಟೋಗಳು ಇಲ್ಲಿವೆ.

ಹೊಗೆನಕಲ್ ಜಲಪಾತ

2010-10-20T02:23:00.000-07:00

ದಿನಾಂಕ : ಸೆಪ್ಟೆಂಬರ್ ೫, ೨೦೧೦
ಕಾರಿನಲ್ಲಿ : ನಾನು, ಅರವಿಂದ, ಸುಹಾಸ್, ದೀಪಕ್
ಕ್ರಮಿಸಿದ ದೂರ : ೨೭೦ ಕಿ.ಮೀ
ದಾರಿ : ಬೆಂಗಳೂರು -> ಎಲೆಕ್ಟ್ರೋನಿಕ್ ಸಿಟಿ -> ಹೊಸೂರು -> ಕೃಷ್ಣಗಿರಿ -> ಧರಂಪುರಿ -> ಹೊಗೆನಕಲ್

ಬೆಂಗಳೂರಿನವರಿಗೆ ತುಂಬಾ ಪರಿಚಯದ ಒಂದು ದಿನದ ಪ್ರವಾಸಕ್ಕೆ ಸೂಕ್ತವಾದ ಜಾಗ ಅಂದರೆ ಥಟ್ಟನೆ ನೆನಪಾಗುವುದು ಹೊಗೆನಕಲ್ ಫಾಲ್ಸ್. ಬೆಂಗಳೂರಿಂದ ಸುಮಾರು ೧೩೦ ಕಿ.ಮೀ ದೂರ ಇರುವ ಈ ಜಲಪಾತಕ್ಕೆ "ಭಾರತದ ನಯಾಗರ" ಅಂತಲೂ ಕರೆಯುತ್ತಾರೆ. ಈ ಜಲಪಾತದ ಬಗ್ಗೆ ಹೆಚ್ಚಿನ ವಿವರ ಬರೆಯುವ ಅಗತ್ಯ ಇಲ್ಲ, ಅಂತರ್ಜಾಲದಲ್ಲಿ ಬೇಕಾದಷ್ಟು ಮಾಹಿತಿ ಸಿಗುತ್ತದೆ.

ಕಾವೇರಿ ನದಿಯು ತಮಿಳುನಾಡಿನ ಧರ್ಮಪುರಿ ಜಿಲ್ಲೆಯ ಹೊಗೆನಕಲ್ ಎಂಬಲ್ಲಿ ಸುಂದರ ಜಲಪಾತ ಸೃಷ್ಟಿಸಿದೆ. ಸುಮಾರು ೧ ಕಿ.ಮೀ ಸುತ್ತಳತೆಯಲ್ಲಿ ಎಲ್ಲಿ ನೋಡಿದರೂ ಜಲಪಾತಗಳೇ ಕಾಣಸಿಗುತ್ತದೆ. ಸುಣ್ಣದ ಕಲ್ಲಿನ ಬಂಡೆಗಳ ಮಧ್ಯೆ ರಭಸವಾಗಿ ಧುಮ್ಮಿಕ್ಕುವ ಜಲಪಾತವು "ಹೊಗೆ" ಎದ್ದಂತೆ ಭಾಸವಾಗುವುದರಿಂದ ಹೊಗೆ-ನ-ಕಲ್ಲು ಎಂದು ಹೆಸರು ಬಂದಿರಬಹುದು. ಜಲಪಾತಕ್ಕೂ ಮೊದಲು ನದಿಯು ಕಾಡು, ಗುಡ್ಡಗಳನ್ನು ಬಳಸಿ ಬರುವುದರಿಂದ ಇಲ್ಲಿನ ನೀರು ಔಷಧಿಯುಕ್ತವಾಗಿರುತ್ತದೆ.
ಮಸ್ಸಾಜು ಸ್ನಾನ, ತೆಪ್ಪದಲ್ಲಿ ಜಲಪಾತದ ವೀಕ್ಷಣೆ ಇಲ್ಲಿನ ಪ್ರಮುಖ ಆಕರ್ಷಣೆ.

ಮಳೆಗಾಲದಲ್ಲಿ ಮೈದುಂಬಿಕೊಂಡಿರುವ ಜಲಪಾತದ ಸೌಂದರ್ಯದ ಬಗ್ಗೆ ಎರಡು ಮಾತಿಲ್ಲ. ಆದರೆ ಸುತ್ತಮುತ್ತಲ ಪರಿಸರ ಅಷ್ಟು ಸ್ವಚ್ಚವಾಗಿಲ್ಲ. ವಾರಾಂತ್ಯಗಳಲ್ಲಿ ಪ್ರವಾಸಿಗರಿಂದ ತುಂಬಿರುತ್ತದೆ. ಊರೊಳಗೆ ಒಂದೂ ಸಸ್ಯಾಹಾರಿ ಹೋಟೆಲ್ ಇಲ್ಲ. ಹಾಗಾಗಿ ಪ್ರವಾಸಿಗರು ಮನೆಯಿಂದ ಆಹಾರ ಕಟ್ಟಿಸಿಕೊಂಡು ಹೋಗುವುದು ಉತ್ತಮ.

ಬೆಳಗಿನ ಉಪಹಾರ ಕೃಷ್ಣಗಿರಿ ಹೆದ್ದಾರಿಯಲ್ಲಿನ ಕಾಮತ್ ಹೋಟೆಲಿನಲ್ಲಿ ಮುಗಿಸಿದೆವು. ಹೊಸೂರು ಹೆದ್ದಾರಿಯು ಡ್ರೈವಿಂಗ್ ಗೆ ಉತ್ತಮವಾಗಿದ್ದು, ಡ್ರೈವಿಂಗ್ ಮಜಾ ಅನುಭವಿಸುತ್ತ ಹೊಗೆನಕಲ್ ತಲುಪಿದಾಗ ೧೦ ಗಂಟೆ. ಜಲಪಾತ ವೀಕ್ಷಣೆಗೆ ತೆಪ್ಪ ಅಗತ್ಯ ಇರುವುದರಿಂದ ತೆಪ್ಪದ ಮಾಲೀಕರಿಗೆ ಕೇಳಿದಷ್ಟು ಹಣ ಕೊಡುವುದು ಅನಿವಾರ್ಯ. ಹೇಗಿದ್ದರೂ ಪ್ರವಾಸಿಗರು ಇಲ್ಲಿಗೆ ಬಂದಮೇಲೆ ಜಲಪಾತ ನೋಡದೆ ಹಿಂದಿರುಗುವದಿಲ್ಲ ಎಂಬ ವಿಶ್ವಾಸ ಅವರದ್ದು. ತುಂಬಾ ಹೊತ್ತಿನ ಚೌಕಾಸಿಯ ನಂತರ ೧೩೦೦ ರುಪಾಯಿ ಇಂದ ೧೦೦೦ ರುಪಾಯಿಗೆ ಇಳಿಸಿದೆವು. ಬರಿಯ ಜಲಪಾತ ವೀಕ್ಷಣೆಗೆ ಒಂದು ಚಾರ್ಜು, ಅಲ್ಲಿ ಸ್ನಾನ ಸ್ವಲ್ಪ ಬಿಡುವಿಗೆ ಬೇರೆ ಚಾರ್ಜು..:-) ತುಸು ದುಬಾರಿ ಎನಿಸಿದರೂ ಜಲಪಾತದ ಅದ್ಭುತ ಸೌಂದರ್ಯ ಅದನ್ನು ಮರೆಸಿತು.

ಮೊದಲು ಕರ್ನಾಟಕ ಗಡಿಯಲ್ಲಿರುವ ಜಲಪಾತ ವೀಕ್ಷಿಸಿದೆವು, ಕಲ್ಲನ್ನು ಸೀಳಿಕೊಂಡು ವಿಸ್ತಾರವಾಗಿ ಧುಮುಕುವ ಈ ಜಲಪಾತ ಕಣ್ಣಿಗೆ ಹಬ್ಬ. ಮಳೆಗಾಲದ ನಂತರ ಸೌಂದರ್ಯ ಇಮ್ಮುಡಿಯಾಗಿತ್ತು. ನೀರಿನ ರಭಸ ಮೈ ಜುಮ್ಮೆನ್ನುವಂತಿತ್ತು. ಅನುಭವಿ ಮೀನುಗಾರರು ಈ ಜಲಪಾತದ ಕೊರಕಲಿನಲ್ಲಿ ಮೀನು ಹಿಡಿಯಲು ಇಳಿಯುತ್ತಾರೆ...!!!

ನಾವು ಅಲ್ಲಿಂದ ಹೊರಡುವ ಸೂಚನೆ ಕಾಣದಿದ್ದಾಗ, ತೆಪ್ಪದವ ಬಂದು ಹೊರಡುವಂತೆ ಸೂಚಿಸಿದ. ನದಿಯ ಆಳ ಕಡಿಮೆ ಇರುವಲ್ಲಿ, ಸ್ವಚ್ಛ ನೀರಿನ ಜಾಗದಲ್ಲಿ ನಾವು ಸ್ನಾನ ಮುಗಿಸಿದೆವು.

ಅಲ್ಲಿಂದ ಹೊರತು ತಮಿಳುನಾಡಿನ ಭಾಗದಲ್ಲಿರುವ ಜಲಪಾತಕ್ಕೆ ಬಂದೆವು. ನೀರು ಮೈಮೇಲೆ ಉಕ್ಕಿ ಬಂದಂತೆ ಭಾಸವಾಗುವ ಈ ಜಲಪಾತವನ್ನು ಹತ್ತಿರದಿಂದ ವೀಕ್ಷಿಸಬಹುದು. ಸುತ್ತಲೂ ಸಣ್ಣ ಸಣ್ಣ ಜಲಪಾತಗಳು, ನೀರಿನ ಅಗಾಧತೆ ಇಲ್ಲಿನ ವಿಶೇಷ. ಜಲಪಾತ ವೀಕ್ಷಣೆಗೆ ಸರಕಾರ ತೂಗುಸೇತುವೆ ಕೂಡ ನಿರ್ಮಿಸಿದೆ. ಬೇಸಿಗೆ ಕಾಲದಲ್ಲಿ ನೀರಿನ ಹರಿವು ಕಡಿಮೆ ಇದ್ದಾಗ ತೆಪ್ಪದಲ್ಲಿ ಜಲಪಾತದ ಬುಡಕ್ಕೆ ಹೋಗಲು ಸಾಧ್ಯ. ನೀರಿನ ರಭಸಕ್ಕೆ ವಿರುದ್ಧ ೫-೬ ಜನರನ್ನು ಕೂಡಿಸಿಕೊಂಡು ತೆಪ್ಪ ನಡೆಸುವನ ಚಾಕ-ಚಕ್ಯತೆ ಮೆಚ್ಚುವಂತದ್ದು.

ಗಂಟೆಗಳ ಕಾಲ ಜಲಧಾರೆಯನ್ನು ನೋಡಿ, ನಮ್ಮನ್ನು ಸುರಕ್ಷಿತವಾಗಿ ದಡಕ್ಕೆ ತಲುಪಿಸಿದ ತೆಪ್ಪದವನಿಗೆ ಧನ್ಯವಾದ ತಿಳಿಸಿ ನಾವು ವಾಪಸು ಹೊರಟೆವು.

ಅತಿ ಕಡಿಮೆ ಸಮಯದಲ್ಲಿ, ಆಯಾಸವಿಲ್ಲದೆ ಸುಂದರ ದಿನವನ್ನು ಕಳೆದ ನೆನಪಿನೊಂದಿಗೆ ಹೊಸೂರು ಹೆದ್ದಾರಿಯ ವಾಹನಗಳ ನಡುವೆ ನಾವೂ ತೂರಿಕೊಂಡೆವು.

ಯಾವುದಾದರು ದೊಡ್ಡ ಬಂಡೆ ದೂರದಲ್ಲಿ ಕಂಡರೂ ಸಾಕು ಕಾರು ಗಕ್ಕನೆ ನಿಂತುಬಿಡುತಿತ್ತು

2010-10-09T04:49:00.000-07:00

ಮಿಕ್ಕವರ ಸ್ವಾತಂತ್ರ್ಯ ಹರಣ ಮಾಡಿ ಬದುಕುವ ಮಾನವ ಯಾವತ್ತೂ ಸ್ವಾತಂತ್ರ್ಯ ಪ್ರಿಯ. ಕಾಡಿನಲ್ಲಿ ಮುಕ್ತವಾಗಿ ತಿರುಗಿಕೊಂಡಿದ್ದ ಪ್ರಾಣಿಗಳನ್ನೆಲ್ಲ ಕಟ್ಟಿ ಹಾಕಿ ,ಮನಸೋ ಇಚ್ಛೆ ಆನಂದಿಸುವ ಪ್ರಾಣಿ ಮಾನವ. ಸ್ವಾತಂತ್ರ್ಯ ದಿನವನ್ನು ಸುಮ್ಮನೆ ಮನೆಯಲ್ಲಿ ಕುಳಿತು ಕಳೆಯಲು ಮನಸ್ಸಾಗದೆ ವಿಶೇಷವಾಗಿ ಆಚರಿಸಲೇ ಬೇಕೆಂದು ನಮ್ಮ ಗುಂಪು ತೀರ್ಮಾನಿಸಿ ನಾವು, ಸ್ವಾತಂತ್ರ್ಯ ದಿನವನ್ನ ಆಚರಿಸುವ ಸಲುವಾಗೇ ನಾಡಿನಿಂದ ಕಾಡಿಗೆ ತೆರಳಿದ್ದೆವು, ಅದಕ್ಕಾಗಿ ಸಕಲ ಸಿದ್ಧತೆ ಹಿಂದಿನ ದಿನವೇ ಮಾಡಿಕೊಂಡಿದ್ದೆ. ಅದಕ್ಕೆ ಬೇಕಾದ ಶುಭ್ರವಾದ ಹತ್ತಿ ಬಟ್ಟೆಯ ರಾಷ್ಟ್ರ ಧ್ವಜವನ್ನು, ಉದ್ದನೆಯ ಕೋಲು ಸಹ ಖರೀದಿಸಿದ್ದೆ. ಏನೋ ಒಂದು ತರಹದ ಉತ್ಸಾಹ ಮನೆಮಾಡಿತ್ತು . ೧೪ ರ ರಾತ್ರಿ ಸುಮಾರು ೧೦.೩೦ಕ್ಕೆ ೮ ಜನ ಹುಡುಗರು ಕೂಡಿಕೊಂಡು ೨ ಕಾರಲ್ಲಿ ಮೈಸೂರು ಕಡೆ ಹೊರಟೆವು.ಅಲ್ಲಿಯೇ ನಾವು ಭೇಟಿಯಾದದ್ದು ಕಾಡಿನ ರಾಜನನ್ನ.

ಮಾರ್ಗ ಮಧ್ಯೆ ಎಂದಿನ ನಿಯಮದಂತೆ ದಾಹ ಇಂಗಿಸಿಕೊಳ್ಳಲು ಕಾಫಿ-ಡೇ ಗೆ ನಮ್ಮಭೇಟಿ, ಪುಟ್ಟ ಕೇಕ್ ಒಂದನ್ನು ಖರೀದಿಸಿ ಭರ್ಜರಿ ಘೋಷಣೆ, ಜೈ ಭಾರತ್,ಮೇರಾ ಭಾರತ್ ಮಹಾನ್ ಎಂಬೆಲ್ಲಾ ಜೈಕಾರ ದೊಂದಿಗೆ, ಖರೀದಿಸಿದ ಕೇಕ್ ಕತ್ತರಿಸಿ ಬಾಯಿ ಸಿಹಿಮಾಡಿದೆವು. ಹಿತವಾದ ಕಾಪ್ಪಿಚಿನೋ ಕುಡಿದು ನಮ್ಮ ತಂಡ ಅಲ್ಲಿಂದ ಮುಂದೆ ಹೊರಟಿದ್ದು ನಿಜ. ಉತ್ತಮ ರಸ್ತೆ, ತಣ್ಣನೆಯ ಗಾಳಿ, ಇಂಪಾದ ಸಂಗೀತ, ಮೋಜು ಮಸ್ತಿ, ಮಾತು ಹರಟೆಗಳಿಂದ ನಮ್ಮ ಪ್ರಯಾಣ ಕಳೆಗಟ್ಟಿತ್ತು.

ಗುಂಡ್ಲುಪೇಟೆ ದಾಟಿ, ಗೋಪಾಲ ಸ್ವಾಮಿ ಬೆಟ್ಟದ ಚೆಕ್ ಪೋಸ್ಟ್ ತಲುಪಿದಾಗ ಬೆಳಗಿನ ಜಾವ ೫ ಗಂಟೆಯ ಮಂದ ಬೆಳಕು ನಮ್ಮನ್ನ ಸ್ವಾಗತಿಸಿತ್ತು. ಕಾಡು ಪ್ರಾಣಿಗಳು, ಆನೆಗಳು ಇಲ್ಲಿ ಸಂಚರಿಸುವುದು ಸಾಮಾನ್ಯ. ಸಂಜೆ ೬ ರಿಂದ ಬೆಳಿಗ್ಗೆ ೬ ರ ವರೆಗೆ ಚೆಕ್ ಪೋಸ್ಟ್ ನಿಂದ ಬೆಟ್ಟಕ್ಕೆ ಪ್ರಯಾಣ ನಿಷೇಧಿಸಲಾಗಿದೆ. ಅವುಗಳ ರಕ್ಷಣೆಗೆ ಮಾತ್ರ ಅಲ್ಲ, ಅವುಗಳಿಂದ ನಮಗೂ ರಕ್ಷಣೆ ಬೇಕಲ್ಲ, ಅದಕ್ಕೆ ಈ ನಿರ್ಬಂಧ. ನಾವು ಗೇಟಿನ ಮುಂದೆ ಕಾದೆವು.

ಸುಮಾರು ಅರ್ಧ ಕಿ.ಮೀ ಹೋಗುವಷ್ಟರಲ್ಲೇ, ರಸ್ತೆ ತುಂಬಾ ಮುರಿದ ಮರದ ಕೊಂಬೆಗಳು, ಅಲ್ಲಲ್ಲಿ ರಸ್ತೆ ಬದಿಯ ಮಣ್ಣನ್ನು ಎತ್ತಿ ಹಾಕಿದ ಗುರುತು, ಹಸೀ ಹಸೀ ಲದ್ದಿ..! ನಮ್ಮ ಧೈರ್ಯ ಅರ್ಧ ಕಡಿಮೆ ಆಯಿತಿರಬೇಕು, ನಮ್ಮ ಕಾರು ಮುಂದಕ್ಕೆ ಹೋಗುತ್ತಲೇ ಇರಲಿಲ್ಲ...!! ಹಿಂತಿರುಗಿ ಹೋಗುವಂತೆಯೂ ಇರಲಿಲ್ಲ..ಕಾರನ್ನು ತಿರುಗಿಸುವುದು ಕಷ್ಟ ಆಗಿತ್ತು..! ಏನಾದರೂ ಒಂದು ಕೈ ನೋಡಿಯೇ ಬಿಡೋಣ ಎಂದು ಮುಂದೆ ಹೊರಟೆವು. ಯಾವುದಾದರು ದೊಡ್ಡ ಬಂಡೆ ದೂರದಲ್ಲಿ ಕಂಡರೂ ಸಾಕು ಕಾರು ಗಕ್ಕನೆ ನಿಂತುಬಿಡುತಿತ್ತು...:-)

ಅಷ್ಟರಲ್ಲೇ, ಪಕ್ಕದ ಕುರುಚಲು ಕಾಡಿನಿಂದ ಹುಲಿಯೊಂದು ಚಂಗನೆ ಜಿಗಿದು ರಸ್ತೆ ಅಡ್ಡಲಾಗಿ ಹೋಗಿ ಕಾಡಲ್ಲಿ ಮತ್ತೆ ಮರೆಯಾಯಿತು, ಅದೊಂದು ಅದ್ಭುತ ಅನುಭವ; ಹೀಗೆ ಹುಲಿಯೊಂದನ್ನು ನಾನು ಮೊದಲು ನೋಡಿದ್ದಿಲ್ಲ..! ಆದರೂ, ಆಗಲೇ ಹೆದರುತ್ತಲೇ ಬಂದದ್ದು ಕೂಡ ಸಾರ್ಥಕ ಅನ್ನಿಸಿದ್ದು. ಮುಂದೆ ಸ್ವಲ್ಪ ದೂರದಲ್ಲಿ "ಸೂಚನ ಫಲಕ" ಮುರಿದು ರಸ್ತೆಗೆ ಅಡ್ಡಲಾಗಿ ಬಿದ್ದಿತ್ತು, ರೆಂಬೆ ಕೊಂಬೆಗಳು ಸುತ್ತಲೂ ಮುರಿದಿದ್ದವು , ನಮ್ಮನ್ನ ಆವರಿಸಿದ್ದ ಭಯ ಮತ್ತು ಹೆಚ್ಚಿತು, ಹತ್ತಿರದಲ್ಲಿ ಆನೆಗಳ ಗುಂಪು ಇದೆ ಎಂಬ ಸೂಚನೆಯಿಂದಾಗಿ ಮುಂದೆ ಹೋಗುವ ಧೈರ್ಯ ಯಾರಿಗೂ ಇರಲಿಲ್ಲ, ಮುಂಜಾನೆಯ ಚಳಿಯಲ್ಲೂ ನಿಧಾನಕ್ಕೆ ಬೆವರಿಳಿಯತೊಡಗಿತು..! ಮುಂದೆ ಹೋಗುವಂತೆಯೂ ಇಲ್ಲ..ಹಿಂತಿರುಗುವಹಾಗು ಇಲ್ಲ! ಉಳಿದವರ ಧೈರ್ಯದ ಮೇಲೆ ಅಂತೂ ಮುಂದೆ ಹೊರಟರು ಚಿಕ್ಕ ಭಯ ಬಿಟ್ಟಿರಲಿಲ್ಲ; ಪುಣ್ಯಕ್ಕೆ ಆನೆಗಳ ಹಿಂಡು ದಾರಿಯಲ್ಲೆಲ್ಲೂ ಸಿಗಲಿಲ್ಲ.

ಸಾಮಾನ್ಯವಾಗಿ ಕಾಡಿನಲ್ಲಿ ಪ್ರಯಾಣಿಸುವಾಗ ಎಲ್ಲಾದರೂ ಆನೆಗಳ ಹಿಂಡು ಸಿಗಲಿ ಎಂದು ಪ್ರಾರ್ಥಿಸುತ್ತೇವೆ ಆದರೆ, ನಮ್ಮ ಪರಿಸ್ಥಿತಿ ಉಲ್ಟಾ..ಆನೆಗಳು ಎದುರಾಗದಿರಲಿ ಎಂದು ಪ್ರಾರ್ಥಿಸುವದಾಗಿತ್ತು ನಮ್ಮ ಕೆಲಸ.

ಮುಕ್ಕಾಲು ಗಂಟೆಯ ಪ್ರಯಾಣದ ನಂತರ ದೇವಸ್ಥಾನದ ಸಮೀಪವಾಗಿತ್ತು . ಮುಂಜಾನೆಯ ದೃಶ್ಯ ನಿಜಕ್ಕೂ ಬಹಳ ಅದ್ಭುತ. ಹಕ್ಕಿಗಳ ಚಿಲಿಪಿಲಿ, ತಣ್ಣನೆಯ ಗಾಳಿ, ಸುಂದರ ದೇವಸ್ಥಾನ, ಕೆಂಪಾಗುತ್ತಿರುವ ಮೂಡಣ..! ಒಂದಕ್ಕಿಂತ ಒಂದು ಹೆಚ್ಚು ಇಂಪು. ಕಣ್ಣಿಗೆ ಮನಕ್ಕೆ ತಂಪು ತಂದಿದ್ದವು, ಸಾರ್ಥಕತೆಯ ಖುಷಿಯಿಂದ ಕುಣಿದಾಡಿದೆವು. ಅವ ಬೆಳಿಗ್ಗೆ ನಮಗೆ ಉಚಿತ ಬಿಸಿ ಬಿಸಿ ಚಹಾ ಕೂಡ ಮಾಡಿಕೊಟ್ಟ.
ಪುನಃ ಅವನಿಗೆ ಕೇಳಿದೆವು ಇಲ್ಲಿ ಆನೆಗಳನ್ನು ನೋಡಬೇಕು ಎಲ್ಲಿ ಇರುತ್ತವೆ ತೋರಿಸು ಅಂತ, ಅದಕ್ಕೆ ಆತ ಸ್ವಾಮಿ ದೇವಸ್ಥಾನದ ಹಿಂಬಾಗ ನೋಡಿ ಆನೆಗಳ ಗುಂಪೇ ಇದೆ ಅಂದ. ನಾವು ಓಡಿ ಹೋಗಿ ನೋಡಿದರೆ ೧೦-೧೨ ಆನೆಗಳ ಗುಂಪೇ ಅಲ್ಲಿತ್ತು! ಆನೆಗಳಿಗೆ ತೊಂದರೆ ಆಗದಂತೆ ತಾಸುಗಟ್ಟಲೆ ದೂರದಲ್ಲಿ ನಿಂತು, ಅವುಗಳನ್ನು ಅತೀ ಹತ್ತಿರದಿಂದ ನಿಂತು ನೋಡಿದೆವು. ಬೆಳಕು ಹರಿಯುತ್ತಲೇ ಅವು ಬೆಟ್ಟದ ಕಣಿವೆಯಲ್ಲಿ ಮರೆಯಾಗತೊಡಗಿದವು, ಅಂತೆಯೇ ಪ್ರವಾಸಿಗರ ವಾಹನಗಳು ಹೆಚ್ಚಿದವು.

ಬೆಳಗ್ಗೆ, ಪಕ್ಕದ ಗಿಡಗಂಬಹಿರ್ದೆಸೆಗೆಂದುಟಿಯ ಹಿಂಬಾಗಕ್ಕೆ ಮರೆಯಾಗಿ ಹೋದ ಗೆಳೆಯ ರವಿ, ಒಂದೇ ನಿಮಿಷದಲ್ಲಿ ಏದುಸಿರು ಬಿಡುತ್ತ ಓಡಿ ಬಂದ.ಏನಾಯಿತು ಅಂತ ಕೇಳಿದರೆ, ಆ ಪೊದೆಯ ಹಿಂದೆ ಒಂದು ಕಾಡೆಮ್ಮೆ ಇತ್ತು, ಅವನನ್ನ ನೋಡಿ ಒಂದು ಸಲ ಗುಟುರು ಹಾಕಿತ್ತು. ಆತ ಪ್ಯಾಂಟಿನ ಜಿಪ್ ಹಾಕುವುದು ಮರೆತು ಓಡಿಬಂದಿದ್ದ..:-)
ಪೂರ್ತಿ ಬೆಳಗಾದಾಗ ಪ್ರವಾಸಿಗರು, ಭಕ್ತರು ಬಂದು ದೇವಸ್ಥಾನದ ಹಿಂಬಾಗದ ಬೆಟ್ಟದ ತುಂಬೆಲ್ಲಾ ಓಡಾಡಿ ಗಲಾಟೆ ಜಾಸ್ತಿ ಆಗಿದ್ದರಿಂದ ಎಲ್ಲ ಆನೆಗಳು ಮರೆಯಾದವು.

ಗೋಪಾಲ ಸ್ವಾಮಿ ಬೆಟ್ಟದ ಸುತ್ತಲಿನ ಪ್ರದೇಶ ಸುಂದರವಾಗಿದೆ. ಹಸಿರು ಕಣಿವೆ, ಬಂಡೀಪುರ ಕಾಡಿನ ಸಾಲು, ಮೋಡಗಳು, ದೂರದಲ್ಲಿ ಕಾಣುವ ಆನೆಗಳ ಹಿಂಡು, ಶಾಂತವಾದ ವಾತಾವರಣ ಮನಸ್ಸಿಗೆ ಹಿತ ನೀಡಿತ್ತು. ಯಾಂತ್ರಿಕ ಜೀವನದ ಮಧ್ಯೆ ಸುಂದರ ದಿನ ಕಳೆಯಲು ಇದು ಸೂಕ್ತ ಜಾಗ. ಬೇಸಿಗೆಯ ಕಾಲದಲ್ಲೂ ಇಲ್ಲಿ ಮೋಡ ಸುತ್ತುವರಿದಿರುತ್ತದೆ. ಹಾಗಾಗಿ ಇದಕ್ಕೆ "ಹಿಮವದ್ ಗೋಪಾಲ ಸ್ವಾಮಿ ಬೆಟ್ಟ" ಅಂತ ಕರೆಯುತ್ತಾರೆ. ಸದಾ ಕಾಲ ಗರ್ಭಗುಡಿಯ ಮೇಲ್ಭಾಗದಲ್ಲಿ ನೀರು ಜಿನುಗುತ್ತಿರುತ್ತದೆ..!

ನಂತರ ಒಂದಷ್ಟು ಫೋಟೋಗಳನ್ನೂ ತೆಗೆದು, ಗಾರ್ಡ್ ನನ್ನು ಮತ್ತೊಮ್ಮೆ ಮಾತನಾಡಿಸಿ ಬೆಂಗಳೂರಿನತ್ತ ಹೊರಟಾಗ ಮತ್ತೆ ಮುಸ್ಸಂಜೆ..!

ವಾರಾಂತ್ಯಕ್ಕೆ ವಯನಾಡು

2010-05-24T18:55:00.000-07:00

ತುಂಬಾ ದಿನಗಳ ನಂತರ ಬ್ಲಾಗ್ ಕಡೆಗೆ ತಲೆ ಹಾಕಿದ್ದೇನೆ, ಆಫೀಸ್ ಕೆಲಸ, ಗೆಳೆಯರ ಮದುವೆ, ಅಣ್ಣನ ಮಗಳ ನಿಶ್ಚಿತಾರ್ತ, ನೆಂಟರಿಷ್ಟರ ಮನೆ ಓಡಾಟ, ಅದು ಇದು ಅಂತಾನೆ ದಿನಗಳು ಕಳೆದು ಹೋದವು. ವರ್ಷದ ಆರಂಭದಲ್ಲಿ ಯೋಜಿಸಿದಂತೆ ತಿಂಗಳಿಗೆ ಕಡಿಮೆ ಎಂದರೂ ಒಂದಾದರೂ ಚಾರಣ ಮಾಡಬೇಕು ಅನ್ನುವ ಬಯಕೆ ಕಳೆದ ಮೂರು ತಿಂಗಳಿಂದ ಹಾಗೆಯೇ ಉಳಿದಿದೆ. ಪ್ರತೀ ವಾರಾಂತ್ಯವು ಏನಾದರು ಕೆಲಸ ನಿಗದಿಯಾಗಿರುತ್ತದೆ...! ಕಳೆದೊಂದು ವಾರದಿಂದ ಕೆಲಸದ ಒತ್ತಡ ಸ್ವಲ್ಪ ಕಡಿಮೆ ಆದಂತಿದೆ...! ಬ್ಲಾಗ್ ಕಡೆಗೆ ತಲೆ ಹಾಕಿ ನೆಮ್ಮದಿಯಾಗಿ ಎಲ್ಲರ ಪೋಸ್ಟುಗಳನ್ನು ಓದಲು ಸಾಧ್ಯವಾಗಿದೆ...! ಬೆಂಗಳೂರಿನಲ್ಲಿ ಕಳೆದೆರಡು ದಿನದಿಂದ ನಿರಂತರ ಮಳೆಯಾಗುತ್ತಿದೆ. ಹವಾಮಾನ, ತಂಪಾದ ವಾತಾವರಣ ಮತ್ತೆ ತಿರುಗಾಟಕ್ಕೆ ಹುರುಪು ನೀಡುತ್ತಿದೆ. ಹಾಗೆಯೇ ಹಿಂದಿನ ಪ್ರವಾಸದ ಅನುಭವ ಹಂಚಿಕೊಳ್ಳುತ್ತಿದ್ದೇನೆ. ನಿಮ್ಮ ಪ್ರೋತ್ಸಾಹ ಎಂದಿನಂತೆಯೇ ಇರಲಿ.

ಈ ವರ್ಷ ಬೇಸಿಗೆಯಲ್ಲಿ "ನಮ್ಮ ಬೆಂಗಳೂರು" ಅತೀ ಹೆಚ್ಚಿನ ಬಿಸಿಲು, ಸೆಖೆಗೆ ಬೆಂಡಾಗಿದೆ. ಈ ಬೇಸಿಗೆಯ ದಿನಗಳಲ್ಲಿ ವಾರಾಂತ್ಯ ಕಳೆಯುವುದು ಸ್ವಲ್ಪ ಕಷ್ಟ. ಹೊರಗಡೆ ಸುತ್ತಾಡಲು ಮನಸ್ಸು ಬಾರದು, ಮನೆಯೊಳಗಿದ್ದರೆ ತಾಳಲಾರದ ಸೆಖೆ, ಕರೆಂಟು ಕೂಡ ಇರುವುದಿಲ್ಲ. ಇಂತಹ ದಿನಗಳಲ್ಲಿ ಜಲಪಾತಕ್ಕೆ ಮೈಯೊಡ್ಡಿ ನಿಂತು ದಿನವಿಡೀ ಕಳೆಯುವುದು ಸ್ವರ್ಗದಷ್ಟು ಸುಖ. ಇಂತಹುದೇ ಆಲೋಚನೆಗಳೊಂದಿಗೆ ಕೇರಳದ 'ವಯನಾಡ್' ನತ್ತ ಮಾರ್ಚ್ ೧೩ ಬೆಳಗಿನ ಜಾವ ಸುಮಾರು ೬ ಗಂಟೆಯ ವೇಳೆ ಅರವಿಂದನ ಹೊಚ್ಚ ಹೊಸ ಸ್ವಿಫ್ಟ್ ಕಾರಿನಲ್ಲಿ ಹೊರಟೆವು. ದೂರದ ಪ್ರಯಾಣವು ಅಲ್ಲದ, ರಸ್ತೆ ಸಂಪರ್ಕವು ಉತ್ತಮವಾಗಿರುವ ವಯನಾಡ್ ವಾರಾಂತ್ಯಕ್ಕೆ ಅತೀ ಸೂಕ್ತವಾದ ಸ್ಥಳ.

ವಯನಾಡ್ ಬಗ್ಗೆ ಒಂದಿಷ್ಟು :
ಕೇರಳ ರಾಜ್ಯದ ಉತ್ತರಕ್ಕಿದೆ ವಯನಾಡ್ ಜಿಲ್ಲೆ. ಮಲೆಯಾಳಂ ನಲ್ಲಿ "ವಯಲ್(ಅಕ್ಕಿ)" + "ನಾಡ್(ಪ್ರದೇಶ)", ಅಕ್ಕಿಯ ತವರೂರು ಎಂದರ್ಥ. ಪಶ್ಚಿಮ ಘಟ್ಟಗಳ ಸಾಲಿನ ತಪ್ಪಲಿನಲ್ಲಿ ಈ ಸುಂದರ ನಾಡಿದೆ. ಇಲ್ಲಿನ ಜಲಪಾತಗಳು, ಕಣಿವೆ, ಬೆಟ್ಟಗುಡ್ಡಗಳು, ಹಸಿರು ಕಾನನ ಎಲ್ಲವು ವಯನಾಡನ್ನು ಸುಂದರ ಪ್ರವಾಸಿ ತಾಣವನ್ನಾಗಿ ಮಾಡಿದೆ. ಕಾಫಿ ಮತ್ತು ಟೀ ಇಲ್ಲಿನ ಪ್ರಮುಖ ವಾಣಿಜ್ಯ ಬೆಳೆ. ಇಲ್ಲಿ ಕಾಫಿ ಮತ್ತು ಟೀ ಎಸ್ಟೇಟ್ ಗಳನ್ನೂ ಅಕ್ಕ-ಪಕ್ಕದಲ್ಲಿಯೇ ಕಾಣಬಹುದು. ಇಲ್ಲಿನ ಪ್ರಮುಖ ಪ್ರವಾಸಿ ತಾಣಗಳೆಂದರೆ ಎಡಕಲ್ಲು ಗುಡ್ಡ, ಕುರ್ವ ದ್ವೀಪ, ದೇವಸ್ಥಾನಗಳು, ಬಾಣಸುರ ಆಣೆಕಟ್ಟು, ಮಾತುಂಗ & ವಯನಾಡ್ ಸಂರಕ್ಷಿತ ಅರಣ್ಯ, ಚಂಬ್ರ ಗುಡ್ಡ ಮತ್ತು ಇನ್ನು ಅನೇಕ..!

ಎಂದಿನಂತೆ ಮೈಸೂರು ರಸ್ತೆಯ ಕಾಮತ್ ಹೋಟೆಲಿನಲ್ಲಿ ರುಚಿಯಾದ ಉಪಹಾರ ಮುಗಿಸಿದೆವು. ಮೈಸೂರು - ನಂಜನಗೂಡು - ಗುಂಡ್ಲುಪೇಟೆ ಮಾರ್ಗವಾಗಿ ಸುಲ್ತಾನ್-ಭತೆರಿ ಕಡೆ ಸಾಗಿದೆವು. ಹಸಿರು ಮರೆಯಾಗಿದ್ದರು ತಂಪಾದ ಅರಣ್ಯ ಪ್ರದೇಶ, ಚಂದದ ದಾರಿ, ಯಾವುದಾದರು ಕಾಡು ಪ್ರಾಣಿ ಎದುರಾಗುವುದೆಂಬ ಕುತೂಹಲ. ಎಂದಿನಂತೆಯೇ ಈ ಸಲವೂ ನಿರಾಶೆ. ಸುಲ್ತಾನ್ ಭತೆರಿ ತಲುಪಿದಾಗ ೧೧ ಗಂಟೆ ಆಗಿತ್ತು. ಇದು ವಯನಾಡಿನ ಪ್ರಮುಖ ಪಟ್ಟಣ. ಪ್ರವಾಸಿಗರಿಗೆ ಬೇಕಾದ ಎಲ್ಲ ಅನುಕೂಲಗಳು ಇವೆ, ಇಲ್ಲಿಂದ ಸುತ್ತಮುತ್ತಲ ಪ್ರದೇಶಗಳಿಗೆ ಸುಲಭವಾಗಿ ಹೋಗಿಬರಬಹುದು. ಮೊದಲೇ ನಿರ್ಧರಿಸಿದಂತೆ ನೇರವಾಗಿ "ಮೀನಮಟ್ಟಿ" ಜಲಪಾತಕ್ಕೆ ತೆರಳಿದೆವು. ಇದು 'ಮೆಪ್ಪಾಡಿ' ಎಂಬ ಊರಿನ ಹತ್ತಿರ ಇದೆ.

ಮೀನಮಟ್ಟಿ ಜಲಪಾತದ ಬಗ್ಗೆ : Meppaadi ಇಂದ ಊಟಿಗೆ ಹೋಗುವ ಮಾರ್ಗದಲ್ಲಿ ಈ ಜಲಪಾತ ಇದೆ. ಜಲಪಾತ ಇರುವ ಸ್ಥಳ ಕೇರಳ ಮತ್ತು ತಮಿಳುನಾಡು ಗಡಿ ಭಾಗ. ಕೇರಳದ ಅತೀ ದೊಡ್ಡ ಜಲಪಾತಗಳಲ್ಲಿ ಇದು ಒಂದು. ಸುಮಾರು ೩೦೦ ಮೀ ಎತ್ತರದಿಂದ ನೀರು ಧುಮ್ಮಿಕ್ಕುತ್ತದೆ. ಮೀನಮಟ್ಟಿ ಅಂದರೆ "ಮೀನು ಈಜಲಾರದು" ಎಂದರ್ಥ. ಇಲ್ಲಿನ ನೀರಿನ ರಭಸಕ್ಕೆ ಮೀನುಗಳು ನೀರಿನ ವಿರುದ್ಧ ದಿಕ್ಕಿನಲ್ಲಿ ಈಜಲಾರವು. ಸುತ್ತಲೂ ಟೀ ಎಸ್ಟೇಟ್, ಹಸಿರಿನ ಕಣಿವೆ ಈ ಜಲಪಾತದ ಸೌಂದರ್ಯ ಇಮ್ಮುಡಿಗೊಳಿಸಿವೆ. ಜಲಪಾತದ ಸನಿಹ ಹೋಗಲು ಸ್ವಲ್ಪ ಕಷ್ಟದ ದಾರಿ ಆದ್ದರಿಂದ ಪ್ರವಾಸಿಗರು ಸ್ವಲ್ಪ ಕಡಿಮೆ.

ಪ್ರವೇಶ ಶುಲ್ಕ ನಿಗದಿತ ೩೦೦ ರೂಪಾಯಿ ಪಾವತಿಸಿ, ಒಬ್ಬ ಅನುಭವಿ ಮಾರ್ಗದರ್ಶಕನ ಜೊತೆ ಎಸ್ಟೇಟ್ ಮಧ್ಯೆ ಹೊರಟೆವು. ಹಚ್ಚ ಹಸಿರಿನ ಸಮತಟ್ಟಾದ ಟೀ ಎಸ್ಟೇಟ್ ಸೊಬಗನ್ನು ಸವಿಯುತ್ತ, ಅಲ್ಲಲ್ಲಿ ಫೋಟೋ ಕ್ಲಿಕ್ಕಿಸುತ್ತ ನಡೆದೆವು. ಸುಮಾರು ೧೦ ನಿಮಿಷ ನಡೆದ ಮೇಲೆ ಅಲ್ಲಿನ ನಿಜವಾದ ಕಷ್ಟದ ಅರಿವಾದದ್ದು. ಮುಂದಕ್ಕೆ ಒಮ್ಮೆಲೇ ಪ್ರಪಾತ, ಸಣ್ಣ ಕಾಲುದಾರಿ, ಇಳಿಜಾರು..! ಅಲ್ಲಲ್ಲಿ ಹಗ್ಗದ ಸಹಾಯದಿಂದ ಜಾಗರೂಕತೆಯಿಂದ ಇಳಿಯಬೇಕು.! ಸ್ವಲ್ಪ ಎಚ್ಚರ ತಪ್ಪಿದರೂ ಬದುಕುಳಿಯುವುದು ಕಷ್ಟ..! ಸಣ್ಣ ಮಟ್ಟಿನ ಸಾಹಸ ಚಾರಣವೇ ಸೈ. ಆದರೆ ಅಷ್ಟೇ ಮಜಾ ಬಂತು..!!

ಜಲಪಾತ ನೋಡಿದಾಗ ನಮ್ಮೆಲ್ಲ ಕಷ್ಟವು ಸಾರ್ಥಕ ಅನ್ನಿಸಿತು. ನಾವು ಏನನ್ನು ನಿರೀಕ್ಷಿಸಿದ್ದೆವೋ ಅದಕ್ಕಿಂತಲೂ ಹೆಚ್ಚಿನ ಸೌಂದರ್ಯದ ಜಲಪಾತ ಇದಾಗಿತ್ತು. ಬೇಸಿಗೆ ಕಾಲದಲ್ಲಿಯೂ ಇಷ್ಟರ ಮಟ್ಟಿನ ನೀರನ್ನು ನಿರೀಕ್ಷಿರಲಿಲ್ಲ..! ಹಾಲು ಬಿಳುಪಿನ ಸುಂದರ ಜಲಧಾರೆ ನಮ್ಮನ್ನ ಕಳೆದು ಹೋಗುವಂತೆ ಮಾಡಿತು. ಸುತ್ತಲೂ ಓಡಾಡಿಕೊಂಡು ಎಲ್ಲ ರೀತಿಯಲ್ಲೂ ಜಲಪಾತದ ಸೊಬಗನ್ನು ಕಣ್ಣತುಂಬಿಕೊಂಡೆವು. ಹೆಚ್ಚಿನ ತಡಮಾಡದೆ ನೀರಿಗೆ ಜಿಗಿದು ಮೈ-ಮನ ಹಗುರಾಗಿಸಿಕೊಂಡೆವು. ಮಧ್ಯಾನ್ನದ ಊಟದ ಹಸಿವನ್ನು ಮರೆತು ಸಾಯಂಕಾಲದ ತನಕ ನೀರಲ್ಲಿ ಆಟ ಆಡಿಕೊಂಡಿದ್ದೆವು. ಜಲಪಾತದ ಸೌಂದರ್ಯದ ಬಗ್ಗೆ ನಾನು ಹೆಚ್ಚಿಗೆ ಹೇಳಬೇಕಾಗಿಲ್ಲ.. ಈ ಕೆಳಗಿನ ಚಿತ್ರಗಳೇ ಅದನ್ನ ವರ್ಣಿಸುತ್ತವೆ..!

ಸಾಯಂಕಾಲ ೫ ಗಂಟೆಯ ವರೆಗೆ ತೃಪ್ತಿಯಾಗುವಷ್ಟು ಸಮಯ ಕಳೆದು, ಅಲ್ಲಿಯೇ ಇದ್ದ ಮೆಸ್ ಒಂದರಲ್ಲಿ ಊಟ ಮುಗಿಸಿದೆವು. ಅಲ್ಲಿನ ಮಸಾಲೆ ಮಜ್ಜಿಗೆ ಇನ್ನು ನೆನಪಿನಲ್ಲಿದೆ..ಅಷ್ಟು ರುಚಿಯಾಗಿತ್ತು. ಜಲಪಾತಕ್ಕೆ ಹೋಗುವ ಮುನ್ನ ಇಂತಿಷ್ಟು ಜನರಿಗೆ ಊಟ ಅಂತ ತಿಳಿಸಿ ಹೋದರೆ ವಾಪಾಸು ಬಂದಾಗ ಬಿಸಿ ಬಿಸಿ ಊಟ ತಯಾರಿಸಿ ಇಡುತ್ತಾರೆ. ಪ್ರವಾಸಿಗರೇ ಇಲ್ಲಿನವರಿಗೆ ಆದಾಯದ ಮೂಲ. ವಯನಾಡಿನಲ್ಲಿ 'WAIST ಬಿನ್'..!! ಕೂಡ ಇದೆ, ಯಾರಾದರು ಸೊಂಟ ಮುರಿದವರು ಇದನ್ನ ಉಪಯೋಗಿಸಬಹುದೇನೋ..!!

ಅಲ್ಲಿಂದ ಸುಮಾರು ೮ ಕಿ.ಮೀ ದೂರ ಇರುವ 'ಸನ್ಸೆಟ್ ಪಾಯಿಂಟ್' ಗೆ ತೆರಳಿದೆವು. ರಸ್ತೆಯ ಪರಿಸ್ಥಿತಿ ತುಂಬಾ ಹದಗೆಟ್ಟಿರುವುದರಿಂದ ಮತ್ತು ಎಲ್ಲಿಯೂ ಮಾರ್ಗಸೂಚಿ ಫಲಕ ಇಲ್ಲದಿರುವ ಕಾರಣ ೮ ಕಿ.ಮೀ ತಲುಪಲು ಮುಕ್ಕಾಲು ಗಂಟೆಯೇ ಬೇಕಾಯಿತು. ಪಶ್ಚಿಮ ಘಟ್ಟ ಬೆಟ್ಟಗಳು, ಹಸಿರು ಕಾನನ, ಕಡಿದಾಗ ಕಣಿವೆ, ಅಲ್ಲಿಯೇ ಹರಿಯುವ ನದಿ ಎಲ್ಲವೂ ನಯನಮನೋಹರ.

ಸೂರ್ಯಾಸ್ತದ ದೃಶ್ಯದ ಸೊಬಗು, ನಿಶ್ಯಬ್ದ ವಾತಾವರಣ, ಹಕ್ಕಿಗಳ ಕಲರವ, ಒಂದು ಸುಂದರ ಸಂಜೆಯನ್ನು ಕಳೆದು ಕಲ್ಪೆಟ್ಟ ಎಂಬ ಪಟ್ಟಣಕ್ಕೆ ಬಂದು ಒಂದು ಲಾಡ್ಜ್ ಬುಕ್ ಮಾಡಿ, ಊಟ ಮುಗಿಸಿ ನಿದ್ದೆಗೆ ಶರಣಾದೆವು. ಭಾನುವಾರ ಬೇಗನೆ ಎದ್ದು, ಸ್ನಾನ ಕರ್ಮಾದಿಗಳನ್ನ ಮುಗಿಸಿ ತಿಂಡಿ ತಿಂದು ಚಂಬರ ಪರ್ವತ ಚಾರಣಕ್ಕೆ ಅಣಿಯಾದೆವು.

ಚಂಬರ ಪರ್ವತ ಬಗ್ಗೆ : ಸಮುದ್ರ ಮಟ್ಟಕ್ಕಿಂತ ೬೯೮೦ ಅಡಿ ಎತ್ತರ ಇರುವ ಚಬ್ಮರ ಪರ್ವತ ವಯನಾಡಿನ ಎತ್ತರದ ಪರ್ವತ. ಇದು ಮೆಪ್ಪಾಡಿ ಹತ್ತಿರ ಇದೆ. ಚಂಬರ ತುದಿಯವರೆಗಿನ ಚಾರಣಕ್ಕೆ ಪೂರ್ತಿ ೧ ದಿನ ಬೇಕು. ಚಾರಣಕ್ಕೆ ಇಲ್ಲಿನ ಅರಣ್ಯಾಧಿಕಾರಿಗಳ ವಿಶೇಷ ಪರವಾನಿಗೆ ಬೇಕು. ಪರವಾನಿಗೆ ಫೀಜು ಮತ್ತು ಒಬ್ಬ ಮಾರ್ಗದರ್ಶಿ ಸೇರಿ ಒಬ್ಬರಿಗೆ ೧೦೦ ರೂಪಾಯಿ. ಸಂಪೂರ್ಣ ವಯನಾಡು ಜಿಲ್ಲೆಯ ಸುಂದರ ದೃಶ್ಯಾವಳಿ ಇಲ್ಲಿನ ವಿಶೇಷತೆ. ಪರವಾನಿಗೆ ಪಡೆದು ರಾತ್ರಿ ಸಮಯ ಪರ್ವತದ ತುದಿಯಲ್ಲಿ ತಂಗಬಹುದು.

ಬೆಳಿಗ್ಗೆ ೯ ಗಂಟೆ ವೇಳೆಗೆ ಚಾರಣ ಪ್ರಾರಂಭಿಸಿದೆವು, ಇಲ್ಲಿನ ಚಾರಣದ ಬಗ್ಗೆ ಸಂಪೂರ್ಣ ಮಾಹಿತಿ ಇರಲಿಲ್ಲ. ಎಷ್ಟು ದೂರ ಪ್ರಯಾಣ, ಎಷ್ಟು ತಾಸು ಚಾರಣ ಎಂದು ಕೇಳಿದ್ದಕ್ಕೆ ಅಧಿಕಾರಿಯೊಬ್ಬರು ಕೇವಲ ೩ ತಾಸು ಅಂದಿದ್ದರು. ನೀರಿನ ಬಾಟಲಿ ಬಿಟ್ಟು ಬೇರಿನ್ನೇನೂ ಒಯ್ಯಲಿಲ್ಲ. ಹೇಗಿದ್ದರೂ ಮಧ್ಯಾನ್ನ ಒಳಗಡೆ ತಿರುಗಿ ಬರುವ ವಿಚಾರ ನಮ್ಮದು. ಎಲ್ಲೆಲ್ಲೂ ಹಸಿರಿನ ಎಸ್ಟೇಟ್ ಗಳು ಕಂಗೋಳಿಸುತಿದ್ದವು. ಬಿಸಿಲಿನ ಝಳ ಕೂಡ ಕಡಿಮೆ ಇತ್ತು. ಮಧ್ಯೆ ಮಧ್ಯೆ ನೀರಿನ ಝರಿ ಇದ್ದರಿಂದ ಅನುಕೂಲವಾಗಿತ್ತು. ಕಾಲುಗಳು ಬೇಗ ಬೇಗನೆ ಹೆಜ್ಜೆ ಹಾಕುತಿದ್ದವು. ೧೨ ಗಂಟೆ ವೇಳೆಗೆ ನಾವು ಸುಮಾರು ೫ ಕಿ ಮೀ ದೂರ ಚಾರಣ ಗೈದಿದ್ದೆವು. ಆಗಲೇ ಬಿಸಿಲು ನೆತ್ತಿಗೇರಿತ್ತು, ಕೈಕಾಲು ಸುಸ್ತಾಗತೊಡಗಿತ್ತು. ನಮ್ಮ ಗೈಡ್ ನ ಕೇಳಿದ್ದಕ್ಕೆ ತುದಿವರೆಗೆ ತಲುಪಲು ಇನ್ನು ೪ ಗಂಟೆ ನಡೆಯಬೇಕೆಂದು ಹೇಳಿದ.

ತಿಂಡಿ ತಿನಿಸನ್ನು ಕೂಡ ಕೊಂಡೊಯ್ದಿರಲಿಲ್ಲ. ಹೊಟ್ಟೆ ಬೇರೆ ತಾಳ ಹಾಕಲು ಶುರು ಆಯಿತು. ಎಲ್ಲರಲ್ಲೂ ತುದಿಯವರೆಗೆ ಚಾರಣ ಮುಂದುವರೆಸುವ ಯಾವುದೇ ಆಸಕ್ತಿ ಇರಲಿಲ್ಲ. ನಮ್ಮ ಗೈಡ್ ಗೆ ಬೇರೆ ಮಲಯಾಳಂ ಬಿಟ್ಟು ಬೇರೆ ಯಾವುದೇ ಭಾಷೆಯ ಗಂಧ ಗಾಳಿ ತಿಳಿದಿರಲಿಲ್ಲ. ಅವನಿಗೆ ಹೇಗೋ ಅರ್ಥ ಮಾಡಿಸಿದೆವು, ಚಾರಣ ಮೊಟಕುಗೊಳಿಸಿ ಹಿಂತಿರುಗೋಣ ಅಂತ. ಆದರೆ ಅವನು ಏನೋ ಹೇಳುತ್ತಲಿದ್ದ, ನಮಗೆ ಅರ್ಥ ಆಗಿದ್ದು ಇಷ್ಟೇ, ಮುಂದೆ ಸನಿಹದಲ್ಲಿ ಏನೋ ಇದೆ ಅದನ್ನು ನೋಡಿ ಹಿಂತಿರುಗಬಹುದು ಎಂದು.

ನಿಜಕ್ಕೂ ನಾವು ಹಿಂತಿರುಗಿದ್ದಾರೆ ಅದ್ಭುತವಾದ ದೃಶ್ಯವನ್ನು ಕಳೆದುಕೊಳ್ಳುತ್ತಿದ್ದೆವು. ಪ್ರಕೃತಿಯ ಸೋಜಿಗ ' ಹೃದಯ ಆಕಾರದ ಕೆರೆ', ಅದೂ ಸುಮಾರು ೬೫೦೦ ಅಡಿ ಎತ್ತರದಲ್ಲಿ ..!! ಕೆರೆಯ ನೀರು ಯಾವತ್ತಿಗೂ ಬತ್ತುವುದಿಲ್ಲ, ಇದು ಇಲ್ಲಿನ ಕಾಡು ಪ್ರಾಣಿಗಳಿಗೆ ಆಸರೆ ಅಂತ ಆತ ವಿವರಿಸಿದ.

ಸುತ್ತಲಿನ ದೃಶ್ಯವಂತೂ ಮನೋಹರವಾಗಿತ್ತು. ಅಲ್ಲಿಗೆ ಸ್ವಲ್ಪ ಹೊತ್ತು ವಿರಮಿಸಿಕೊಂಡು, ಮತ್ತೊಂದು ದಿನ ಪೂರ್ಣ ತಯಾರಿಯೊಂದಿಗೆ ತುದಿಯ ತನಕ ಚಾರಣಕ್ಕೆ ಬರುವುದೆಂದು ತೀರ್ಮಾನಿಸಿ ನಾವು ಹಿಂತಿರುಗಿದೆವು. ಮೆಪ್ಪಡಿ ಯಲ್ಲಿ ಕೇರಳ ಪರೋಟ ತಿಂದು, ಕಂಥನಪರ ಜಲಪಾತದತ್ತ ತೆರಳಿದೆವು.

ಕಂಥನಪರ ಜಲಪಾತ : ಉಳಿದೆಲ್ಲ ಜಲಪಾತಕ್ಕೆ ಹೋಲಿಸಿದರೆ ಇದು ಚಿಕ್ಕದು. ಮುಖ್ಯ ರಸ್ತೆಗೆ ತುಂಬಾ ಹತ್ತಿರದಲ್ಲಿರುವ ಈ ಜಲಪಾತ ಸುತ್ತ ಮುತ್ತಲ ಕಾಡು, ಬಂಡೆಗಲ್ಲಿನಿಂದ ಸುಂದರವಾಗಿ ಕಾಣಿಸುತ್ತದೆ. ಸುಮಾರು ೩೦ ಅಡಿ ಎತ್ತರದ ಜಲಪಾತ ಒಂದು ಸುಂದರ ಪಿಕ್ನಿಕ್ ತಾಣ.

ಚಾರಣದಿಂದ ಬೆಂಡಾಗಿದ್ದ ನಮಗೆ ಈ ಜಲಪಾತ ಹೆಚ್ಚಿನ ಖುಷಿ ಕೊಟ್ಟಿತು, ನೀರಲ್ಲಿ ಈಜಾಡಿ, ನೀರಿನ ರಭಸಕ್ಕೆ ಮೈಯೊಡ್ಡಿ ನಿಂತು ಆಹ್ಲಾದಕರ ಅನುಭವ ಪಡೆದೆವು. ಜನ ಜಂಗುಳಿ ಕಡಿಮೆ ಇದ್ದರಿಂದ ನಮಗೆ ಹೆಚ್ಚಿನ ಸಮಯ ಯಾವುದೇ ಅಡಚಣೆ ಇಲ್ಲದೆ ನೀರಲ್ಲಿ ಕಾಲ ಕಳೆಯುವುದು ಸಾಧ್ಯವಾಯಿತು.

ಸಂಜೆ ೫ ಗಂಟೆಯ ವರೆಗೆ ಇಲ್ಲಿದ್ದು ನಂತರ ಸುಲ್ತಾನ್ ಭಾತೆರಿಗೆ ಬಂದು ಟೀ ಕುಡಿದು ಬೆಂಗಳೂರಿನತ್ತ ಪ್ರಯಾಣ ಬೆಳೆಸಿದೆವು. ಕೇರಳ ಕರ್ನಾಟಕ ಗಡಿಯನ್ನು ರಾತ್ರಿ ೮ ಗಂಟೆ ಇಂದ ಬೆಳಿಗಿನ ೬ ಗಂಟೆಯ ವರೆಗೆ ಕಾಡು ಪ್ರಾಣಿಗಳ ಸುರಕ್ಷತೆಗೋಸ್ಕರ ಮುಚ್ಚಲಾಗುತ್ತದೆ.

ಅಂತೂ ಎರಡು ದಿನ ಹೆಚ್ಚಿನ ಸಮಯ ನೀರಲ್ಲಿ ಕಳೆದು ಪೂರ್ತಿ ಫ್ರೆಶ್ ಆಗಿ, ಸುಂದರ ವಾರಾಂತ್ಯದ ನೆನಪುಗಳೊಂದಿಗೆ ಬೆಂಗಳೂರು ತಲುಪಿದಾಗ ಮಧ್ಯರಾತ್ರಿ. ಮರುದಿನದ ಕೆಲಸದ ಬಗ್ಗೆ ತಲೆ ಕೆಡಿಸಿಕೊಳ್ಳುತ್ತ ನಿದ್ರೆಗೆ ಶರಣಾದೆವು.

ಕಾವೇರಿ ನದಿಯ ತೀರದ ವಿಹಾರಧಾಮ - ಭೀಮೇಶ್ವರಿ

2010-02-10T05:58:00.001-08:00

ಅಂದು ಭಾನುವಾರ ೩೧ ಜನವರಿ, ಚುಮು ಚುಮು ಚಳಿಯಲ್ಲಿ ಬೇಗನೆ ಎದ್ದು ಮಹಾತ್ಮ ಗಾಂಧಿ ರಸ್ತೆಯಲ್ಲಿರುವ ನಮ್ಮ ಆಫೀಸ್ ಕಡೆಗೆ ದೌಡಾಯಿಸಿದೆ. ಮೊದಲೇ ನಿಗದಿಯಾದಂತೆ ಎಲ್ಲ ಸಹೋದ್ಯೋಗಿಗಳು ಅಲ್ಲಿ ಬಂದು ಸೇರಿದ್ದರು. ೭.೪೦ಕ್ಕೆ ಸರಿಯಾಗಿ ೫೫ ಜನರನ್ನು ತುಂಬಿಕೊಂಡ ನಮ್ಮ ಬಸ್ಸು ಮೈಸೂರು ಕಡೆಯತ್ತ ಹೊರಟಿತು. ಎಲ್ಲರ ಮುಖದಲ್ಲಿ ಉತ್ಸಾಹ ತುಂಬಿ ತುಳುಕುತಿತ್ತು. ಆಫೀಸ್ ನಿಂದ ಮೊದಲ ಬಾರಿಗೆ ಪ್ರವಾಸಕ್ಕೆ ಹೊರಟಿದ್ದೆವು. ಮುಂಜಾನೆಯ ಶುಭಾಶಯ ವಿನಿಮಯ ನಂತರ ಲೋಕಾಭಿರಾಮ ಮಾತು ಹರಟೆ ಜೊತೆಗೆ ನಮ್ಮ ಪ್ರಯಾಣ ಸಾಗಿತು.

ಸರಿಯಾಗಿ ೯ ಗಂಟೆಗೆ ಕಾಮತ್ ಲೋಕರುಚಿ ಗೆ ಧಾಳಿ ಇಟ್ಟೆವು. ತಿಂಡಿಗೆ ಬಫೆ ವ್ಯವಸ್ಥೆ..! ಅಲ್ಲಿದ್ದಿದ್ದು ಕೊಟ್ಟೆ ಇಡ್ಲಿ, ವಡ, ಉಪ್ಪಿಟ್ಟು, ಕೆಸರಿಭಾತ್, ಅಕ್ಕಿ ರೊಟ್ಟಿ, ಹೋಳಿಗೆ, ತರತರದ ದೋಸೆ, ಪೊಂಗಲ್, ಬಾಳೆಹಣ್ಣು, ಪಪ್ಪಾಳೆ ಹಣ್ಣು ಹಾಗೂ ದ್ರಾಕ್ಷಿ ಹಣ್ಣಿನ ರಸ, ಕಾಫೀ ಮತ್ತು ಟೀ ಅಷ್ಟೇ...!! ಯಾವುದೇ ಅವಸರವಿಲ್ಲದೇ ಎಲ್ಲವನ್ನು ಮತ್ತೆ ಮತ್ತೆ ಹಾಕಿಸಿಕೊಂಡು ಭರ್ಜರಿ ಬ್ಯಾಟ್ಟಿಂಗ್ ಮಾಡಿದೆವು. ಬೆಳಿಗ್ಗೆ ಬೇಗನೆ ಎದ್ದಿದ್ದರಿಂದ ಚನ್ನಾಗಿ ಹಸಿವು ಕೂಡ ಆಗಿತ್ತು. ಈಗ ಎಲ್ಲರ ಮುಖದಲ್ಲಿ ಡಬಲ್ ಉತ್ಸಾಹ...!

ಅಲ್ಲಿಂದ ಮುಂದೆ ಹಾಡು, ಅಂತಾಕ್ಷರಿ, ನೃತ್ಯ ಕೇಕೆ, ಮೋಜಿನೊಂದಿಗೆ ನಮ್ಮ ಪ್ರಯಾಣ ಮುಂದುವರೆಯಿತು. ೧೦.೩೦ಕ್ಕೆ ಕಾವೇರಿ ನದಿಯ ತೀರದಲ್ಲಿರುವ ಭೀಮೆಶ್ವರಿ ಎಂಬ ನಿಸರ್ಗ ಧಾಮಕ್ಕೆ ತಲುಪಿದೆವು. ಬೆಂಗಳೂರಿಗೆ ತುಸು ದೂರದಲ್ಲಿರುವ ಭೀಮೆಶ್ವರಿ ವಾರಾಂತ್ಯ ಕಳೆಯಲು ಸೂಕ್ತವಾದ ಜಾಗ. ಜಂಗಲ್ ಲಾಡ್ಜಸ್ & ರಿಸಾರ್ಟ್ ನವರು ನಡೆಸುತ್ತಿರುವ ಈ ರೆಸೊರ್ಟಿನಲ್ಲಿ ಉಳಿದಂತೆ ಎಲ್ಲ ಅನುಕೂಲವೂ ಇದೆ. ಅವರವರ ಅಗತ್ಯಕ್ಕೆ, ಜೇಬಿನ ವೆಚ್ಚಕ್ಕೆ ತಕ್ಕಂತೆ ಐಷಾರಾಮಿ ಅನುಕೂಲಗಳನ್ನು ಪಡೆಯಬಹುದು.

ದಟ್ಟ ಕಾಡು, ನದಿ ತೀರ, ಸುಂದರ ಸ್ವಚ್ಛ ವಾತಾವರಣ. ಸ್ವಾಗತ ಪಾನೀಯ ಸೇವನೆ ನಂತರ ಸುತ್ತ ಮುತ್ತ ಎಲ್ಲ ಕಡೆ ಓಡಾಡಿದೆವು.

ಸ್ವಲ್ಪ ದಣಿವಾರಿಸಿಕೊಂಡು ಅಲ್ಲಿಯೇ ಹತ್ತಿರ ಇದ್ದ ವೀಕ್ಷಣಾ ಗೋಪುರಕ್ಕೆ ಚಾರಣ ಹೊರಟೆವು. ಬಿಸಿಲಿನ ಧಗೆ ಹೆಚ್ಚಿದ್ದರೂ ಎಲ್ಲರೂ ಉತ್ಸಾಹದಿಂದಲೇ ಹೆಜ್ಜೆ ಹಾಕುತಿದ್ದರು. ೧೦ ರಿಂದ ೧೨ ಜನರು ಚಾರಣವನ್ನು ಅರ್ಧಕ್ಕೆ ಮುಗಿಸಿದರು. ಇನ್ನೂ ಕೆಲವರು ದಾರಿ ತಪ್ಪಿಸಿಕೊಂಡು ಹಾಗೂ ಹೀಗೂ ಸ್ವಸ್ಥಾನ ತಲುಪಿಕೊಂಡರು. ಗೋಪುರ ತಲುಪಿದ ನಮಗೆ ನಿರಾಸೆಯಾಗಲಿಲ್ಲ.

ವೀಕ್ಷಣಾ ಗೋಪುರದಿಂದ ಕಾವೇರಿ ಕಣಿವೆ ದೃಶ್ಯ ಅದ್ಭುತವಾಗಿತ್ತು. ಅಂಕು ಡೊಂಕಾಗಿ ಹರಿಯುವ ನದಿ, ಛಳಿಗಾಲಕ್ಕೆ ಮಾಗಿ ಹಣ್ಣೆಲೆ ಉದುರುತಿದ್ದ ಕಾಡಿನ ಸುಂದರ ದೃಶ್ಯ, ತಣ್ಣಗೆ ಬೀಸುತಿದ್ದ ಗಾಳಿ ನಮ್ಮ ಆಯಾಸವನ್ನು ನೀಗಿಸಿತ್ತು.

ಅದೃಷ್ಟ ಇದ್ದರೆ ಕಾಡಾನೆಗಳ ವೀಕ್ಷಣೆ ಸಾಧ್ಯ. ನಮ್ಮ ಗುಂಪಿಗೆ ಯಾವುದೇ ಕಾಡು ಪ್ರಾಣಿ ಎದುರಾಗಲಿಲ್ಲ..!

ಹಸಿದಿದ್ದ ಎಲ್ಲರೂ ಮುಂದಿನ ಊಟವನ್ನು ನೆನೆಸಿಕೊಂಡು ವೇಗವಾಗಿಯೇ ನಡೆದು ರಿಸಾರ್ಟ್ ತಲುಪಿಕೊಂಡೆವು. ಪರವಾಗಿಲ್ಲ ಅನ್ನಬಹುದಾದ ಊಟ ಮುಗಿಸಿ ಮರದ ನೆರಳಿನಲ್ಲಿ ವಿರಮಿಸಿದೆವು. ಹರಟೆ, ವಿಶ್ರಾಂತಿ, ಜೋಕಾಲಿ, ಹಗ್ಗದ ವಿವಿಧ ಆಟ, ನದಿಯಲ್ಲಿ ಸ್ನಾನ, ನೀರಲ್ಲಿ ಆಟ ಅಂತ ಅವರವರ ಅಭಿರುಚಿಗೆ ತಕ್ಕಂತೆ ಸಮಯ ಕಳೆದೆವು.

ಅಲ್ಲಿಯವರೆಗೂ ನಮಗೆ ನದಿಯಲ್ಲಿನ ಅಪಾಯದ ಅರಿವು ಆಗಿರಲಿಲ್ಲ. ಅಲ್ಲಿನ ಸಹಾಯಕನೊಬ್ಬ ಬಂದು ನದಿಯಲ್ಲಿ ಸ್ನಾನ ಮಾಡುತ್ತಿದ್ದವರನ್ನು ಎಚ್ಚರಿಸಿದಾಗ ಅಪಾಯದ ಅರಿವಾದದ್ದು. ಬಂಡೆಗಳ ಮೇಲೆ ಮಲಗಿದ್ದ ಬೃಹತ್ ಮೊಸಳೆಗಳನ್ನು ನೋಡಿದಾಗ ನೀರಲ್ಲಿ ಇದ್ದವರು ಒಂದೇ ಉಸಿರಿಗೆ ದಡವನ್ನು ಸೇರಿದರು. ಬರಿಗಣ್ಣಿಗೆ ಬಂಡೆಯಂತೆ ಕಾಣುತಿದ್ದ ಮೊಸಳೆಗಳು ಸೂಕ್ಷ್ಮವಾಗಿ ನೋಡಿದಾಗ ಮಾತ್ರ ಗೋಚರಿಸುತಿದ್ದವು. ಇಂತಹ ನೂರಾರು ಮೊಸಳೆಗಳು ಅಲ್ಲಿರುವುದು ಗೊತ್ತಾಯಿತು. ನಂತರ ಯಾರೂ ನದಿಯ ಹತ್ತಿರ ಸುಳಿಯಲಿಲ್ಲ.

ಕಬಡ್ಡಿ, ಹಗ್ಗ ಜಗ್ಗಾಟ, ಕುಂಟೆಬಿಲ್ಲೆ ಮೊದಲಾದ ಗ್ರಾಮೀಣ ಆಟಗಳನ್ನು ಆಡುತ್ತಾ ನಮ್ಮನ್ನು ಮರೆತಿದ್ದೆವು. ಗುಂಪಿನಲ್ಲಿ ಎಲ್ಲರೂ ಯಾವುದೇ ಬೇದಭಾವ ಇಲ್ಲದೇಒಂದಾಗಿ ಹುರುಪಿನಿಂದಲೇ ಎಲ್ಲ ಆಟವನ್ನು ಆಡಿದರು. ದೇಸೀಯ ಆಟಗಳ ಗಮ್ಮತ್ತೆ ಬೇರೆ..!

ನಂತರ ತೆಪ್ಪದಲ್ಲಿ ನೀರಿನ ಮೇಲೆ ತೇಲಿದೆವು. ಮೊದಲು ಮೊಸಳೆಗಳ ಬಗ್ಗೆ ಭಯ ಇತ್ತಾದರೂ, ಅವುಗಳಿಗೆ ನಮಗಿಂತ ಭಯ, ಮನುಷ್ಯರೇ ಹೆಚ್ಚು ಅಪಾಯ ಎಂದುಸಹಾಯಕ ತಿಳಿಸಿದ್ದರಿಂದ ಧೈರ್ಯವಾಗಿ ನೀರಿನ ಮಜ ಅನುಭವಿಸಿದೆವು. ಜೀವನದಲ್ಲಿ ಸ್ವಾತಂತ್ರವಾಗಿದ್ದ ಮೊಸಳೆಯನ್ನು ಇಷ್ಟು ಹತ್ತಿರದಿಂದ ನೋಡಿದ್ದು ನಾನು ಇದೆ ಮೊದಲ ಸಲ.

ತೆಪ್ಪದಲ್ಲಿ ಹುಟ್ಟುಹಾಕುವನಿಗೆ ಪ್ರತ್ಯೇಕ ಭಕ್ಷೀಸು ಕೊಟ್ಟು ಮೊಸಳೆ ಹೆಚ್ಚು ಇರುವ ಜಾಗಕ್ಕೆ ಹೋಗಿದ್ದೆ. ಸುಮಾರು ೧೦-೧೫ ಮೊಸಳೆಗಳು ಒಟ್ಟಿಗೆ ಇದ್ದವು. ನಮ್ಮನ್ನು ಕಂಡ ಕೂಡಲೇ ನೀರಿಗೆ ಇಳಿಯುತಿದ್ದವು. ಅವುಗಳ ಹಿಸ್‌ಸ್ಸ್ ಅನ್ನುವ ಶಬ್ದ ಕೂಡ ಕೇಳುತಿತ್ತು .ಅದೊಂದು ಅದ್ಭುತ ಅನುಭವ...!

ಇಲ್ಲಿನ ನದಿಯಲ್ಲಿ ಮಹಾಶೀರ್ ಅನ್ನುವ ಜಾತಿಯ ಮೀನು ಹೇರಳ. ಈ ಮೀನುಗಳು ೧೫ ಕೇಜಿ ವರೆಗೂ ಬೆಳೆಯುತ್ತವೆ. ಈ ಮೀನುಗಳನ್ನು ಹಿಡಿಯಲೆಂದೇ ಪ್ರವಾಸಿಗರು, ಹವ್ಯಾಸಿ ಮೀನುಗಾರರು ಇಲ್ಲಿಗೆ ಬರುತ್ತಾರೆ. ಹೆಚ್ಚು ತೂಕದ ದೊಡ್ಡ ಮೀನನ್ನು ಹಿಡಿದು, ದಾಖಲಿಸಿ ಪುನಃ ನೀರಿಗೆ ಬಿಡಲಾಗುತ್ತದೆ.

ನನಗೂ ಒಂದು ಸಣ್ಣ ಮೀನು ಸಿಕ್ಕಿತು, ಆದರೆ ಅದು ಮಹಾಶೀರ್ ಆಗಿರಲಿಲ್ಲ ...! ಹಾಗಾಗಿ ಅದನ್ನು ಮಾರ್ಗದರ್ಶಕ ನೀರಿಗೆ ಇಳಿಸುವುದನ್ನು ಬಿಟ್ಟು ಜೇಬಿಗೆ ಇಳಿಸಿದ.

ಸೂರ್ಯಾಸ್ತ ಸಮಯದಲ್ಲಿ ಹಿತವಾದ ಕಾಫೀ ಕುಡಿದು, ಸುಂದರ ದೃಶ್ಯವನ್ನು ಕಣ್ತುಂಬಿಕೊಂಡೆವು. ನೆನಪಿನಲ್ಲಿ ಉಳಿಯುವಂತ ಸುಂದರ ದಿನವನ್ನು ಕಳೆದು, ಹಾಡು ಕೇಕೆ ಹಾಕುತ್ತಾ ಬಸ್ಸಿನಲ್ಲಿ ಬೆಂಗಳೂರಿನತ್ತ ಹೊರಟೆವು.

ಸುಂದರ ಸಾಗರ

2009-12-29T04:19:00.001-08:00

ಅಂದು ಶುಕ್ರವಾರ ದಿನಾಂಕ ೧೧ ಡಿಸೆಂಬರ್, ನಮ್ಮ ಸಹೋದ್ಯೋಗಿ ಮನೋಜನ ವಿವಾಹ ನಿಮಿತ್ತ ನಾವು ಶಿವಮೊಗ್ಗಕ್ಕೆ ಬಂದಿಳಿದೆವು. ಸಂಭ್ರಮ, ಸಡಗರದ ಮದುವೆಯ ಕಾರ್ಯಕ್ರಮ ಮುಗಿದ ಮೇಲೆ ಸಾಗರದ ಕಡೆ ನಮ್ಮ ಪ್ರಯಾಣ ಬೆಳೆಸಿದೆವು.

ಸಾಗರದ ನಮ್ಮ ಮನೆಯಲ್ಲಿ ಕಾಫೀ ಕುಡಿದು, ಹತ್ತಿರದಲ್ಲೇ ಇರುವ ಕೆಳದಿ ದೇವಸ್ಥಾನ ದರ್ಶನಕ್ಕೆ ಹೋದೆವು. ಸುಮಾರು 500 ವರ್ಷ ಹಳೆಯ ಕಲ್ಲಿನ ಸುಂದರ ದೇವಾಲಯ. "ಕೆಳದಿ" ಇದು ಕೆಳದಿ ಅರಸರ ರಾಜಧಾನಿ. ಶಿವಪ್ಪ ನಾಯಕ ಮತ್ತು ರಾಣಿ ಚೆನ್ನಮ್ಮ ಕೆಳದಿ ಸಾಮ್ರಾಜ್ಯವನ್ನು ಆಳಿದರು. ಕೆಳದಿ ದೇವಾಲಯ ಮುಂಭಾಗ ಮರದ ಬೃಹತ್ ಕಂಬ, ನಾಡಹೆಂಚಿನ ಅರಮನೆಯಂತಿದೆ.

ಸುಂದರ ಹುಲ್ಲು ಹಾಸಿನ ಹೂದೋಟವನ್ನು ದಾಟಿ ಒಳಗೆ ಬಂದರೆ ಕಲ್ಲಿನ ಕೆತ್ತನೆಯ ದೇವಾಲಯ ದೃಶ್ಯ ಲಭ್ಯ.

ರಾಮೇಶ್ವರ, ವೀರಭದ್ರ, ಪಾರ್ವತಿ ದೇವಾಲಯ ಒಳಗೊಂಡ ಕೆಳದಿ ಸಂಕೀರ್ಣವೂ ಹೊಯ್ಸಳ ಮತ್ತು ದ್ರಾವಿಡ ಶೈಲಿಯಲ್ಲಿದೆ. ಪಾರ್ವತಿ ದೇವಸ್ಥಾನದ ಮೇಲ್ಛಾವಣಿಯೂ ಮರದ ಅದ್ಭುತ ಕೆತ್ತನೆಯಿಂದ ಒಳಗೊಂಡಿದೆ.

ಹಾಗೆಯೇ ವೀರಭದ್ರ ದೇವಸ್ಥಾನವು ಕಲ್ಲಿನ ಕೆತ್ತನೆಯಿಂದ ಮನಸೂರೆಗೊಳಿಸುತ್ತದೆ. ಇಲ್ಲಿನ ಇನ್ನೊಂದು ವಿಶೇಷ ಎಂದರೆ, ಒಂದೇ ಕಲ್ಲಿನಲ್ಲಿ ಕೆತ್ತಿದ ಸಂಗೀತ ಕಂಬ. ಈ ಕಂಬವನ್ನು ಮೇಲಿನಿಂದ ಕೆಲವರೆಗೆ ತಟ್ಟಿದಾಗ ಸಪ್ತಸ್ವರ ಬರುತ್ತದೆ. ಪ್ರವಾಸಿಗರು ಕಲ್ಲಿನಲ್ಲಿ ಕುಟ್ಟಿ ಕುಟ್ಟಿ ಈ ಕಂಬ ಶಿಥಿಲವಾಗಿದೆ.

ಸುಮಾರು ೧೦೦ ಎಕರೆ ವಿಸ್ತೀರ್ಣದ ಕೆಳದಿ ಕೆರೆಯು ರಾಣಿ ಚೆನ್ನಮ್ಮಾಜಿ ಕಾಲದಲ್ಲಿ ಕಟ್ಟಲ್ಪಟ್ಟಿದ್ದು. ಮಾಲಿನ್ಯದಿಂದ ಮುಕ್ತವಾಗಿರುವ ಸುಂದರ ಕೆರೆಯ ಪರಿಸರ, ಮನಮೋಹಕ ಸೂರ್ಯಾಸ್ತ ದೃಶ್ಯ, ಸಂಜೆಯ ಸೊಬಗನ್ನು ಇಮ್ಮುಡಿಗೊಳಿಸುತ್ತದೆ.

ಇಕ್ಕೇರಿಯ ಅಘೊರೇಶ್ವರ ದೇವಸ್ಥಾನ :- ಸಾಗರದಿಂದ ೩ ಕೀ ಮೀ ದೂರದಲ್ಲಿರುವ ಇಕ್ಕೇರಿ ಕೇಳದಿ ನಾಯಕರ ರಾಜಧಾನಿ ಆಗಿತ್ತು. ಮಣ್ಣು ಮರದಿಂದ ಕಟ್ಟಲ್ಪಟ್ಟ ಅರಮನೆಯಲ್ಲಿ ಕೆಳದಿ ರಾಜರು ರಾಜ್ಯಭಾರ ಮಾಡಿದರು. ಟಿಪ್ಪು ಸುಲ್ತಾನ್ ನಿಂದ ಆಕ್ರಮಣಕ್ಕೆ ಒಳಗಾದ ಮೇಲೆ ಇಕ್ಕೇರಿಯ ಅರಮನೆ ನಾಶವಾಯಿತು. ಈಗ ಉಳಿದಿರುವುದು ಕಲ್ಲಿನ ಕೆತ್ತನೆಯ ಅಘೊರೇಶ್ವರ ದೇವಾಲಯ.

ಇದು ಕರ್ನಾಟಕದಲ್ಲೇ ಅತೀ ಎತ್ತರ ಮೇಲ್ಛಾವಣಿಯ ಶಿವನ ದೇವಸ್ಥಾನ. ಇಲ್ಲಿನ ಶಿಲ್ಪಕಲೆಯು ಹೊಯ್ಸಳ ಮತ್ತು ವಿಜಯನಗರ ಮಾದರಿಯಲ್ಲಿದೆ. ಒಂದೇ ಕಲ್ಲಿನ ಬೃಹತ್ ನಂದಿ ವಿಗ್ರಹ ಅತೀ ಸುಂದರವಾಗಿದೆ.

ದ್ವಾರಪಾಲಕರು, ಕಂಬದ ಕೆತ್ತನೆ, ವಿಗ್ರಹ ಎಲ್ಲವೂ ಮನಮೋಹಕ. ಎತ್ತರದ ೧೬ ಕೈಗಳ ಶಿವನ ವಿಗ್ರಹ ಇಲ್ಲಿ ಇತ್ತು ಹಾಗೂ ಬಿಜಾಪುರ ಸುಲ್ತಾನರ ಆಕ್ರಮಣದಿಂದ ಆ ಸುಂದರ ವಿಗ್ರಹ ನಾಶವಾಗಿದೆ ಎಂದು ಅರ್ಚಕರು ವಿವರಿಸಿದರು.

ದೇವಸ್ಥಾನದ ಆವರಣದಲ್ಲಿ ಸುಂದರ ಪರಿಸರ, ಸ್ವಚ್ಛತೆಯನ್ನು ಕಾಯ್ದುಕೊಳ್ಳಲಾಗಿದೆ.

ಹೊಳೆಬಾಗಿಲು :- ಸಾಗರದಿಂದ ೩೦ ಕೀ. ಮೀ ದೂರದ ಶರಾವತಿ ಹಿನ್ನೀರಿನ ಪ್ರದೇಶ. ಸಾಗರ ಮತ್ತು ತುಮರಿ ಪ್ರಾಂತ್ಯಕ್ಕೆ ಹೊಳೆಬಾಗಿಲು ಸಂಪರ್ಕ ಕೊಂಡಿ, ಪ್ರವಾಸಿ ತಾಣ.

ಒಂದು ದಡದಿಂದ ಇನ್ನೊಂದು ದಡಕ್ಕೆ ಪ್ರಯಾಣಿಕರನ್ನು, ವಾಹನಗಳನ್ನು ಸಾಗಿಸಲು ಸರಕಾರ ಲಾಂಚ್ನ ವ್ಯವಸ್ಥೆ ಮಾಡಿದೆ. ಒಂದು ಸಲಕ್ಕೆ ಒಂದು ಬಸ್ಸು, ೪-೫ ಕಾರು, ಸುಮಾರು ೧೦೦ ಜನರನ್ನು ಇದು ಸಾಗಿಸುತ್ತದೆ. ೩ ಕೀ. ಮೀ ನೀರಲ್ಲಿ ಲಾಂಚಿನ ಮೇಲೆ ಪ್ರಯಾಣಿಸುವುದು ಖುಷಿಯ ಅನುಭವ.

ಆಚೆಯ ದಡದಿಂದ ಸುಮಾರು ೩ ಕೀ. ಮೀ ದೂರದಲ್ಲಿ ಪ್ರಸಿದ್ಧ ಸಿಗಂದುರೇಶ್ವರಿ ದೇವಾಲಯ ಇದೆ.
ಕಲುಷಿತ ಬೆಂಗಳೂರಿಂದ ದೂರ, ಸುಂದರ ಎರಡು ದಿನಗಳನ್ನು ಕಳೆದ ಖುಷಿ ಸಹೋದ್ಯೋಗಿಗಳಿಗೆ.

ಮತ್ತೊಮ್ಮೆ ಮಂಚನಬೆಲೆಗೆ

2009-09-13T03:17:00.000-07:00

ನಾವು ಬೈಕ್ ನಲ್ಲಿ ಪ್ರವಾಸ ಹೋಗದೆ ವರ್ಷಗಳೇ ಕಳೆದಿತ್ತು. ಹಾಗಾಗಿ ಈ ವಾರ ಎಲ್ಲಿಗಾದರೂ ಸರಿ ಬೈಕ್ ನಲ್ಲೆ ಹೋಗುವುದೆಂದು ತೀರ್ಮಾನಿಸಿ ಬೆಂಗಳೂರಿಗೆ ಹತ್ತಿರದ ಮಂಚನಬೆಲೆ ಡ್ಯಾಮ್ ಕಡೆಗೆ ಹೊರಟೆವು. ಭಾನುವಾರ (೨೧ ನವೆಂಬರ್ ೨೦೦೯) ಅದೂ ಇದು ಸಣ್ಣ ಪುಟ್ಟ ಕೆಲಸ ಮುಗಿಸಿ ಮೈಸೂರ್ ರೋಡ್ ಸೇರಿಕೊಂಡಾಗ ೧೦.೩೦ ಆಗಿತ್ತು.

ಅಷ್ಟೇನೂ ಟ್ರಾಫಿಕ್ ಇಲ್ಲದ, ಸೂರ್ಯ ಇನ್ನೂ ಕಣ್ಣು ಬಿಡಲೋ ಬೇಡವೋ ಅನ್ನುವಂತಿದ್ದ ವಾತಾವರಣ, ಸ್ವಲ್ಪ ಹುರುಪಿನಿಂದಲೇ ಆಕ್ಸೀಲರೆಟರ್ ಸ್ವಲ್ಪ ಜೋರಾಗಿಯೇ ತಿರುವಿದೆ..ಇನ್ನೇನು ಕೆಂಗೇರಿ ಬಂದೇ ಬಿಟ್ಟಿತು ಅನ್ನುವಷ್ಟರಲ್ಲಿ "ಮಾಮ" ಕೈ ಅಡ್ಡ ತೋರಿಸಿದ...!! ಅಯ್ಯಪ್ಪ ಇದೇನು "ಮಾವಂದಿರು" ಇಷ್ಟು ಬೆಳಗಿನ ಹೊತ್ತಲ್ಲಿ ಅಂದುಕೊಂಡು ಬೈಕ್ ನ ಸೈಡ್ ಗೆ ನಿಲ್ಲಿಸಿದೆ. ನನ್ನ ಹತ್ತಿರ ಎಲ್ಲ ರೆಕಾರ್ಡು ಸರಿಯಾಗಿ ಇದ್ದರಿಂದ ಧೈರ್ಯವಾಗಿ ಮುನ್ನುಗ್ಗಿ ಅವರ ಮುಂದೆ ತೋರಿಸಿದೆ..ಅದರೂ ಮಾಮ ೩೦೦ ರೂಪಾಯಿ ದಂಡ ಕಟ್ಟು ಅಂಥ ಹೇಳಿದರು...ನೋಡಿದರೆ ನಾನು ಓವರ್ ಸ್ಪೀಡ್ ನಲ್ಲಿ ಗಾಡಿ ಓಡಿಸ್ತ ಇದ್ದೆ. ಆರ್ವೀ ಕಾಲೇಜ್ ನಿಂದ ಕೆಂಗೇರಿ ವರೆಗೆ ವೇಗ ಮಿತಿ ೬೦ ಕಿಮೀ. ನಾನು ೬೨ ಕಿಮೀ ವೇಗದಲ್ಲಿದ್ದೆ..!! ತೆಪ್ಪಗೆ ದಂಡ ಕಟ್ಟಿ ಮನಸ್ಸಿನಲ್ಲಿಯೇ ಬೈದು ಕೊಂಡು ಪ್ರಯಾಣ ಮುಂದುವರೆಸಿದೆ.

ಮಂಚನಬೆಲೆಯ ಸುಂದರ ಪರಿಸರ ಸಹಜವಾಗಿಯೇ ಇಷ್ಟ ಆಯಿತು. ಕಳೆದ ಬಾರಿ ಇದ್ದಕ್ಕೂ ಜಾಸ್ತಿ ಪ್ರಮಾಣ ನೀರಿತ್ತು. ಇನ್ನೊಂದು ಮುಖ್ಯ ಅಂಶ ಎಂದರೆ ಸುತ್ತಲಿನ ಪರಿಸರ ಪ್ಲಾಸ್ಟಿಕ್ ಮುಕ್ತವಾಗಿತ್ತು...! ಪಕ್ಕದಲ್ಲಿಯೇ ಮಿಲಿಟರೀ ಕ್ಯಾಂಪ್ ಇರುವುದರಿಂದ ಹೆಚ್ಚಿನ ಗಲಾಟೆ ಇರಲಿಲ್ಲ. ಬೈಕ್ ನಿಲ್ಲಿಸಿ ಸುತ್ತಲೂ ಓಡಾಡಿದೆವು. ಚಿಕ್ಕದಾಗಿ ಚೊಕ್ಕವಾಗಿರುವ ಮಂಚಾನಬೆಲೆ ಪರಿಸರ ವಾರಾಂತ್ಯ ಕಳೆಯಲಿಕ್ಕೆ ಅತ್ಯಂತ ಸೂಕ್ತ.
ಮಂಚನಬೆಲೆ ಇಂದ ಹೊರಟು ರಾಮನಗರ ತಲುಪಿ ಅಲ್ಲಿಂದ ಮುಂದೆ ಮೈಸೂರು ಹೆದ್ದಾರಿ ಹಿಡಿದೆವು. ಕಾಮತ್ ಲೋಕರುಚಿ ನಲ್ಲಿ ಊಟಕ್ಕೆಂದು ನಿಲ್ಲಿಸಿದೆವು. ಕರಾವಳಿ ಮಾದರಿಯ ಅಕ್ಕಿರೊಟ್ಟಿ, ಮತ್ತು ಜೋಳದ ರೊಟ್ಟಿ, ಪತ್ರೊಡೇ, ರಾಗಿಮುದ್ದೆ ಊಟ ಗಡದ್ದಾಗಿ ಹೊಡೆದು, ಸಣ್ಣದಾಗಿ ಬೀಡಾ ಜಗಿದು ಸ್ವಲ್ಪ ಹೊತ್ತು ವಿರಮಿಸಿದೆವು. ಅಲ್ಲಿಂದ ಮುಂದೆ ೧೦ ಕೀ ಮೀ ಹೋದರೆ ಕಣ್ವ ಜಲಾಶಯ ಸಿಗುತ್ತದೆ. ಸ್ವಲ್ಪ ಮಟ್ಟಿಗೆ ಕಚ್ಚ ರಸ್ತೆಯಾದರೂ ಬೈಕ್ ಓಡಿಸಲು ಅಡ್ಡಿಯಿಲ್ಲ.

ಕಣ್ವ ಜಲಾಶಯದ ಬಗ್ಗೆ :ಕಣ್ವ ನದಿಗೆ ಅಡ್ಡಲಾಗಿ ೧೯೪೬ ರಲ್ಲಿ ಕಟ್ಟಲಾಯಿತು. ನೀರಾವರಿ ಮತ್ತು ಮೀನುಗಾರಿಕೆ, ತರಬೇತಿ ಇದರ ಮುಖ್ಯ ಉದ್ದೇಶ. ಇದು ಸುಮಾರು ೭೭೫ ಹೆಕ್ಟೇರು ಪ್ರದೇಶವನ್ನು ಆಕ್ರಮಿಸಿದೆ. ಕಣ್ವ ಋಷಿ ಈ ಪ್ರದೇಶದಲ್ಲಿ ತಪ್ಪಸ್ಸು ಮಾಡಿದ್ದರಿಂದ ಕಣ್ವ ನದಿ ಅಂತ ಹೆಸರು ಬಂತು. ಕಣ್ವ ನದಿಯು ಕಾವೇರಿ ನದಿಯ ಉಪನದಿ. ಸುಂದರ ಪ್ರವಾಸಿ ತಾಣ ಹಾಗೂ ಪಕ್ಷಿ ವೀಕ್ಷಕರ ತಾಣ.

ಸಂಜೆಯ ತಂಪಾದ ಗಾಳಿ, ಜನ ದಟ್ಟನೆ ಇಲ್ಲದ ಸುಂದರ ಕಣ್ವ ಜಲಾಶಯ, ನಮ್ಮಲ್ಲಿ ಹಳೆಯ ನೆನಪೆಲ್ಲವನ್ನು ಮತ್ತೆ ಮರಳುವಂತೆ ಮಾಡಿತ್ತು. ಮೊಗೆದಷ್ಟೂ ಮಾತನಾಡುವಷ್ಟು ವಿಷಯಗಳು ನಮ್ಮಲ್ಲಿ ಸುಳಿದಾಡಿದವು. ಎಷ್ಟೋ ಹೊತ್ತು ನಮ್ಮೆಲ್ಲ ಜಂಜಾಟವನ್ನು ಮರೆತು, ಹರಟೆ ನಗುವಿನಲ್ಲಿ ಮುಳುಗಿದ್ದೆವು.

ಕುದುರೆಮುಖ ಚಾರಣ

2009-09-09T23:29:00.000-07:00

ನಮ್ಮ ಬಹುದಿನಗಳ ಕುದುರೆಮುಖ ಚಾರಣ ಕನಸಿಗೆ ಚಾಲನೆ ಕೊಟ್ಟಿದ್ದು ಆನಂದ. ಹೆಂಡತಿ ಮತ್ತೆ ಮಗನನ್ನು ಊರಿಗೆ ಕಳುಹಿಸಿದ ತಕ್ಷಣ ನಮಗೆಲ್ಲಾ ಫೋನ್ ಮಾಡಿ, ಚಾರಣಕ್ಕೆ ಹೋಗೋಣ ಅಂತ ಹುರುಪಿಸಿದ. ಅನುಭವಿ ಕಿರಣ್ ಕುದುರೆಮುಖ ಚಾರಣದ ರೂಪು ರೇಷೆ ತಯಾರಿಸಿ, ಅಗತ್ಯ ಸಿದ್ಧತೆ ಮಾಡಿಕೊಂಡ. ಆಗಸ್ಟ್ ೨೮, ಶುಕ್ರವಾರ ರಾತ್ರಿ, ಟಾಟಾ ಸುಮೋದಲ್ಲಿ ಹಾಸ್ಯ, ಮಾತು, ಚೇಷ್ಟೆಯೊಂದಿಗೆ ನಮ್ಮ ಪ್ರಯಾಣ ಶುರುವಾಯಿತು.

ಅತ್ಯಂತ ಅನುಭವಿ ಡ್ರೈವರ್ 'ಶಫಿ' ಪ್ರಯಾಣದ ಆಯಾಸ ತಿಳಿಯದಂತೆ ನಮ್ಮನ್ನ ಶನಿವಾರ ಬೆಳಿಗ್ಗೆ ೬ ಗಂಟೆಗೆ "ಶ್ರಿಂಗೇರಿ" ಗೆ ಮುಟ್ಟಿಸಿದರು. ಅಗಾಗ ಬರುತ್ತಿದ್ದ ಮಳೆ, ಸಣ್ಣಗೆ ಚಳಿಗೆ, ಹಿತವಾದ ಕಾಫೀ ಬೆಚ್ಚನೆಯ ಅನುಭವ ನೀಡಿತ್ತು.ದೇವಸ್ಥಾನದ ವಸತಿ ಗೃಹದಲ್ಲಿ, ಸ್ನಾನ ಮುಗಿಸಿ, ಶಾರದಾಂಬೆಯ ದರ್ಶನಕ್ಕೆ ನಡೆದೆವು.

ಶಕ್ತಿ ದೇವತೆ ಶಾರದಾಂಬೆ, ಭಕ್ತಿ ಪೂರಕ ತೋರಣ ಗಣಪತಿ, ಪರಮ ಪೂಜ್ಯ ಗುರುಗಳ ದರ್ಶನ ಪಡೆದು, ಪ್ರಶಾಂತತೆಯ ತುಂಗೆಯ ತೀರದಲ್ಲಿ ಸ್ವಲ್ಪ ಹೊತ್ತು ವಿರಮಿಸಿದೆವು.

ರಥಬೀದಿಯಲ್ಲಿನ ಹೋಟೆಲೊಂದರಲ್ಲಿ ಬಾಳೆ ಎಲೆಯಲ್ಲಿ ಬಡಿಸಿದ ಇಡ್ಲಿ-ವಡ, ಚಟ್ನಿ ತಿಂದು, ಇನ್ನೊದು ರೌಂಡು ಕಾಫಿ ಕುಡಿದು ಸಿರಿಮನೆ (ಕಿಗ್ಗ) ಜಲಪಾತಕ್ಕೆ ಹೊರಟೆವು.

ಶ್ರಿಂಗೇರಿಯಿಂದ ೮ ಕೀ.ಮೀ. ದೂರದ ಕಿಗ್ಗ ಊರಿನ, ಕಾನನದ ಮಧ್ಯೆ ಸುಂದರ ಸಿರಿಮನೆ ಜಲಪಾತ ಇದೆ. ಸುತ್ತಮುತ್ತಲಿನ ಭಾಗದಲ್ಲಿ ಚೆನ್ನಾಗಿ ಮಳೆಯಾಗಿದ್ದರಿಂದ ಜಲಪಾತ ಮೈದುಂಬಿ, ಸೌಂದರ್ಯ ಇಮ್ಮುಡಿಯಾಗಿತ್ತು.

ಗ್ರಾಮ ಪಂಚಾಯತಿಯವರು ಇಲ್ಲಿ ಪ್ರವೇಶ ಶುಲ್ಕವನ್ನು ವಸೂಲಿ ಮಾಡುತ್ತಾರೆ. ಹಾಗೆಯೇ ಜಲಪಾತಕ್ಕೆ ಹೋಗಲು ಮೆಟ್ಟಿಲಿನ ಅನುಕೂಲ, ವೀಕ್ಷಣಾ ಗೋಪುರ, ಬಟ್ಟೆ ಬದಲಾಯಿಸಲು ಪ್ರತ್ಯೇಕ ಕೊಠಡಿಯ ವ್ಯವಸ್ಥೆಯನ್ನು ಮಾಡಿದ್ದಾರೆ. ಅತೀ ಕಡಿಮೆ ಅಪಾಯದ ಈ ಜಲಪಾತದಲ್ಲಿ ನೀರಿನ ಹತ್ತಿರದವರೆಗೂ ಹೋಗಬಹುದು. ಸಾಕಷ್ಟು ಫೋಟೋ ತೆಗೆದು, ಜಲಪಾತದ ಸೌಂದರ್ಯವನ್ನು ನಾನಾ ವಿಧಗಳಲ್ಲಿ ಕಣ್ತುಂಬಿಕೊಂಡು, ನಾವೆಲ್ಲ ಮಳೆ-ಚಳಿಯನ್ನು ಲೆಕ್ಕಿಸದೆ ನೀರಿಗಿಳಿದೆವು.

ಜಲಪಾತಗಳ ನಿಜವಾದ ಸೌಂದರ್ಯ, ನೀರಿನ ಅಗಾಧತೆ ಗೋಚರಿಸುವುದೇ ಮಳೆಗಾಲದಲ್ಲಿ. ಸುತ್ತಲೂ ಕಾನನದ ಅಚ್ಚ ಬಿಳುಪಿನ ಸಿರಿಮನೆ ಜಲಪಾತ ಮನಸ್ಸನ್ನ ಸೂರೆಗೊಳಿಸುತ್ತದೆ.

ಧುಮ್ಮಿಕ್ಕುತ್ತಿದ್ದ ನೀರಿಗೆ ಬೆನ್ನು ಕೊಟ್ಟು ನಿಂತು, ಉಚಿತ ಮಸಾಜಿನ ಆನಂದ ಅನುಭವಿಸಿದೆವು. ನೀರಲ್ಲಿ ಆಟ ಆಡುತ್ತಿದ್ದವರಿಗೆ ಸಮಯ ಕಳೆದಿದ್ದೆ ಗೊತ್ತಾಗಲಿಲ್ಲ. ಹಸಿವಿನಿಂದ ಕಂಗಾಲಾಗಿದ್ದ ಸುಹಾಸ್ ಆಗಲೇ ತಲೆನೋವು ಎಂದು ಸುಮೋದಲ್ಲಿ ಮಲಗಿಯಾಗಿತ್ತು. ಬೆಳಗಿನ ಉಪಹಾರವು ಅವನಿಗೆ ಸರಿಯಾಗಿರಲಿಲ್ಲ. ೨ ಗಂಟೆಯ ಹೊತ್ತಿಗೆ ಶ್ರಿಂಗೇರಿಗೆ ಬಂದು ಪಂಚೆ ಉಟ್ಟು, ಮಠದಲ್ಲಿ ಪ್ರಸಾದ ಭೋಜನ ಮುಗಿಸಿದೆವು.

ಮರುದಿನದ ಚಾರಣಕ್ಕೆಂದು ಸ್ವಲ್ಪ ಹಣ್ಣು, ಬ್ರೆಡ್, ಒಣ ದ್ರಾಕ್ಷಿ, ಗ್ಲೂಕೋಸ್ ಖರೀದಿಸಿ, ಕಳಸದ ಕಡೆಗೆ ಪ್ರಯಾಣ ಬೆಳೆಸಿದೆವು.

ಶೃಂಗೇರಿ-ಕಳಸದ ಮಾರ್ಗ ಅತ್ಯಂತ ಸುಂದರ. ಭದ್ರ ಮೀಸಲು ಅರಣ್ಯದಲ್ಲಿ ಈ ದಾರಿ ಸಾಗುತ್ತದೆ. ಸುತ್ತಲೂ ದಟ್ಟ ಹಸಿರು ಕಾಡು, ಬಿಟ್ಟೂ ಬಿಡದೆ ಸುರಿಯುವ ಮಳೆ, ಹಸಿರು ಹಾಸಿದಂತೆ ಕಾಣಿಸುವ ಗುಡ್ಡ, ದಾರಿಗುಂಟ ಸಾಗುವ ಭದ್ರ ನದಿ ನಮ್ಮನ್ನ ಬೇರೆಯದೇ ಲೋಕಕ್ಕೆ ಕರೆದೊಯ್ಯುತ್ತದೆ.

ಸೊಗಸಾದ ಊಟವಾದ ಮೇಲೂ ನಾವೆಲ್ಲಾ ಸ್ವಲ್ಪವೂ ಕಣ್ಣು ಮುಚ್ಚದೇ ಪ್ರಕೃತಿಯ ಸೊಬಗನ್ನ ಕಣ್ತುಂಬಿಕೊಳ್ಳುತ್ತಿದ್ದೆವು. ಎಸ್-ಕೆ ಬಾರ್ಡರ್ ನಲ್ಲಿ ಚಹಾ ಕುಡಿಯಲು ನಿಲ್ಲಿಸಿದೆವು. ಅಲ್ಲಿನ ವಾತಾವರಣ ಸಂಪೂರ್ಣ ಮಂಜಿನಿಂದ ಮುಚ್ಚಿತ್ತು.

ಹನುಮನಗುಂಡಿ ಜಲಪಾತವನ್ನು ನೋಡಲಾಗದೆ ನಿರಾಸೆ ಆಗಿದ್ದ ನಮಗೆ, ಮುಂದೆ ರಸ್ತೆ ಅಂಚಿನಲ್ಲಿ ಸಿಕ್ಕ ಜಲಪಾತ ಸ್ವಲ್ಪ ಸಮಾಧಾನ ನೀಡಿತ್ತು.

ಬಾಳೆಕಲ್ಲಿನ "ವಜ್ರ" ಹೋಟೆಲೊಂದರಲ್ಲಿ ಮರುದಿನಕ್ಕೆ ಬೇಕಾಗುವಷ್ಟು ಚಪಾತಿ, ಚಟ್ನಿಪುಡಿ ಕಟ್ಟಿಸಿಕೊಂಡೆವು. ಹಾಗೆಯೇ ಉಂಬಳ ಕಾಟ ನಿಗ್ರಹಿಸಲು ನಶ್ಯ, ತಂಬಾಕಿನ ಎಲೆ, ಸುಣ್ಣ, ಬೇವಿನ ಎಣ್ಣೆ, ಮಳೆಯ ರಕ್ಷಣೆಗೆಂದು ಪ್ಲಾಸ್ಟಿಕ್ ಖರೀದಿಸಿದೆವು. ಸಮಯಕ್ಕೆ ಸರಿಯಾಗಿ ಜಗದೀಶ ತನ್ನ ಜೀಪಿನಲ್ಲಿ ಹಾಜರಾದ. ಬಾಳೆಕಲ್ಲಿಂದ ಮುಂದೆ ಮುಳ್ಳಾಡಿಗೆ ಜೀಪು ಬಿಟ್ಟರೆ ಬೇರೆ ಯಾವುದೇ ವಾಹನ ಹೋಗಲು ಸಾಧ್ಯವೇ ಇಲ್ಲ. ಅಲ್ಲಿನ ರಸ್ತೆಯಲ್ಲಿ ಜೀಪು ಓಡಿಸುವುದು ಒಂದು ಕಲೆಯೇ ಸರಿ. ಇನ್ನೇನು ಮಗುಚಿ ಬಿಟ್ಟಿತು ಅನ್ನುವಷ್ಟು ವಾಲುತಿತ್ತು. ನಮ್ಮಲ್ಲಿ ಯಾರೊಬ್ಬರಿಗೂ ಮಾತು ಹೊರಡುತ್ತಿರಲಿಲ್ಲ. ಅಕ್ಕ ಪಕ್ಕದಲ್ಲಿ ಪ್ರಪಾತ, ಮಧ್ಯೆ ಮಳೆಯಿಂದ ಕೆಸರಾದ ರಸ್ತೆ. ದೊಡ್ಡ ದೊಡ್ಡ ಕಲ್ಲುಗಳು..! ಅಕ್ಷರ ಉಸಿರು ಹಿಡಿದುಕೊಂಡು ಕುಳಿತಿದ್ದೆವು..!

ಮಂಜಪ್ಪ ಗೌಡರ ಆತ್ಮೀಯ ಆಥಿತ್ಯ ನಿಜಕ್ಕೂ ನೆನಪಲ್ಲಿ ಉಳಿಯುವಂತದ್ದು. ಸೊಗಸಾದ ಊಟ, ಬೆಂಕಿಯ ಸುತ್ತಲೂ ಕುಳಿತು ಹರಟೆ, ಗೌಡರ ಮಾತು, ಮತ್ತೊಂದು ಮಧುರವಾದ ಸಂಜೆ ನಮ್ಮದಾಗಿತ್ತು. ಹತ್ತಿರದಲ್ಲೆಲ್ಲೋ ಜಲಪಾತ ಇದೆ ಅಂತ ಅನ್ನಿಸುವಷ್ಟು ಜೋರಾಗಿ ಗೊರಕೆ ಹೊಡೆಯುತ್ತಿದ್ದ ಆನಂದ. ಅದು ಬಿಟ್ಟರೆ ನೆಮ್ಮದಿಯ ನಿದ್ರೆ..!

ಭಾನುವಾರ ೫.೩೦ ಕ್ಕೆ ಎದ್ದು ನಾವು ಚಾರಣಕ್ಕೆ ರೆಡಿ ಆದೆವು. ಗೌಡ್ರು ತಿಂಡಿಗೆಂದು ಅಕ್ಕಿಯ ಕಡಬು, ಕಾಯಿ ಚಟ್ನಿ ಮಾಡಿದ್ದರು. ತಂದಿಟ್ಟಿದ್ದ ಅಷ್ಟೂ ಕಡಬನ್ನು ಖಾಲಿ ಮಾಡಿ, ಒಳ್ಳೆ ಕಾಫಿ ಕುಡಿದು ಮಾರ್ಗದರ್ಶಕ (ಗೈಡ್) ಜೊತೆ ಚಾರಣ ಪ್ರಾರಂಭ ಮಾಡಿದೆವು

ಮನೆಯ ಹಿಂಬದಿಯ ಚಿಕ್ಕ ಗುಡ್ಡವನ್ನು ಹತ್ತಿ ಇಳಿದಾಗಲೇ ಪಶ್ಚಿಮ ಘಟ್ಟಗಳ ಸಾಲು ಸಾಲು ಗೋಚರಿಸುತ್ತಿತ್ತು. ಕಣ್ಣಳತೆ ಉದ್ದಕ್ಕೂ ಎಲ್ಲೆಲ್ಲೊ ಹಸಿರೆ ಹಸಿರು. ಆಗ ತಾನೇ ಚಿಗುರುತಿದ್ದ ಹುಲ್ಲು ಹಾಸು, ಗುಡ್ಡಗಳನ್ನು ಬಾಚಿ ತಬ್ಬಿಕೊಂಡಂತೆ ಅನ್ನಿಸುತಿತ್ತು. ಪ್ರಕೃತಿಯನ್ನ ಅವಳ ಮಡಿಲಿನಲ್ಲಿಯೇ ಅನುಭವಿಸಿ ತೀರಬೇಕು..!! ಶಬ್ದಗಳಲ್ಲಿ ವರ್ಣಿಸಲು ಅಸಾಧ್ಯ.

ಮಳೆಯು ಅಷ್ಟೇನೂ ತೊಂದರೆ ಕೊಡದ ಕಾರಣ ನಾವೆಲ್ಲ ಹುರುಪಿನಿಂದಲೇ ಹಳ್ಳ ಕೊಳ್ಳಗಳನ್ನು ದಾಟಿ, ಚಿಕ್ಕ ಚಿಕ್ಕ ಕಾಡನ್ನು ಬಳಸಿಕೊಂಡು ಮುಂದುವರೆದೆವು. ಅಲ್ಲಲ್ಲಿ ಹಾಳು ಬಿದ್ದ ಮನೆಗಳು, ಗದ್ದೆ ಮಾಡಲು ಹದ ಮಾಡಿದ ಜಾಗ ಎದುರಾಗುತ್ತದೆ. ಕಾಡುಪ್ರಾಣಿಗಳ ವಿಪರೀತ ಕಾಟ, ನಕ್ಸಲರ ಹಾವಳಿ, ಸಂಪರ್ಕಕ್ಕೆ ತುಂಬಾನೇ ದೂರವಾಗಿದ್ದ ಈ ಪ್ರದೇಶಗಳಲ್ಲಿ ವಾಸ ಮಾಡಲು ಬಂದವರು ಹಾಗೆಯೇ ತಿರುಗಿ ಹೋಗಿದ್ದಾರೆ ಎಂದು ನಮ್ಮ ಗೈಡ್ ತಿಳಿಸಿದ. ಅಷ್ಟರ ಮಟ್ಟಿಗೆ ಇಲ್ಲಿನ ಕಾಡು, ಗುಡ್ಡ, ವನ್ಯ ಸಂಪತ್ತು ಸುರಕ್ಷಿತವಾಗಿದೆ.

ಪ್ರಕೃತಿಯಲ್ಲಿ ಮುಳುಗಿ ಹೋಗಿದ್ದ ನಮಗೆ ವಿಪರೀತ ತುರಿಕೆ ಶುರು ಆದಾಗಲೇ ಉಂಬಳದ ನೆನಪಾಗಿದ್ದು. ಆಗ ಕಾಲನ್ನು ನೋಡಿಕೊಂಡಾಗ ಗೊತ್ತಾಗಿದ್ದು ಬರೋಬ್ಬರಿ ೨೦-೩೦ ಉಂಬಳ ಪ್ರತಿಯೊಬ್ಬರ ಕಾಲಿನಲ್ಲಿ. ಅದೆಷ್ಟು ರಕ್ತ ಹೀರಿ ಮಧ್ಯದಲ್ಲೇ ಉದುರಿ ಬಿದ್ದವೋ..? ಒಂದನ್ನು ತೆಗೆಯಲು ನಿಂತರೆ ಮತ್ತೆ ನಾಲ್ಕು ಹತ್ತುತ್ತಿದ್ದವು. ನಶ್ಯ, ತಂಬಾಕು ಹಚ್ಚಿ ನೋಡಿದ್ದಾಯಿತು, ಉಹುಂ.. ಹತ್ತಿದ್ದು ಬೇಗನೆ ಉದುರುತ್ತಿದವೇ ವಿನಃ ಹತ್ತದಂತೆ ತಡೆಯಲು ನಮ್ಮಿಂದಾಗಲಿಲ್ಲ.

ವಿಶೇಷ ಅಂದರೆ ಅಲ್ಲಿಯವನಾದ ನಮ್ಮ ಗೈಡ್ ಗೆ ಅವು ಹತ್ತುತ್ತಿರಲಿಲ್ಲ..! ಅವನ ರಕ್ತ ಅವಕ್ಕೆ ಹಳೆಯದ್ದಾಗಿರಬೇಕು. ಕೊನೆಗೆ ಅದೆಷ್ಟು ಹತ್ತುತ್ತವೋ ಹತ್ತಲಿ ಎಂದು ನಿರ್ಧರಿಸಿ ನಮ್ಮ ಪಾಡಿಗೆ ನಾವು ಚಾರಣ ಮುಂದುವರೆಸಿದೆವು.

ಇಳಿಜಾರಿನಲ್ಲಿ ಇದ್ದ, ತುಂಬಾನೇ ಜಾರುತ್ತಲಿದ್ದ ಕಲ್ಲಿನ ಮೇಲೆ ತಿಳಿಯದೆ ಕಾಲು ಇಟ್ಟ ಕಿರಣ ಪ್ರಪಾತಕ್ಕೆ ಬೀಳುತ್ತಲಿದ್ದ...! ಅವನ ಪುಣ್ಯ..ಮಧ್ಯೆ ಸಿಕ್ಕ ಮರಕ್ಕೆ ಅಡ್ಡಲಾಗಿ ಕಾಲು ಕೊಟ್ಟು, ಒಂದು ಬಂಡೆಯನ್ನು ಗಟ್ಟಿಯಾಗಿ ಹಿಡಿದುಕೊಂಡ. ನಮ್ಮಂತೆ ಚಾರಣಕ್ಕೆ ಬಂದಿದ್ದ ಇನ್ನೊದು ಗುಂಪಿನಲ್ಲಿದ್ದ ಅನುಭವಿಯೊಬ್ಬರು ಅತ್ಯಂತ ಜಾಗರೂಕತೆಯಿಂದ ಅವನನ್ನು ಮೇಲಕ್ಕೆತ್ತಿದರು..ಇಲ್ಲವಾದರೆ ಕುದುರೆಮುಖ ಕರಾಳ ಚಾರಣ ಆಗುತ್ತಿತ್ತು..

ಸತತ ಚಾರಣದ ನಂತರ ಕುದುರೆಮುಖ ಬೆಟ್ಟದ ತುತ್ತ ತುದಿ ತಲುಪಿದಾಗ ಮಧ್ಯಾನ್ನ ೧ ಗಂಟೆ ಆಗಿತ್ತು. ಅಲ್ಲಿನ ಸೊಬಗು ನಮ್ಮ ಎಲ್ಲ ನೋವನ್ನು ಮರೆಮಾಡಿತ್ತು. ಅದೊಂದು ಮರೆಯಲಾಗದ, ಅವಿಸ್ಮರಣೀಯ ಕ್ಷಣ. ಹುಚ್ಚರಂತೆ ಕುಣಿದಾಡಿದೆವು. ಎಲ್ಲರ ಬಾಯಲ್ಲೂ ಒಂದೇ ಉದ್ಘಾರ ''' ಅಬ್ಭಾ..ವಾಹ್..."

ಇಲ್ಲಿ ಮೋಡವು ಕೈಗೆ ಸಿಗುತ್ತಿತ್ತು. ಏನನ್ನೋ ಸಾಧಿಸಿದ ಸಮಾಧಾನ..! ಯಾರೊಬ್ಬರಿಗೂ ಅಲ್ಲಿಂದ ಹೊರಡಲು ಮನಸ್ಸೇ ಇರಲಿಲ್ಲ.

ಅಲ್ಲಿ ಉಗಮವಾಗಿದ್ದ ಸಣ್ಣ ಝರಿಯ ಬಳಿ ತಂದಿದ್ದ ಚಪಾತಿ, ಹಣ್ಣು ತಿಂದು ಸ್ವಲ್ಪ ಹೊತ್ತು ವಿರಮಿಸಿ ಇಳಿಯಲು ತೊಡಗಿದೆವು.ಮಳೆಗಾಲದಲ್ಲಿ ಚಾರಣದ ಸಮಯ ಹತ್ತುವುದಕ್ಕಿಂತ ಇಳಿಯುವುದೇ ಹೆಚ್ಚು ಕಷ್ಟ. ಇಳಿಯುವಾಗ ಒಬ್ಬಿಬ್ಬರ ಹೊರತಾಗಿ ಉಳಿದವರು ಅಲ್ಲಲ್ಲಿ ಬೀಳುತ್ತಲೇ ಇದ್ದರು..! ನಾವು ಕ್ರಮಿಸಿದ ಒಟ್ಟೂ ದೂರ ೨೨ ಕಿ,ಮೀ. ತೆಗೆದುಕೊಂಡ ಸಮಯ ೧೧ ಗಂಟೆಗಳು. ನಡೆದು ನಡೆದು ನಾವೆಷ್ಟು ಸುಸ್ತಾಗಿದ್ದೆವೆಂದರೆ, ಮನೆ ಬಂದು ನಾವು ನಿಂತರೂ ನಮ್ಮ ಕಾಲು ನಿಲ್ಲುತ್ತಲಿರಲಿಲ್ಲ...

ಗೌಡರ ಮನೆಯಲ್ಲಿ ಬಿಸಿನೀರಿನ ಸ್ನಾನದ ನಂತರ ಸ್ವಲ್ಪ ಸಮಾಧಾನ ಎನಿಸಿತು. ಗೌಡರ ಸಹಕಾರಕ್ಕೆ ಆತ್ಮೀಯವಾಗಿ ಧನ್ಯವಾದ ತಿಳಿಸಿ, ಅಲ್ಲಿಂದ ಮತ್ತೆ ಜೀಪಿನಲ್ಲಿ ಬಾಳೆಕಲ್ಲಿಗೆ ಬಂದು, ಸುಮೋದಲ್ಲಿ ಬೆಂಗಳೂರಿನತ್ತ ಹೊರಟೆವು.

ಚಾರಣಿಗರು - (ನಿಂತವರು - ಎಡದಿಂದ ಬಲಕ್ಕೆ) ಆನಂದ, ಕಿರಣ್, ಅರವಿಂದ, ನಾನು, ಸುಹಾಸ್.

(ಕುಳಿತವರು) ಆದರ್ಶ, ಪ್ರಮೋದ, ಅಭಿರಾಮ್.

ತುಂಬಾ ದಿನಗಳ ನಂತರ ಇಂಥದ್ದೊಂದು ಸುಂದರ ಚಾರಣಕ್ಕೆ ಹೋದ ಖುಷಿ ಮನಸ್ಸಲ್ಲಿ ಮೂಡಿತು...

ಹೈದರಾಬಾದ್

2009-08-19T06:23:00.000-07:00

ತಂತ್ರಜ್ಞಾನ ನಗರಿ ಹೈದರಾಬಾದಿಗೆ ಹೋಗುವ ಅವಕಾಶ ಕಳೆದ ವಾರ ಒದಗಿ ಬಂದಿತ್ತು. ಗೆಳೆಯರ ವಾರದಲ್ಲಿ (Friendship week) ನನ್ನ ಆಪ್ತ ಮಿತ್ರರನ್ನು ಭೇಟಿಯಾಗುವುದು ಮುಖ್ಯ ಉದ್ದೇಶ. ಹಾಗೆಯೇ ಹೈದರಾಬಾದು ಊರು ಸುತ್ತುವ ಸಣ್ಣ ಬಯಕೆ ಕೂಡ. ಶುಕ್ರವಾರ ದಿನಾಂಕ ೭ ರಂದು ರಾತ್ರಿ ಬೆಂಗಳೂರು-ಕಾಚಿಗುಡ ಎಕ್ಸಪ್ರೆಸ್ ರೈಲಿನಲ್ಲಿ ಯಶವಂತಪುರದಿಂದ ಹೊರಟಾಗ ರಾತ್ರಿ ೯.೩೦. ಸುಮಾರು ೫ ವರ್ಷಗಳ ನಂತರ ಗೆಳತಿಯ ಭೇಟಿಯಾಗುವ ವಿಚಾರ ಮನಸ್ಸಿಗೆ ಹರುಷ, ತಳಮಳ. ಕಾಲೇಜು ದಿನಗಳನ್ನು ಮೆಲಕು ಹಾಕುತ್ತ ಎಷ್ಟೋ ಹೊತ್ತಿನ ನಂತರ ನಿದ್ದೆಗೆ ಜಾರಿದ್ದೆ.

ನಿಗದಿತ ಸಮಯಕ್ಕಿಂತ ಅರ್ಧ ಗಂಟೆ ವಿಳಂಬವಾಗಿ ಹೈದರಾಬಾದು ತಲುಪಿದೆ. ಗೆಳತಿಯ ಮನೆಯಲ್ಲಿ ಲಘು ಉಪಹಾರ, ಸಾಕಷ್ಟು ಮಾತು ಕತೆಯ ನಂತರ ಹೈದರಾಬಾದು ಸುತ್ತಲು ಹೊರಟೆವು. ಹೆಚ್ಚೇನು ವಿಶೇಷತೆ ಇಲ್ಲದ ನಗರದ ಅರ್ಧ ಭಾಗ ಸಾಫ್ಟವೇರ್ ಕಂಪೆನಿಗಳಿಂದ ತುಂಬಿದೆ. "ಬಿರಿಯಾನಿ-ಹೌಸ್" ರುಚಿಕಟ್ಟಾದ ಹೈದರಾಬಾದ್ ಬಿರಿಯಾನಿಗೆ ಫೇಮಸ್, ಪುಲ್ಲರೆಡ್ಡಿ ಅಂಗಡಿ ಬಾಯಲ್ಲಿ ನೀರೂರಿಸುವ ಸಿಹಿ ಖಾದ್ಯಗಳಿಗೆ ಪ್ರಸಿದ್ಧ. ಇದು ಬಿಟ್ಟರೆ ವರಟು ಜನ, ರಸ್ತೆ ಸಂಚಾರದ ನಿಯಮಗಳು ತಿಳಿದಿದ್ದರೂ ಅನುಸರಿಸುವ ವ್ಯವಧಾನ ಯಾರಿಗೂ ಇದ್ದ ಹಾಗೆ ಕಾಣುವುದಿಲ್ಲ. ಎಲ್ಲೆಂದರಲ್ಲಿ ಕಾಣಿಸುವುದು ಚಿತ್ರಮಂದಿರಗಳು. ಎಲ್ಲವೂ ಭರ್ತಿ..!

ನಗರದ ಮಧ್ಯ ಭಾಗದಲ್ಲಿರುವ ಮಹಾವಿಷ್ಟುವಿನ "ಬಿರ್ಲಾ ಮಂದಿರ" ಸುಂದರವಾದ ದೇವಾಲಯ. ಸಂಪೂರ್ಣ ಮಾರ್ಬಲ್ ನಿಂದ ಕಟ್ಟಿದ ದೇವಾಲಯದಲ್ಲಿ ಕ್ಯಾಮೆರಾ ಮತ್ತು ಮೊಬೈಲ್ ಫೋನುಗಳು ನಿಷಿದ್ಧ.

ಜನರಲ್ ಬಜಾರು ಹೆಣ್ಣು ಮಕ್ಕಳಿಗೆ ಪ್ರಿಯವಾದ ಜಾಗ. ಇಲ್ಲಿ ಅತಿ ಕಡಿಮೆ ಬೆಲೆಗೆ ಗುಣಮಟ್ಟದ ಡ್ರೆಸ್ ಮೆಟೀರಿಯಲ್ ಸಿಗುತ್ತದೆ.

ಚಾರ್-ಮಿನಾರ್ ಒಂದು ಅದ್ಭುತ ಶಿಲ್ಪಕಲೆ. ಇಸ್ಲಾಂ ಶೈಲಿಯ ಸುಂದರ ಕೆತ್ತನೆಗಳು, ೪ ಜನ ಪ್ರವಾದಿಗಳ ನೆನಪಿಗೋಸ್ಕರ ಕಟ್ಟಿದ ೪ ಕಂಬಗಳು ವಿಶಿಷ್ಟತೆಯನ್ನು ಸಾರುತ್ತವೆ.

ಮೊಹಮ್ಮದ್ ಕುತುಬ್ ಷಾ ಎಂಬುವನು ೧೫೯೧ ನೇ ಇಸವಿಯಲ್ಲಿ ಕಟ್ಟಿದ ಚಾರ್-ಮಿನಾರ್ ನ ಒಂದೊಂದು ಕಂಬಗಳು ಸುಮಾರು ೪೮.೭ ಮೀ ಎತ್ತರ ಇದೆ.

ಚಾರ್-ಮಿನಾರಿನ ಸುತ್ತಲು ಇರುವ ಬೀದಿಗಳು ಹೈದರಾಬಾದ್ ಮುತ್ತಿಗೆ ಪ್ರಸಿದ್ಧ. ಅತಿ ಸುಂದರ ಮುತ್ತಿನ ಹಾರ, ಕಿವಿಯೋಲೆ ತುಂಬಾ ಕಡಿಮೆ ಬೆಲೆಗೆ ಸಿಗುತ್ತದೆ. ೧೫೦೦ ರೂಪಾಯಿ ಹಾರ ಚೌಕಾಸಿ ನಂತರ ೩೦೦ ಕ್ಕೆ ದೊರಕಿತು.

ಹೈದರಾಬಾದಿನ ಪ್ರಮುಖ ಆಕರ್ಷಣೆ "ರಾಮೋಜಿ ಫಿಲಂ ಸಿಟಿ". ನಗರದಿಂದ ೩೦ ಕಿ. ಮೀ ದೂರ ವಿಶಾಲವಾದ ೨೦೦೦ ಎಕರೆ ಪ್ರದೇಶದಲ್ಲಿ ಇರುವ ರಾಮೋಜಿ ಫಿಲಂ ಸಿಟಿಯು ಊಹೆಗೂ ನಿಲುಕದ ವಿಶಿಷ್ಟತೆಗಳ ಪ್ರಪಂಚ. ರಾಮೋಜಿ ರಾವ್ ಎಂಬ ದೂರದೃಷ್ಟಿಯ, ಪಕ್ಕಾ ವ್ಯವಹಾರಸ್ಥನ ಬುದ್ಧಿಯಿಂದ ಅರಳಿದ ಕಲಾಗಾರ. ಚಿತ್ರರಂಗಕ್ಕೆ ಏನೇನು ಬೇಕೋ ಅದೆಲ್ಲ ಇಲ್ಲಿ ಲಭ್ಯ. ಅರಮನೆಯಿಂದ ಹಿಡಿದು ಗುಡಿಸಲು ತನಕ , ವಿಮಾನ, ರೈಲ್ವೆ ನಿಲ್ದಾಣ, ಮೈಸೂರು ಬೃಂದಾವನ, ಜೈಲು, ವಿವಿಧ ತಂತ್ರಜ್ಞಾನ ಪಂಚತಾರಾ ಹೋಟೆಲು, ವಸತಿ ಗೃಹ, ಮಕ್ಕಳ ಆಟದ ಮೈದಾನ ಎಲ್ಲವೂ ಒಂದೇ ಸ್ಥಳದಲ್ಲಿ ಲಭ್ಯ.
ಮುಖದ್ವಾರ
ಕೃತಕ ಅರಮನೆಕಾರಂಜಿ ಮಧ್ಯೆ ನೃತ್ಯ ಮಾಡುವ ಹುಡುಗಿ

ಸಂಚಾರಕ್ಕೆ, ಫಿಲಂ ಸಿಟಿಯ ದರ್ಶನಕ್ಕೆ ವಿಶೇಷವಾಗಿ ನಿರ್ಮಿಸಿದ ಬಸ್ಸು.

ಸುಂದರ ಶ್ರೀಮಂತಿಕೆಯ ನಗರದ ಬೀದಿ.
ಇಲ್ಲಿರುವ ಎಲ್ಲ ಮನೆಗಳೂ ಕೃತಕ, ಪ್ಯಾರಿಸ್ ಆಫ್ ಪ್ಲಾಸ್ಟರ್ ನಿಂದ ನಿರ್ಮಿಸಿದ ಮನೆಗಳು.
ಈ-ಟಿವಿ ಕಾರ್ಯವಾಹಿನಿಯ ಕೇಂದ್ರ ಕಚೇರಿ, ಇದು ನಿಜವಾದದ್ದು..!!ರಾಮೋಜಿ ರಾವ್ ಬಳಸುತಿದ್ದ ಕಾರು

ಗಾರ್ದನ್ನು, ಇಲ್ಲಿನ ಹುಲ್ಲು, ಗಿಡಗಳು ಕೃತಕವಲ್ಲ.. :-)

ದರ್ಪಣ ಸುಂದರಿಫಿಲಂ ಸಿಟಿಯನ್ನು ಪೂರ್ತಿ ನೋಡಲು ೨ ದಿನ ಬೇಕು. ಇಲ್ಲಿನ ಪ್ರಮುಖವಾದವುಗಳನ್ನು ನೋಡಿ, ವಾಪಾಸು ನಗರಕ್ಕೆ ಬಂದೆವು.

ಹುಸ್ಸೇನ್ ಸಾಗರ ಕೆರೆ. ಕೃತಕವಾಗಿ ನಿರ್ಮಿಸಿದ ಈ ಕೆರೆಯ ಮಧ್ಯದಲ್ಲಿ ಬುದ್ಧನ ವಿಗ್ರಹ ಇದೆ. ಇಲ್ಲಿ ಬೋಟಿಂಗ್ ವ್ಯವಸ್ಥೆಯೂ ಇದೆ. ಕೆರೆಯ ಸುತ್ತಲೂ ಇರುವ ಸುಂದರವಾದ ಉದ್ಯಾನವನವನ ಸಂಜೆಯ ವೇಳೆ ಕಳೆಯಲು ಸೂಕ್ತವಾದ ಜಾಗ.

ಅನೇಕ ವರ್ಷದ ನಂತರ ಮತ್ತೆ ಸಿಕ್ಕಿದ ನಾವು ಮನಸ್ಸು ತೃಪ್ತಿಯಾಗುವಷ್ಟು ಹರಟೆ ಹೊಡೆದೆವು. ಹಳೆಯ ನೆನಪುಗಳನ್ನು ಒಂದೊಂದಾಗಿ ಕೆದಕುತ್ತ, ಸುಂದರ ಸಂಜೆಯನ್ನು ಕಳೆದೆವು.

ಗೋಕಾಕ ಮತ್ತು ಅಂಬೋಲಿ ಜಲಪಾತ

2009-07-29T04:10:00.000-07:00

ಈ ವರ್ಷದ ಮಳೆಗಾಲದಲ್ಲಿ ಗೋಕಾಕ ಜಲಪಾತ ತುಂಬಿ ಹರಿಯುತ್ತಿರುವುದನ್ನು ಕೇಳಿದ್ದೆ. ಒಮ್ಮೆ ನೋಡಿಬರುವ ಎಂದು ಗೆಳೆಯರಲ್ಲಿ ಹೇಳಿದ್ದೆ. ಅದಕ್ಕೆ ಕಳೆದ ವಾರ ಮುಹೂರ್ತ ಬಂದಿತ್ತು (೧೮ ಮತ್ತು ೧೯ ಜುಲೈ ). ಎರಡು ದಿನದ ಪ್ರವಾಸವನ್ನು ನಿಗದಿಗೊಳಿಸಿ ಸುತ್ತಮುತ್ತಲಿನ ಪ್ರವಾಸಿ ತಾಣಗಳನ್ನು ಪಟ್ಟಿಮಾಡಿಕೊಂಡೆ. ಶುಕ್ರವಾರ ಆಫೀಸ್ ಕೆಲಸ ಮುಗಿಸಿ, ಅಂತೂ ಇಂತೂ ಬಸ್ಸು ಹೊರಡುವುದಕ್ಕೆ ೧ ನಿಮಿಷ ಮುಂಚೆ ನವರಂಗ್ ತಲುಪಿಕೊಂಡೆವು.
ಅಲ್ಲಿಂದ ನಮ್ಮ ಪ್ರಯಾಣ ಬಸ್ಸಿನಲ್ಲಿ ನಿಗದಿಯಾಗಿತ್ತು. ದೀರ್ಘ ಪ್ರಯಾಣದ ನಂತರ ಮರುದಿನ ಬೆಳಿಗ್ಗೆ ೧೦.೩೦ ಕ್ಕೆ ಗೋಕಾಕ ತಲುಪಿದೆವು. ಸಂಗೊಳ್ಳಿ ರಾಯಣ್ಣ ವೃತ್ತದ ಬಳಿ "ಪ್ರಶಾಂತ್" ಲಾಡ್ಜ್ ನಲ್ಲಿ ಒಂದು ರೂಮು ಬುಕ್ ಮಾಡಿ, ಸ್ನಾನ ಕ್ರಿಯೆಯನ್ನು ಮುಗಿಸಿದೆವು. ಲಾಡ್ಜ್ ಮಾಲೀಕರ ನೆರವಿನಿಂದ ಬಾಡಿಗೆಗೆ ಕಾರನ್ನು ಗೊತ್ತುಮಾಡಿದೆವು. ಅಲ್ಲಿನ ನಾಮಫಲಕಗಳು ಸ್ವಲ್ಪ ವಿಚಿತ್ರ ಅನ್ನಿಸುತಿತ್ತು. ಯಥಾವತ್ ಬಯಲುಸೀಮೆ ಭಾಷೆಯಲ್ಲಿ ಉಚ್ಚರಿಸಿದ ಹಾಗೆ ಫಲಕಗಳನ್ನು ಬರೆದಿದ್ದಾರೆ. ಉದಾ - " ಸ್ಯೆಯದ ಸಾಯಿಕಲ ಶಾಪ.....! ಛಾಯ ಹೋಟೆಲ..ದಮ್ಮರಗಿ ಟೆಕ್ಸ್ಟ್ ಟಾಯಿಲ್ಸ..! ಬಜಾಜ ಅಲಿಯೇನ್ಸ ಫೈನಾನ್ಸಿಯಲ...! ಇವುಗಳನ್ನ ಅರ್ಥ ಮಾಡಿಕೊಳ್ಳಲು ಸ್ವಲ್ಪ ಸಮಯವೇ ಬೇಕಾಯಿತು.

ಮಹಾಲಿಂಗೇಶ್ವರ ದೇವಸ್ಥಾನ : ಗೋಕಾಕ ಜಲಪಾತದ ಬದಿಯಲ್ಲಿಯೇ ಇರುವ ಪುರಾತನ ಮಹಾಲಿಂಗೇಶ್ವರ ದೇವಸ್ಥಾನವು ಚಾಲುಕ್ಯ ಶೈಲಿಯಲ್ಲಿದ್ದು ೧೦ ನೇ ಶತಮಾನದ್ದೆಂದು ಅಂದಾಜಿಸಲಾಗಿದೆ. ಈ ದೇವಸ್ಥಾನವು ಗರ್ಭಗೃಹ, ಅರ್ಧಮಂಟಪ ಮತ್ತು ವಿಶಾಲ ಮುಖಮಂಟಪ ಹೊಂದಿದೆ. ಸ್ಥಳೀಯರು ಈ ದೇವಸ್ಥಾನವನ್ನು ತಾರಕೇಶ್ವರ ದೇವಸ್ಥಾನ ಅಂತಲೂ ಕರೆಯುತ್ತಾರೆ. ದೇವಸ್ಥಾನದ ಮುಂಭಾಗದಲ್ಲೇ ಜಲಪಾತ ಇರುವುದು.

ಗೋಕಾಕ್ ಜಲಪಾತ ಪಟ್ಟಣದಿಂದ ೭ ಕಿ.ಮೀ ದೂರದಲ್ಲಿದೆ. ನೀರಿನ ಭೋರ್ಗರೆತ ದೂರದವರೆಗೂ ಕೇಳಿಸುತ್ತಿರುತ್ತದೆ. ಈ ಜಲಪಾತವನ್ನು " ಕರ್ನಾಟಕದ ನಯಾಗಾರ" ಎಂತಲೂ ಬ್ರಿಟಿಷರು ಕರೆದಿದ್ದರು.

ಘಟಪ್ರಭಾ ನದಿಯು ೧೮೦ ಮೀ ಎತ್ತರದಿಂದ ಭೋರ್ಗರೆಯುತ್ತಾ ಆಳಕ್ಕೆ ಧುಮುಕುವ ನೋಟವೇ ಭಯಂಕರ..ಮಳೆಗಾಲದ ಕೆಂಪು ನೀರು ಜಲಪಾತದ ರೌದ್ರವನ್ನು ಇನ್ನು ಹೆಚ್ಚಿಸಿತ್ತು.

ತೂಗು ಸೇತುವೆ ಇಲ್ಲಿನ ಪ್ರಮುಖ ಆಕರ್ಷಣೆ. ಊರ ನಾಗರಿಕರಿಗೆ ಅನುಕೂಲ ಆಗಲೆಂದು ಮರ ಮತ್ತು ಕಬ್ಬಿಣದಿಂದ ನಿರ್ಮಾಣವಾದ ಈ ಸೇತುವೆಯ ಮೇಲೆ ನಡೆದುಕೊಂಡು ಹೋಗುವುದು ಅದ್ಭುತ ಅನುಭವ. ಕಾಲ ಕೆಳಗೆ ಘಟಪ್ರಭ ನದಿಯ ರಭಸದ ಅನುಭವ.ತೂಗು ಸೇತುವೆ ಮೇಲೆ ನಡೆಯುವಾಗ ಕುಲುಕಾಟ ಶುರು ಆಗುತ್ತದೆ, ಬಹಳ ಜನ ಪ್ರವಾಸಿಗರು ಅರ್ಧಕ್ಕೇ ವಾಪಾಸು ಹೋಗುತ್ತಾರೆ..ಅಷ್ಟು ಹೆದರಿಕೆ ಆಗುತ್ತದೆ...!!

ಈ ಜಲಪಾತವನ್ನು ಎಲ್ಲ ಬದಿಯಲ್ಲೂ ನಿಂತು ಸೌಂದರ್ಯವನ್ನು ಸವಿಯಬಹುದು. ಅಗಾಧ ಪ್ರಮಾಣದ ನೀರು ಒಮ್ಮೆಲೇ ಧುಮ್ಮಿಕ್ಕುವುದು ನಿಜಕ್ಕೂ ರೋಮಾಂಚನ. ವಿಶಾಲವಾಗಿ ಹರಡಿರುವ, ಒಮ್ಮೆಲೇ ಭೋರ್ಗರೆಯುತ್ತಾ ಎದೆ ನಡುಗಿಸುವ ಗೋಕಾಕ ನಿಜಕ್ಕೂ ಗಂಡು ಮೆಟ್ಟಿದ ನಾಡಿನ ಜಲಪಾತ...!! ಜೂನ್ ನಿಂದ ಅಕ್ಟೋಬರ್ ತಿಂಗಳ ಕಾಲ ಗೋಕಾಕ ಜಲಪಾತದ ವೀಕ್ಷಣೆಗೆ ಉತ್ತಮ ಸಮಯ. ಜಲಪಾತದ ತಳದಲ್ಲಿ ಜಲ-ವಿದ್ಯುತ್ ಸ್ಥಾವರ ಇದೆ. ಹಾಗೆಯೇ ಗೋಕಾಕ ಬಟ್ಟೆ ಮಿಲ್ಲು ಕೂಡ ನೋಡಬೇಕಾದ ಕಟ್ಟಡ. ಇದನ್ನು ೧೮೮೫ ರಲ್ಲಿ ಬ್ರಿಟಿಷರು ಪ್ರಾರಂಭಿಸಿದರು.

ಗೊಡಚಿನಮಲ್ಕಿ ಜಲಪಾತ - ಗೋಕಾಕ ದಿಂದ ಸುಮಾರು 2೦ ಕಿ.ಮೀ ಮಾರ್ಕಂಡೇಯ ನದಿಯು ಈ ಸುಂದರ ಜಲಪಾತವನ್ನು ಸೃಷ್ಟಿಸಿದೆ. ಎಲ್ಲ ಜಲಪಾತದಂತೆ ಇಲ್ಲಿ ಒಮ್ಮೆಲೇ ನೀರು ಆಳಕ್ಕೆ ಬೀಳುವುದಿಲ್ಲ. ಹಂತ ಹಂತವಾಗಿ ವಿವಿಧ ಸ್ಥರಗಳಲ್ಲಿ ನದಿಯು ಹರಿದು, ಸುಂದರ ಜಲಧಾರೆಯನ್ನು ಸೃಷ್ಟಿಸಿದೆ. ಇಲ್ಲಿ ನೀರಿನ ಹತ್ತಿರದವರೆಗೂ ಹೋಗಬಹುದು.

ಊರಿನಲ್ಲಿ ವಾಹನವನ್ನು ನಿಲ್ಲಿಸಿ, ಸುಮಾರು ೨ ಕಿ.ಮೀ ನಡೆಯಬೇಕು. ಹಸಿರು ಹೊಲ ಗದ್ದೆಗಳು ನಮ್ಮನ್ನ ಸ್ವಾಗತಿಸುತ್ತವೆ.

ಮಳೆ ಬಂದಾಗ ಕಪ್ಪು ಮಣ್ಣಿನಲ್ಲಿ ನಡೆಯುವುದು ಸ್ವಲ್ಪ ಕಷ್ಟ...ಜಿಡ್ಡು ಮಣ್ಣು, ಬೇಗನೆ ಕಾಲು ಜಾರುತ್ತದೆ. ಮೊದಲು ೫೦ ಮೀ ನಂತರ ೨೫ ಮೀ ಎತ್ತರದಿಂದ ಇಳಿಜಾರಿನಂತೆ ಹರಿವ ನದಿಯು ಕೆಂಪನೆಯ ಜಲಪಾತದ ಸೊಬಗನ್ನು ಉಣಿಸುತ್ತದೆ.

ಮಂಟಪದಂತೆ ಇರುವ ಕಲ್ಲಿನ ಮೇಲೆ ಕುಳಿತು ಸುಂದರ ಜಲಪಾತವನ್ನು ವೀಕ್ಷಿಸಬಹುದು. ತನ್ನದೇ ವಿಶಿಷ್ಟ ಸೌಂದರ್ಯವನ್ನು ಹೊಂದಿರುವ ಈ ಜಲಪಾತದ ಬಳಿ ಹೆಚ್ಚಿನ ಸಮಯ ಕಳೆದೆವು..!

ಹಿಡಕಲ್ ಡ್ಯಾಮ್ : ಘಟಪ್ರಭಾ ನದಿಗೆ ಅಡ್ಡಲಾಗಿ ಕಟ್ಟಲಾಗಿರುವ ಹಿಡಕಲ್ ಡ್ಯಾಮ್ ಶ್ರೀಯುತ ಜೀ. ಎಸ್ ಬಾಳೆಕುಂದ್ರಿ ಅವರ ಕನಸಿನ ಕೂಸು. ಸುಮಾರು ೧೩೪೦೦ ಹೆಕ್ಟೇರು ಪ್ರದೇಶಕ್ಕೆ ನೀರಾವರಿ ಸೌಲಭ್ಯವನ್ನು ಒದಗಿಸಿರುವ ಈ ಜಲಾಶಯವನ್ನು ೧೯೭೭ ರಲ್ಲಿ ಅಂದಾಜು ೯.೪೭ ಕೋಟಿ ವೆಚ್ಚದಲ್ಲಿ ಕಟ್ಟಲಾಗಿದೆ. ಸಧ್ಯಕ್ಕೆ ಭದ್ರತೆಯ ಕಾರಣ ಪ್ರವಾಸಿಗರ ವೀಕ್ಷಣೆಗೆ ಅನುಮತಿ ನೀಡುತ್ತಿಲ್ಲ.

ಹಿಡಕಲ್ ನಿಂದ ಹೊರಟು, ಗೋಕಾಕ್ ತಲುಪಿದಾಗ ಸಂಜೆ ೫ ಗಂಟೆ ಆಗಿತ್ತು. ಮಧ್ಯಾನ್ನ ಊಟ ಎಲ್ಲೂ ದೊರೆಯದ ಕಾರಣ ಗೋಕಾಕ್ ನಲ್ಲಿ ತಿಂಡಿ ತಿಂದು ಬೆಳಗಾವಿಗೆ ಬಸ್ ಹಿಡಿದೆವು. ದಿನಪೂರ್ತಿ ನಮಗೆ ಮಳೆಯ ಅಡಚಣೆ ಉಂಟಾಗಲಿಲ್ಲ. ಬೆಳಗಾವಿ ತಲುಪಿದಾಗ ಮಳೆಯು ರಚ್ಚೆ ಹಿಡಿದಂತೆ ಸುರಿಯುತ್ತಿತ್ತು. ಸಂತೋಷ್ ಬಾವ ಮೊದಲೇ ಸನ್ಮಾನ್ ಲಾಡ್ಜ್ ನಲ್ಲಿ ರೂಂ ಬುಕ್ ಮಾಡಿದ್ದರು. ಅದಿಲ್ಲದಿದ್ದರೆ ನಾವು ಬಹಳ ಪರದಾಡಬೇಕಾಗಿತ್ತು. ಅದೇ ಹೋಟೆಲಿನಲ್ಲಿ ರಾತ್ರಿಯ ಊಟ ಮುಗಿಸಿ ಬೇಗನೆ ನಿದ್ರೆಗೆ ಜಾರಿದೆವು.

ಭಾನುವಾರ ಮುಂಜಾನೆ ೬.೨೦ ಕ್ಕೆ ಡ್ರೈವರ್ ಅರುಣ ಸಂತೋಷ್ ಬಾವನ ಸಾಂಟ್ರೋ ಕಾರಿನಲ್ಲಿ ಹಾಜರ್. ನಾವು ಬೇಗ ಬೇಗನೆ ರೆಡಿ ಆಗಿ, ಹೋಟೆಲ್ ಗ್ರಾಂಡ್ ನಲ್ಲಿ ಇಡ್ಲಿ-ವಡ ತಿಂದು ಅಂಬೋಲಿ ಕಡೆಗೆ ಹೊರಟೆವು.ಆಗಲೇ ಮಳೆಯಿಂದಾಗಿ ವಾತಾವರಣ ಮುಸುಕು ಮುಸುಕಾಗಿತ್ತು. ಹಿತವಾದ ಛಳಿ, ಮಂಜು ನಮಗೆ ಎಲ್ಲಿಲ್ಲದ ಉತ್ಸಾಹವನ್ನು ತಂದಿತ್ತು. ಬೆಳಗಾವಿ ಅಂದರೆ ಬಯಲುಸೀಮೆ ಅಂತಾನೆ ಅಂದುಕೊಂಡಿದ್ದ ನಮಗೆ ಬೇರೆಯದೇ ಪ್ರಪಂಚವನ್ನು ತೆರೆದಿತ್ತು. ಇದು ಅಪ್ಪಟ ಮಲೆನಾಡಿನ ಸೆರಗಿನ ಊರು. ಹಚ್ಚ ಹಸಿರಿನ ಮರಗಳು, ಕಬ್ಬು, ಭತ್ತದ ಗದ್ದೆ, ಬಿಡದೆ ಸುರಿಯುತ್ತಿದ್ದ ಮಳೆ..ಆಹಾ ಪ್ರವಾಸಕ್ಕೆ ಹೇಳಿಮಾಡಿಸಿದ ಊರು.. ಸಿಂಪ್ಲಿ ಸೂಪರ್..!

ಅನುಭವಿ ಅರುಣ ನಮ್ಮನ್ನು ಮೊದಲು ಕರೆದೊಯ್ದಿದ್ದು " ನನ್ಗರ್ತ ಜಲಪಾತಕ್ಕೆ.." ಹಿಂದಿನ ದಿನ ಕೆಂಪು ನೀರನ್ನು ಕಂಡಿದ್ದ ನಮಗೆ ಇಂದು ಸ್ವಚ್ಛ ಗುಡ್ಡಗಾಡಿನ ಮಳೆಯ ನೀರು.

ಕಡಿದಾದ ಚಿಕ್ಕ ಸುರಂಗದ ಮಧ್ಯೆ ಅತ್ಯಂತ ರಭಸವಾಗಿ ಧುಮ್ಮಿಕ್ಕುವ ಈ ಜಲಪಾತ ನಾನು ನೋಡಿದ ಈ ವರೆಗಿನ ಎಲ್ಲ ಜಲಪಾತಗಳಿಗಿಂತ ವಿಭಿನ್ನ. ಇದರ ಆಳ ಇದುವರೆಗೂ ತಿಳಿದಿಲ್ಲ. ಮೇಲ್ನೋಟಕ್ಕೆ ಸಹಜವಾಗಿಯೇ ಕಾಣುವ ಕಂದಕ, ಹತ್ತಿರದಿಂದ ಬಗ್ಗಿ ನೋಡಿದಾಗಲೇ ಉಸಿರು ನಿಲ್ಲುವಂತಾಗಿದ್ದು. ಇದರ ಸಂಪೂರ್ಣ ಚಿತ್ರವನ್ನು ತೆಗೆಯಲು ಸಾಧ್ಯವಾಗಲಿಲ್ಲ..!
ಹಿರಣ್ಯಕೆಷಿ : ಮಾರ್ಕಂಡೇಯ ನದಿಯ ಉಗಮ ಸ್ಥಾನ. ಚಿಕ್ಕದಾದ ಗುಹೆಯ ಒಳಗಿಂದ ಉದ್ಭವಿಸಿ ಬರುವ ಮಾರ್ಕಂಡೇಯ ನದಿಯು ಮುಂದೆ ಗೊಡಚಿನಮಲ್ಕಿ ಜಲಪಾತವನ್ನು ಸೃಷ್ಟಿಸುತ್ತದೆ.

ಶಿವ ಪಾರ್ವತಿಯರ ಪ್ರತಿಮೆಯ ಸುತ್ತಲೂ ಸದಾ ಕಾಲ ನೀರು ಹರಿಯುತ್ತಿರುತ್ತದೆ. ವಾಹನವನ್ನು ನಿಲ್ಲಿಸಿ ೧/೨ ಕಿ,ಮೀ ಗುಡ್ಡದ ಮಧ್ಯೆ ನಡೆಯಬೇಕು. ಪ್ರವಾಸಿಗರಿಗೆ ಅನುಕೂಲಕ್ಕಾಗಿ ಅಚ್ಚುಕಟ್ಟಾದ ಮೆಟ್ಟಿಲು ವ್ಯವಸ್ಥೆ ಇದೆ.

ಅಂಬೋಲಿ: ಬೆಳಗಾವಿ ಗೋವಾ ನಡುವಿನ ಸಹ್ಯಾದ್ರಿ ಘಟ್ಟದ ರಸ್ತೆ ಮಧ್ಯದಲ್ಲಿ ಸಿಗುವ ಸುಂದರ ಜಲಪಾತ. ಅಂಬೋಲಿ ಘಟ್ಟದ ದಾರಿಯುದ್ದಕ್ಕೂ ಚಿಕ್ಕಪುಟ್ಟ, ಸುಂದರ ಜಲಪಾತಗಳು. ವ್ಯೂ ಪಾಯಿಂಟ್, ಎಲ್ಲವೂ ಪ್ರಕೃತಿಯ ಸುಂದರ ದೃಶ್ಯಗಳು.

ಬೆಳಗಾವಿಯಿಂದ ೮೦ ಕಿ.ಮೀ ದೂರ. ಇದಕ್ಕೆ ಗ್ರೀನ್ ವ್ಯಾಲಿ ಅಂತಲೇ ಹೆಸರು. ರಸ್ತೆಯ ಪಕ್ಕದಲ್ಲಿಯೇ ಇರುವ ಅಂಬೋಲಿ ಜಲಪಾತವು ಅತ್ಯಂತ ಸುಂದರವಾಗಿದೆ. ಬಿಳುಪಿನ ಜಲಧಾರೆ ನಯನ ಮನೋಹರ. ೨೦೦ ಅಡಿ ಎತ್ತರದಿಂದ ಕವಲಾಗಿ ಧುಮ್ಮಿಕ್ಕುವ ಈ ಜಲಪಾತ ಪ್ರವಾಸಿಗರಿಗೆ ಹಬ್ಬ.

ಮಳೆಯ ಪ್ರಮಾಣ ಜಾಸ್ತಿ ಇದ್ದರಿಂದ ಪ್ರವಾಸಿಗರು ಕೂಡ ಹೆಚ್ಚಿದ್ದರು. ಜಲಪಾತದ ಅಂದವನ್ನು ಎಷ್ಟು ಹೊತ್ತು ನೋಡಿದರೂ ತೃಪ್ತಿ ಆಗುತ್ತಿರಲಿಲ್ಲ..ಹಾಗೆ ಸುಮ್ಮನೆ ನೋಡುತ್ತಲೇ ಇದ್ದೆವು. ಹೆಚ್ಚಿನ ಮಳೆ ಮತ್ತು ಮಂಜು ಮುಸುಕಿದ್ದರಿಂದ ಹೆಚ್ಚಿನ ಚಿತ್ರಗಳನ್ನು ತೆಗೆಯಲಾಗಲಿಲ್ಲ. ಮೈ-ಮನ ತೃಪ್ತಿ ಆಗುವಷ್ಟು ಕಾಲ ಸ್ನಾನ ಮಾಡಿ, ಜಲಪಾತದ ಬುಡದವರೆಗೆ ಹೋಗಿ ಅದರ ಸೌಂದರ್ಯವನ್ನು ಕಣ್ತುಂಬಿಕೊಂಡೆವು.

ಮುಂದೆ ವ್ಯೂ ಪಾಯಿಂಟ್ ನಲ್ಲಿ ನಿಂತು ನೋಡಿದರೆ ಸುತ್ತ ಮುತ್ತ ಜಲಪಾತಗಳೇ ಕಾಣಿಸುತಿದ್ದವು. ಇಂತಹ ಒಂದು ಅದ್ಭುತ ದೃಶ್ಯವನ್ನು ನಾನು ನೋಡಿರಲಿಲ್ಲ. ಮೋಡಗಳ ಅಡಚಣೆ ಇಲ್ಲದಿದ್ದರೆ ಅದ್ಭುತವಾದ ವೀಕ್ಷಣೆ ಸಾಧ್ಯ. ಮನಸ್ಸಿಗೆ ಅಂತ್ಯಂತ ಖುಷಿ ಕೊಡುವ ತಾಣ.ಹಸಿರಿನ ದಟ್ಟ ಕಾನನ, ಬೆಳ್ಳಿ ಗೆರೆಯಂತೆ ಕಾಣಿಸುವ ಜಲಧಾರೆಗಳು, ಹಿತವಾದ ಮಳೆ, ಸ್ವರ್ಗವೇನೂ ಅಂತ ಅನ್ನಿಸುತ್ತಿತ್ತು.

ಸಾವಂತವಾಡಿ: ಸಾವಂತವಾಡಿ ಭೋಂಸಲೇ ಅರಸರ ರಾಜಧಾನಿ. ಸುಂದರ ಕೆರೆ, ಕೋಟೆ, ರಾಜಮಹಲ್, ದರ್ಬಾರ್ ಹಾಲ್, ಅರಮನೆ ಇನ್ನೂ ರಾಜಮನೆತನದ ಜೀವಂತಿಕೆಯನ್ನು ಉಳಿಸಿವೆ. ಮರದ ಗೊಂಬೆಗಳು, ಸುಂದರ ಕೆತ್ತನೆಗಳು, ಗಂಜಿಫಾ (ಮೊಘಲ್ ) ಮಾದರಿಯ ಚಿತ್ರಕಲೆ ಇಲ್ಲಿನ ವಿಶೇಷ.

ಚಿತ್ರಕಲೆಯನ್ನು ರಾಜಮಾತೆ ಸತ್ವಶೀಲ ದೇವಿ ಇಂದಿಗೂ ಉಳಿಸಿ ಬೆಳೆಸಿಕೊಂಡು ಬಂದಿದ್ದಾರೆ. ಅರಮನೆಯ ಸಂಗ್ರಹಾಲಯದಲ್ಲಿ ರಾಜಮನೆತನದ ಚಿತ್ರಪಟಗಳು, ಆಯುಧ, ನಿತ್ಯೋಪಯೋಗಿ ವಸ್ತುಗಳನ್ನು ಪ್ರದರ್ಶನಕ್ಕೆ ಇಡಲಾಗಿದೆ.

ಸಾವಂತವಾಡಿಯಲ್ಲಿ ಊಟ ಮುಗಿಸಿ, ವಾಪಾಸು ಬೆಳಗಾವಿಯತ್ತ ಹೊರಟೆವು. ಹೆಚ್ಚಿನ ಪ್ರವಾಸಿಗರು, ವಾಹನ ದಟ್ಟಣೆಯಿಂದಾಗಿ ಬೆಳಗಾವಿ ತಲುಪಿದಾಗ ಸಂಜೆ ೬ ಗಂಟೆ ಆಗಿತ್ತು. ನನ್ನ ಅನುಭವದ ಪ್ರಕಾರ, ಅಂಬೋಲಿಗೆ ವಾರದ ದಿನಗಳಂದು ಹೋಗುವುದು ಉತ್ತಮ. ಅಥವಾ ಮುಂಜಾನೆ ಬೇಗನೆ ಅಲ್ಲಿಗೆ ತಲುಪುವುದು ಉತ್ತಮ. ಅದಿಲ್ಲದಿದ್ದರೆ ವಾರದ ಕೊನೆಯ ದಿನಗಳು, ರಜಾ ದಿನಗಳಂದು ವಿಪರೀತ ಜನ ದಟ್ಟನೆ, ವಾಹನ ದಟ್ಟನೆ ಇರುತ್ತದೆ. ಜಲಪಾತದ ತುಂಬೆಲ್ಲ ಪ್ರವಾಸಿಗರು ಗಿಜಿಗುಟ್ಟುತ್ತಿರುತ್ತಾರೆ. ನಮಗಂತೂ ವಾಪಾಸು ಬರುವಾಗ ಸಾಕಾಗಿ ಹೋಗಿತ್ತು...!!

ಸಂಜೆ ಸಂತೋಷ್ ಬಾವನ ಮನೆಯಲ್ಲಿ ಕರದಂಟು ಸವಿದು, ಚಹಾ ಕುಡಿದು, ಅವರ ಸಹಕಾರಕ್ಕಾಗಿ ಥ್ಯಾಂಕ್ಸ್ ಹೇಳಿ, ಬೆಂಗಳೂರಿಗೆ ಹೋಗುವ VRL ಬಸ್ಸಿನಲ್ಲಿ ವಾಪಾಸು ಹೊರಟೆವು.

ಮೈಸೂರಲ್ಲಿ ಒಂದು ದಿನ

2009-07-11T03:37:00.000-07:00

೧೬ ಮೇ ಶನಿವಾರ ಸಂಜೆ "ಸವಾರಿ" ಫಿಲಂ ನೋಡಿ ಮೈಸೂರ್ ರೋಡಿನಲ್ಲಿ ಧಾಭ ಒಂದಕ್ಕೆ ಊಟಕ್ಕೆ ಹೋಗಿದ್ದೆವು. ತಂದೂರಿ ರೋಟಿ, ಬಿಂಡಿ ಪಲ್ಯ, ದಾಲ್ ಫ್ರೈ ತಿಂದು ಕೊನೆಯಲ್ಲಿ ಮೊಸರನ್ನ ಊಟಮಾಡಿ, ಬೀಡ ಸವಿಯುತ್ತಿರಬೇಕಾದರೆ ಮೈಸೂರಿಗೆ ಹೋಗುವ ವಿಷಯ ನಮ್ಮ ಗುಂಪಿನಲ್ಲಿ ಸುಳಿದಾಡಿತು. ಮರುದಿನ ಭಾನುವಾರ. ಯಾವ ಪರ್ಸನಲ್ ಕೆಲಸವೂ ಇರಲಿಲ್ಲದ್ದರಿಂದ ಮೈಸೂರಿಗೆ ಹೋಗಿ ಬರುವ ಪ್ಲಾನ್ ಧೃಢವಾಯಿತು. ಹಾಗೆಯೇ ಅಲ್ಲಿಂದ ನೇರವಾಗಿ ಮೈಸೂರ್ ಕಡೆ ಕಾರನ್ನು ತಿರುಗಿಸಿದೆ. ಹರಿಹರನ್ ಅವರ ಮಧುರ ಗಝಲ್ ಕೇಳುತ್ತಾ, ನೀರಳ ರಾತ್ರಿಯ ತಣ್ಣನೆಯ ಗಾಳಿಯಲ್ಲಿ, ನುಣುಪಾದ ಮೈಸೂರು ರಸ್ತೆಯಲ್ಲಿ ಕಾರನ್ನು ಓಡಿಸುವ ಮಜವೇ ಬೇರೆ...!!ಮೈಸೂರಿನಲ್ಲಿ ನನ್ನ ಕಸಿನ್ ರಂಗನ ಮನೆಗೆ ಹೋದಾಗ ರಾತ್ರಿ ೩ ಗಂಟೆ ಆಗಿತ್ತು. ಸ್ವಲ್ಪ ಹೊತ್ತು ಹರಟೆ ಹೊಡೆದು ಹಾಗೆ ಬೆಚ್ಚಗಿನ ನಿದ್ದೆಗೆ ಜಾರಿದೆವು.

ಭಾನುವಾರ ಬೆಳಿಗ್ಗೆ ಬೇಗನೆ ಎದ್ದು ಸ್ನಾನ ಕರ್ಮಾದಿಗಳನ್ನು ಮುಗಿಸಿ, ಚಾಮುಂಡಿ ದೇವಿಯ ದರ್ಶನಕ್ಕೆ ಚಾಮುಂಡಿ ಬೆಟ್ಟಕ್ಕೆ ಹೋದೆವು. ದೇವಾಲಯವು ಆಗಲೇ ಭಕ್ತರಿಂದ ತುಂಬಿತ್ತು. ಸಾಲಿನಲ್ಲಿ ನಿಂತು ದೇವಿಯ ದರ್ಶನ ಭಾಗ್ಯ ಪಡೆದೆವು. ಅಲಂಕೃತ ಮಂದಸ್ಮಿತ ಚಾಮುಂಡಿ ದೇವಿಯ ದರ್ಶನ ನಿಜಕ್ಕೂ ಮನಸ್ಸಿಗೆ ಪುಳಕ... ಧನ್ಯತೆಯ ಭಾವ...!!

ಕೃಷ್ಣಶಿಲೆಯ ಬೃಹದಾಕಾರದ ನಂದಿಯು ಒಂದೇ ಕಲ್ಲಿನಿಂದ ಕೆತ್ತಲ್ಪಟ್ಟಿದ್ದು. ವಾಡಿಕೆಯಂತೆ ಶಿವನ ದೇವಸ್ಥಾನದ ಮುಂದೆ ನಂದಿಯನ್ನ ಪ್ರತಿಸ್ಥಾಪಿಸಲಾಗಿರುತ್ತದೆ. ಆದರೆ ಇಲ್ಲಿ ಶಿವನ ವಿಗ್ರಹ ಇಲ್ಲ..! ಶಿವ ಮತ್ತು ಪಾರ್ವತಿಯ ಮಧ್ಯೆ ಜಗಳ ನಡೆದು, ಶಿವನು ಮುನಿಸಿಕೊಂಡು ಯಾರ ಕಣ್ಣಿಗೂ ಕಾಣಿಸ ಕೂಡದೆಂದು ಮಲೆ-ಮಹದೇಶ್ವರ ಬೆಟ್ಟಗಳ ಮಧ್ಯೆ ವಾಸವಾಗುತ್ತಾನೆ. ಶಿವನನ್ನು ಹುಡುಕುವ ಸಲುವಾಗಿ ಪಾರ್ವತಿಯು ಚಾಮುಂಡಿ ಬೆಟ್ಟಕ್ಕೆ ಬಂದು ಹುಡುಕುತ್ತಾಳೆ, ಅದರೂ ಶಿವನು ಕಾಣಿಸುವುದಿಲ್ಲ. ನಂದಿಯು ಅರ್ಧ ಬೆಟ್ಟವನ್ನು ಹತ್ತಿ ಅಲ್ಲಿಯೇ ವಿರಮಿಸುತ್ತಾನೆ ಎಂಬ ಪುರಾಣ ಕಥೆಯು ಪ್ರಚಲಿತವಾಗಿದೆ.

ನಂದಿಯ ಸುಂದರ ವಿಗ್ರಹವು ೪.೭ ಮೀ ಎತ್ತರ ಮತ್ತು ೬.೧೦ ಮೀ ಉದ್ದ ಇದೆ. ಶಿವರಾತ್ರಿ ಮತ್ತು ಮಸ್ತಕಾಭಿಷೇಕ ದಿನಗಳಲ್ಲಿ ವಿಶೇಷ ಪೂಜೆ ಇರುತ್ತದೆ.

ನಂದಿ ವಿಗ್ರಹದ ಬಳಿ ಸಿಕ್ಕಿದ ಈ ಬಾಲವೇಷದ ಈ ಹುಡುಗ ಸುಂದರವಾಗಿ ಹಾಡುತ್ತಿದ್ದ..!

ಬೆಳಗಿನ ಉಪಹಾರಕ್ಕೆಂದು ಪ್ರಸಿದ್ಧ "ಮೈಲಾರಿ" ದೋಸೆ ಹೋಟೆಲಿಗೆ ಹೋಗಿದ್ದೆವು. ಬೆಂಗಳೂರಿನ ' MTR ' ಮತ್ತು ವಿದ್ಯಾರ್ಥಿ ಭವನದಂತೆಯೇ ಮೈಸೂರಿನಲ್ಲಿ ಮೈಲಾರಿ ಹೋಟೆಲು ಬೆಣ್ಣೆ ದೋಸೆಗೆ ಪ್ರಸಿದ್ದಿ. ಬಾಯಲ್ಲಿ ನೀರೂರಿಯುವ ಅಪ್ಪಟ ಬೆಣ್ಣೆಯ ಗರಿ ಗರಿ ದೋಸೆ..ರುಚಿಯಾದ ಕೊಬ್ಬರಿ ಚಟ್ನಿ! ಒಬ್ಬೊಬ್ಬರೂ ೪-೫ ದೋಸೆ ತಿಂದು ತೇಗಿದೆವು..!

ಕಾರಂಜಿಕೆರೆ ಸುಂದರ ಮತ್ತು ಪ್ರಶಾಂತವಾದ ತಾಣ. ಚಾಮುಂಡಿ ಬೆಟ್ಟದ ತಪ್ಪಲಿನಲ್ಲಿ ಇರುವ ಕಾರಂಜಿ ಕೆರೆಯು ಸುಮಾರು ೯೦ ಎಕರೆ ವಿಸ್ತೀರ್ಣದಲ್ಲಿದೆ. ದೋಣಿ ವಿಹಾರ, ಚಿಟ್ಟೆ ವನ, ಪಕ್ಷಿವನ, ಹಸಿರು ಗಿಡಮರಗಳು, ಸುಂದರ ಹುಲ್ಲುಹಾಸು ಇಲ್ಲಿನ ವಿಶೇಷ.

ಪಕ್ಷಿವನ ಭಾರತದಲ್ಲಿಯೇ ಅತಿ ಉದ್ದದ ಹಾಗೂ ದೊಡ್ಡದಾದ ಪ್ರದೇಶವಾಗಿದೆ. ವಿವಿಧ ಜಾತಿಯ ಹಕ್ಕಿಗಳು, ಚಂದದ ಚಿಟ್ಟೆಗಳು ಮನಸೂರೆಗೊಳಿಸುತ್ತವೆ. ಪ್ರಶಾಂತವಾದ ಕೆರೆಯು ದೋಣಿ ವಿಹಾರಕ್ಕೆ ಮುದ ನೀಡುತ್ತದೆ.

ನಿಸರ್ಗ ಪ್ರಿಯರಿಗೆ, ಛಾಯಾಗ್ರಾಹಕರಿಗೆ ಇದು ಹೇಳಿ ಮಾಡಿಸಿದ ಜಾಗ....ಹಾಗೇಯೇ ಪ್ರೇಮಿಗಳಿಗೂ ಕೂಡ...!! ಕಾರಂಜಿ ಕೆರೆಯು ಮೈಸೂರು ಪ್ರಾಣಿಸಂಗ್ರಹಾಲಯ ಪ್ರಾಧಿಕಾರದ ಉಸ್ತುವಾರಿಯಲ್ಲಿದೆ. ಇಲ್ಲಿನ ಸ್ವಚ್ಛತೆ ನಿಜಕ್ಕೂ ಪ್ರಶಂಸಾರ್ಹ...!!

ಮೈಸೂರು ವಿಶ್ವವಿದ್ಯಾಲಯದ ಹತ್ತಿರ ಇರುವ "ಮನೆ" ಎಂಬ ಹೋಟೆಲಿನಲ್ಲಿ ಸೊಗಸಾದ ಜೋಳದ ರೊಟ್ಟಿ ಊಟ ಮುಗಿಸಿ " ಬಲಮುರಿ" ಗೆ ಹೋದೆವು. ಈ ತಾಣ ಸಾಮಾನ್ಯವಾಗಿ ಎಲ್ಲರಿಗೂ ಚಿರಪರಿಚಿತ. ಕಾವೇರಿ ನದಿ ತೀರದ, ಹೆಚ್ಚು ಅಪಾಯವೂ ಇಲ್ಲದ ಯಾವಾಗಲೂ ಪ್ರವಾಸಿಗರಿಂದ ತುಂಬಿರುವ ಜಾಗ. ಇಲ್ಲಿ ವರ್ಷಪೂರ್ತಿ ನೀರಿರುವುದರಿಂದ ಪ್ರವಾಸಿಗರು ಜಾಸ್ತಿ. ನದಿಯು ತುಂಬಿದಾಗ ಸಣ್ಣ ಅಣೆಕಟ್ಟೆಯ ಮೇಲಿಂದ ನೀರು ಹರಿದು ಸುಂದರ ಜಲಪಾತವನ್ನು ಕೂಡ ಸೃಷ್ಟಿಸುತ್ತದೆ.

ಗಣೇಶನ ಸನ್ನಿಧಿಯಲ್ಲಿ ನಮಸ್ಕರಿಸಿ, ಯಾವುದೇ ಅಪಾರ ಬರದಿರಲೆಂದು ಪ್ರಾರ್ಥಿಸಿ, ತೃಪ್ತಿಯಾಗುವಷ್ಟು ಸಮಯ ನೀರಿನಲ್ಲಿ ಈಜಾಡಿದೆವು!!!
ಅಲ್ಲಿಂದ, ನಂಜನಗೂಡಿನ ಪ್ರಸಿದ್ಧ ಈಶ್ವರ ದೇವಾಲಯದ ದರ್ಶನಕ್ಕೆಂದು ಹೊರಟೆವು. ವಾಹನ ದಟ್ಟಣೆಯಿಂದಾಗಿ ನಂಜನಗೂಡು ತಲುಪುವದರೊಳಗೆ ಕತ್ತಲಾಗಿತ್ತು. ಗೋಪುರ, ಸುಂದರ ಕಲ್ಲಿನ ಕೆತ್ತನೆಗಳು, ಅದ್ಭುತ ಕುಸುರಿಯ ವಿಗ್ರಹಗಳು ಇಲ್ಲಿ ನೋಡಲೇ ಬೇಕಾದುದು.

ಕತ್ತಲಾದ್ದರಿಂದ ಅಲ್ಲಿನ ಸೌಂದರ್ಯವನ್ನು ಕಣ್ತುಂಬಿಕೊಳ್ಳಲಾಗಲಿಲ್ಲ, ಕಾಮರದಲ್ಲೂ ಸೆರೆಹಿಡಿಯಲಾಗಲಿಲ್ಲ. ಮತ್ತೊಮ್ಮೆ ಇಲ್ಲಿಗೆ ಬರಲೇ ಬೇಕು..!!

ನಗರದ ಮಧ್ಯಭಾಗದಲ್ಲಿರುವ "ಫುಡ್ ಕೋರ್ಟ್" ನಲ್ಲಿ ರಾತ್ರಿಯ ಊಟ ಮುಗಿಸಿ, ಸುಂದರ ದಿನವೊಂದನ್ನು ಕಳೆದಿದ್ದಕ್ಕೆ ಮೈಸೂರಿಗೊಂದು ವಿದಾಯ ಹೇಳಿ, ಬೆಂಗಳೂರಿನ ಹೈವೆನಲ್ಲಿ ಕಾರು ಚಲಾಯಿಸಿದೆ..! ಮತ್ತೆ ಅದೇ ಹರಿಹರನ್ ಗಝಲ್...!!

ಶಿವನಸಮುದ್ರ - ಗಗನಚುಕ್ಕಿ ಮತ್ತು ಭರಚುಕ್ಕಿ ಜಲಪಾತ

2009-06-30T04:53:00.000-07:00

ಕಾವೇರಿ ನದಿಯ ಪಾತ್ರದಲ್ಲಿ ಸಮೃದ್ಧವಾಗಿ ಮಳೆಯಾಗಿದ್ದರಿಂದ ಕಳೆದ ವರ್ಷ ಶಿವನಸಮುದ್ರ ಜಲಪಾತವು ನಿಜವಾದ ಸೌಂದರ್ಯವನ್ನು ತಳೆದಿತ್ತು. ಸರಕಾರದವರು "ಜಲಪಾತೋತ್ಸವ" ವನ್ನು ಕೂಡ ಆಚರಿಸಿದ್ದರು. ಇದೆ ಸಂದರ್ಭದಲ್ಲಿ (೦೯-೦೯-೨೦೦೭) ಶಿವನಸಮುದ್ರದ ಸೌಂದರ್ಯವನ್ನು ಕಣ್ತುಂಬಿಕೊಳ್ಳಲು ನಾವು ಕೂಡ ಪಾಲ್ಗೊಂಡಿದ್ದೆವು. ಒಟ್ಟು ೮ ಮಂದಿ, ೪ ಬೈಕ್. ನಾನು, ರಂಗ, ಅರವಿಂದ, ಮಹೇಶ, ಪ್ರಸನ್ನ, ಕಿರಣ್, ಸುಹಾಸ್ ಮತ್ತು ಸಂತೋಷ್, ೩ ಪಲ್ಸರ್ ಮತ್ತು ೧ ಡಿಸ್ಕೋವರ್ ನಲ್ಲಿ ಬೆಳಿಗ್ಗೆ ೭ ಗಂಟೆಗೆ ವಿಜಯನಗರದಿಂದ ಹೊರಟೆವು. ಕೆಂಗೇರಿಯಲ್ಲಿ ಸಂತು ಬೈಕ್ ನ ಇಂಜಿನ್ ಆಯಿಲ್ ಬದಲಾಯಿಸಿ, ಅಲ್ಲೇ ಟೀ ಕುಡಿದು ನಮ್ಮ ಪ್ರಯಾಣವನ್ನು ಚುರುಕುಗೊಳಿಸಿದೆವು.

ಬೆಳಗಿನ ನಿರಂತರ ೧.೩೦ ತಾಸು ಆಹ್ಲಾದಕರ ಪ್ರಯಾಣದ ನಂತರ ಮಂಡ್ಯ ತಲುಪಿದೆವು. ಮಂಡ್ಯದ ಪಕ್ಕದ ಹಳ್ಳಿಯಲ್ಲಿ ನಮ್ಮ ಮಹೇಶ್ ಗೌಡ್ರ ಮನೆ ಇರುವುದು. ಸಣ್ಣ ಸಣ್ಣ ತೊರೆ, ಹಸಿರು ಬತ್ತದ ಗದ್ದೆ, ಕಬ್ಬಿನ ಹೊಲದ ಮಧ್ಯೆ ಸುಂದರ ಮನೆ. ಮಹೇಶನ ಮನೆಯಲ್ಲಿ ಪಲಾವ್ ತಿಂದು, ಕಾಫಿ ಕುಡಿದು ಹಾಗೆ ಸುತ್ತಲಿನ ಪರಿಸರದಲ್ಲಿ ಓಡಾಡಿದೆವು.
ಮಂಡ್ಯದಿಂದ ಹೊರಟು ಮಳವಳ್ಳಿ ಮಾರ್ಗವಾಗಿ ಶಿವನಸಮುದ್ರ ತಲುಪಿದಾಗ ೧೧ ಗಂಟೆ ಆಗಿತ್ತು. ಅಲ್ಲಿಯವರೆಗೂ ರಸ್ತೆ ಉತ್ತಮವಾಗಿದ್ದು, ಬೈಕ್ ಓಡಿಸಲು ತುಂಬಾ ಖುಷಿಯಾಗಿತ್ತು. ಮೊದಲು ಗಗನಚುಕ್ಕಿ ಜಲಪಾತದ ಬಳಿ ಬಂದೆವು.

ಮಳೆಗಾಲದ ಸಮಯವಾಗಿದ್ದರಿಂದ ಸುತ್ತಲು ಹಸಿರು ಹಾಗು ಹೆಚ್ಚಿನ ನೀರು ಜಲಪಾತದ ಸೌಂದರ್ಯವನ್ನು ಅದ್ಭುತವಾಗಿಸಿತ್ತು.

ಕಾವೇರಿ ನದಿಯು ಶಿವನಸಮುದ್ರದ ಬಳಿ ೨ ಕವಲಾಗಿ ಹರಿದು ಗಗನಚುಕ್ಕಿ ಮತ್ತು ಭರಚುಕ್ಕಿ ಎಂಬ ಸ್ಥಳಗಳಲ್ಲಿ ಆಳಕ್ಕೆ ಧುಮುಕಿ ಸುಂದರ ಜಲಪಾತದ ಸೃಷ್ಟಿಸಿ, ಮುಂದೆ ಒಂದಾಗಿ ಹರಿಯುತ್ತದೆ . ಈ ಎರಡು ಜಲಪಾತಗಳ ಅಂತರ ಸುಮಾರು ೩ ಕಿ.ಮೀ. ಗಗನಚುಕ್ಕಿ ವಿಶಾಲವಾಗಿದೆ, ಭರಚುಕ್ಕಿಯಲ್ಲಿ ನೀರಿನ ಸೆಳೆತ ಹೆಚ್ಚು. ಇದಕ್ಕೆ ಶಿಂಶಾ ಅಂತಲೂ ಹೆಸರಿದೆ. ಹಾಲು ಬಣ್ಣದ ಕಾವೇರಿ ಇಲ್ಲಿ ಮೈತುಂಬಿ ಹರಿಯುತಿದ್ದಳು..! ಇಲ್ಲಿನ ಸೌಂದರ್ಯ ಹುಚ್ಚೆದ್ದು ಕುಣಿಯುವಂತಾಗಿತ್ತು. ಇಲ್ಲಿ ಒಂದು ದರ್ಗಾ ಇದೆ. ದರ್ಗಾದ ಹಿಂಭಾಗದಿಂದ ಜಲಪಾತದ ಮೇಲ್ಭಾಗಕ್ಕೆ ಹೋಗಬಹುದು. ತೃಪ್ತಿಯಾಗುವಷ್ಟು ಸಮಯ ಜಲಪಾತವನ್ನು ವೀಕ್ಷಿಸಿ ಅಲ್ಲಿಂದ ಹೊರಟು ಭರಚುಕ್ಕಿ ಜಲಧಾರೆಯ ಬಳಿ ಬಂದೆವು.

ಇಲ್ಲಿ ಜಲಪಾತದ ಕೆಳಗೆ ನೀರಿನ ಸನಿಹಕ್ಕೆ ಹೋಗಬಹುದು. ಅದ್ಭುತವಾದ ವೀಕ್ಷಣೆ ಇಲ್ಲಿಂದ ಸಾಧ್ಯ..!! ಪ್ರವಾಸಿಗರನ್ನು ಸಾಗಿಸಲು ತೆಪ್ಪದ ವ್ಯವಸ್ಥೆಯು ಇತ್ತು...! ತೆಪ್ಪದ ಮೂಲಕ ನಾವೆಲ್ಲ ಜಲಪಾತದ ಬುಡಕ್ಕೆ ಹೋಗಿದ್ದೆವು..ಅದೊಂದು ಅವಿಸ್ಮರಣೀಯ ಅನುಭವ...! ಅಗಾಧ ಜಲಧಾರೆ..! ಅಷ್ಟೇ ಅಪಾಯವು ಹೌದು.. ! ಪ್ರಕೃತಿಯ ಮುಂದೆ ನಾವೆಲ್ಲಾ ತೃಣಕ್ಕೆ ಸಮಾನ ಅನ್ನಿಸಿತು..! ಹಸಿವಿನ ಅರಿವಿಲ್ಲದೆ ಸುಮಾರು ೩ ಗಂಟೆಗಳ ಕಾಲ ಜಲಪಾತದ ಸವಿಯನ್ನು ಅನುಭವಿಸಿದೆವು.

ಶಿವನಸಮುದ್ರದ ಸಹಜ ಸೌಂದರ್ಯ ಎಲ್ಲರನ್ನು ಬೇಗ ಮನಸೂರೆಗೊಳಿಸುತ್ತದೆ. ಅಲ್ಲಿನ ಹೋಟೆಲೊಂದರಲ್ಲಿ ಮಧ್ಯಾನ್ನದ ಊಟ ಮಾಡಿದೆವು. ಇಲ್ಲಿ ಊಟಕ್ಕೆ ಅಚ್ಚುಕಟ್ಟಾದ ಹೋಟೆಲಿನ ವ್ಯವಸ್ಥೆ ಇಲ್ಲ.

ಈ ಸುಂದರ ಸೇತುವೆಯ ಚಿತ್ರ ಗೆಳೆಯ ವಿನಾಯಕನ ಕೃಪೆ. ಇದು ಗಗನಚುಕ್ಕಿ ಮತ್ತು ಭರಚುಕ್ಕಿ ನಡುವಿನ ಹಾದಿಯಲ್ಲಿ ಸಿಗುವುದು. ಇಲ್ಲಿನ ಸುಂದರ ಪರಿಸರದಲ್ಲಿ ಅನೇಕ ಚಲನಚಿತ್ರಗಳ ಚಿತ್ರೀಕರಣ ನಡೆದಿದೆ..!!
ಶಿಂಶಾ ಊರಿನಲ್ಲಿ ಜಲವಿದ್ಯುತ್ ಸ್ಥಾವರ ಇದೆ. ಇದು ಏಷ್ಯ ಖಂಡದಲ್ಲಿಯೇ ಮೊದಲನೇ ಜಲವಿದ್ಯುತ್ ಸ್ಥಾವರ. ಇದರ ವೀಕ್ಷಣೆಗೆ ವಿಶೇಷ ಅನುಮತಿಯ ಅಗತ್ಯ ಇದೆ. ನಾವು ಹೊರಗಿನಿಂದಲೇ ಒಂದು ಸುತ್ತು ಹಾಕಿದೆವು. ಸ್ಥಾವರದಿಂದ ಬಂದ ನೀರು ಮುಂದೆ ಹರಿದು ಮೆಟ್ಟೂರು ಆಣೆಕಟ್ಟನ್ನು ಸೇರುತ್ತದೆ.

ಶಿಂಶಾದಿಂದ ಹೊರಟಾಗ ಸಣ್ಣಗೆ ಮಳೆ ಶುರುವಾಗಿತ್ತು. ಹಾಗೆಮಳೆಯಲ್ಲಿಯೇ ಸ್ವಲ್ಪ ದೂರ ಬೈಕನ್ನು ಓಡಿಸಿದೆವು, ಮಳೆಯು ಜಾಸ್ತಿ ಆದಾಗ ಅಲ್ಲಲ್ಲಿ ಸಿಗುತ್ತಿದ್ದ ಆಲೆಮನೆ, ಕೋಳಿ ಫಾರ್ಮ್ ನಲ್ಲಿ ಸ್ವಲ್ಪ ಹೊತ್ತು ನಿಂತಿದ್ದೆವು...!
ಮದ್ದೂರಿಗೆ ಬಂದು ವಡೆ ಚಪ್ಪರಿಸಿ, ಕಾಫಿ ಹೀರಿ ಬೆಂಗಳೂರಿನತ್ತ ಹೊರಟೆವು. ವಾಪಾಸು ಬರುವಾಗ ಅರವಿಂದ ಅವನ ಹ್ಯಾಂಡಿಕ್ಯಾಮ್ ನಲ್ಲಿ ಎಲ್ಲ ದೃಶ್ಯವನ್ನು ಸೆರೆಹಿಡಿಯುತಿದ್ದ.. !

ಈ ವರ್ಷ ಕೂಡ ಕಳೆದ ವರ್ಷದಂತೆಯೇ ಮಳೆ ಬರಲಿ....! ಮತ್ತೊಮ್ಮೆ ಜಲಪಾತ ಮೈದುಂಬಲಿ...!!

ಸ್ವಾತಂತ್ರ್ಯ ಉದ್ಯಾನವನ

2009-06-17T05:47:00.000-07:00

ಮೇ ೩೧, ಭಾನುವಾರ, ನಾನು ಅರವಿಂದ, ಸುಹಾಸ್ ಮತ್ತು ಕಿರಣ್ ಹಳೆಯ ಕಾರಾಗೃಹದಲ್ಲಿ ಒಂದು ಸಂಜೆಯನ್ನು ಕಳೆದೆವು...!
ಆಗಿನ ಕೇಂದ್ರ ಕಾರಗೃಹವೇ ಈಗ ಸುಂದರ ಸ್ವಾತಂತ್ರ್ಯ ಉದ್ಯಾನವನವಾಗಿದೆ...!

ನಮ್ಮ ಬೆಂಗಳೂರಿನ ಹೃದಯಭಾಗದಲ್ಲಿರುವ ಕೇಂದ್ರ ಕಾರಾಗೃಹವನ್ನ ೧೮೬೫-೬೬ ರಲ್ಲಿಯೇ ಕಟ್ಟಲಾಯಿತು. ಸುಮಾರು ೨೧ ಎಕರೆ ಜಾಗದಲ್ಲಿ ವಾಚ್ ಟವರ್, ಬ್ಯಾರಕ್ ಗಳು, ಆಸ್ಪತ್ರೆ, ವರ್ಕ್-ಶಾಪ್ ಮೊದಲಾದ ಕಟ್ಟಡಗಳು ಇದ್ದವು. ಸದೃಢವಾದ ಎತ್ತರ ಗೋಡೆಯು ಇಡೀ ಪ್ರದೇಶವನ್ನು ಸುತ್ತುವರೆದಿದೆ.

ಈ ಕಾರಾಗೃಹವು ಪರಪ್ಪನ ಅಗ್ರಹಾರಕ್ಕೆ ಸ್ಥಳಾಂತರಿಸಿದಾಗ ಸರಕಾರದವರು ಇದನ್ನ ಉದ್ಯಾನವನವನ್ನಾಗಿ ಪರಿವರ್ತಿಸಿದರು. ೧೫ ಎಕರೆ ಸ್ವಾತಂತ್ರ್ಯ ಉದ್ಯಾನವನವನ್ನು ಸುಮಾರು ೧೭.೩೫ ಕೋಟಿ ರೂಗಳ ಮೊತ್ತದಲ್ಲಿ ನಿರ್ಮಿಸಲಾಗಿದೆ. ಲಂಡನ್ ನ ಹೈಡ್ ಉದ್ಯಾನವನದ ಮಾದರಿಯಲ್ಲಿ ೬ ಎಕರೆ ಪ್ರತ್ಯೇಕ ವಿಶಾಲವಾದ ಪ್ರದೇಶದಲ್ಲಿ ಪ್ರತಿಭಟನೆಗೆ ಅವಕಾಶ ಕಲ್ಪಿಸಲಾಗಿದೆ...ಇದರಿಂದ ನಗರ ಕೇಂದ್ರದಲ್ಲಿ ಪ್ರತಿಭಟನೆ ಮತ್ತು ಮೆರವಣಿಗೆ ಇಂದಾಗಿ ಸಂಚಾರ ಅಸ್ತವ್ಯಸ್ತ ಕಡಿಮೆ ಆಗಲಿದೆ..!!! :-)

ಉದ್ಯಾನವನದ ಮುಖ್ಯ ಉದ್ದೇಶ ನಗರದ ಹೃದಯ ಭಾಗದಲ್ಲಿ ಹಸಿರನ್ನು ಸೃಷ್ಟಿಸುವುದು. ಇಲ್ಲಿನ ವಾಸ್ತುಶಿಲ್ಪ ಅಧ್ಬುತವಾಗೆನು ಇಲ್ಲ. ಆದರೂ ಮನಸ್ಸಿಗೆ ಹಿಡಿಸುತ್ತದೆ. ಹಸಿರು ಮರಗಳು, ಹೂವಿನ ಗಿಡಗಳು, ಹಾಸು ಎಲ್ಲವು ಸುಂದರ. ಹಾಗೆಯೇ ಚಿಣ್ಣರಿಗೆ ಆಡಲು ಸಾಕಷ್ಟು ಸ್ಥಳಾವಕಾಶ ಇದೆ, ಅದಕ್ಕಾಗಿಯೇ ವಿಶೇಷ ಆಟಿಕೆಗಳೂ ಇದೆ. ಕೈದಿಗಳು ಇದ್ದ ಕೊಠಡಿಯನ್ನು ಹಾಗೆಯೇ ಇಡಲಾಗಿದೆ.. ವೀಕ್ಷಣಾ ಗೋಪುರ, ಸಮಾನಾಂತರ ಗೋಡೆ ವಿಶೇಷ ಆಸಕ್ತಿಯನ್ನು ಹುಟ್ಟಿಸುತ್ತದೆ. ರಂಗಮಂದಿರ ಸದುಪಯೋಗವಾದರೆ ಸುಂದರ ಸಂಜೆಯನ್ನ ಸೃಷ್ಟಿಸಬಹುದು...!! ಪಾರ್ಕಿಂಗ್ ವ್ಯವಸ್ಥೆ ಕೂಡ ಇದೆ.

ನಮ್ಮ ಬೆಂಗಳೂರಿನಲ್ಲೂ ಇಂತಹ ಸುಂದರ ವಿಶಾಲವಾದ ಹಸಿರು ತಾಣ ಇರುವುದು ಆಶ್ಚರ್ಯ. ಉಳಿದ ಉದ್ಯಾನವನದಂತೆ ಹಾಳಾಗುವ ಮೊದಲು ಒಮ್ಮೆ ಕುಟುಂಬ ಸಮೇತ ಹೋಗಿ ಬನ್ನಿ...!

ಸಾಗರ ಸುತ್ತ ಮುತ್ತ

2009-05-20T01:46:00.000-07:00

ಸಾಗರದ ಜಾತ್ರೆಯನ್ನು ನೋಡಲು ಗೆಳೆಯರನ್ನು ಊರಿಗೆ ಕರೆದೊಯ್ದಿದ್ದೆ. ಜಾತ್ರೆಯ ಅಂದ ಸಂಜೆಯ ಮೇಲೆಯೇ. ಹಾಗಾಗಿ ದಿನದ ಸಮಯದಲ್ಲಿ ಸಾಗರದ ಸುತ್ತ ಮುತ್ತ ಇರುವ ಸುಂದರ ತಾಣಗಳಿಗೆ ಹೋಗಿದ್ದೆವು.ಸಾಗರದಿಂದ ನಾನು, ಡಿಂಗ, ಅರವಿಂದ, ದೂದ್ ಮತ್ತು ರಂಗ ನಮ್ಮ ಮಾರುತಿ-800 ನಲ್ಲಿ ಬೆಳಿಗ್ಗೆ ೧೦ ಗಂಟೆಗೆ ಹೊರಟೆವು.

ಹೊಳೆಬಾಗಿಲು : ಸಾಗರದಿಂದ ೨೫ ಕಿ.ಮೀ ದೂರದಲ್ಲಿರುವ ಶರಾವತಿ ನದಿಯ ಹಿನ್ನೀರು ಪ್ರದೇಶಕ್ಕೆ ಹೊಳೆಬಾಗಿಲು ಎಂದು ಹೆಸರು. ಸಾಗರ ಮತ್ತು ತುಮರಿ ಊರುಗಳಿಗೆ ಇದೇ ಸಂಪರ್ಕ ಕೊಂಡಿ. ನೂರಾರು ಎಕರೆ ಪ್ರದೇಶದಲ್ಲಿ ಎಲ್ಲೆಲ್ಲೂ ನೀರು.

ಲಾಂಚಿನಲ್ಲಿ ಬಸ್ಸು, ಕಾರು ಮತ್ತು ಜನರನ್ನ ಒಂದು ದಡದಿಂದ ಇನ್ನೊಂದು ದಡಕ್ಕೆ ಸಾಗಿಸಲಾಗುತ್ತದೆ.

ಸಣ್ಣ ಸಣ್ಣ ದ್ವೀಪದಂತೆ ಕಾಣುವ ಗುಡ್ಡಗಳು ಹೊಳೆಬಾಗಿಲಿನ ಸೌಂದರ್ಯಕ್ಕೆ ಕಾರಣ. ನೀರಿನ ಒಡಲಲ್ಲಿ ಅದೆಷ್ಟೋ ಊರು, ಮನೆ, ಕೇರಿಗಳು, ಅಗಾಧ ಕಾಡು ಮುಳುಗಿವೆ. ನೀರ ಮೇಲೆ ತೇಲುತ್ತಾ ಸುಮಾರು ೩ ಕಿ.ಮೀ ಸಾಗುವಾಗಿನ ಅನುಭವ ಸುಂದರ. ನಮ್ಮ ಕಾರನ್ನು ಹೊಳೆಬಾಗಿಲ ಈಚೆ ದಡದಲ್ಲಿ ನಿಲ್ಲಿಸಿ, ಲಾಂಚಿನಲ್ಲಿ ಹೊರಟೆವು. ಒಬ್ಬರಿಗೆ ೧ ರೂಪಾಯಿ ಚಾರ್ಜು...!!

ಸಿಗಂದೂರು : ಲಾಂಚಿಂದ ಇಳಿದು, ಬಸ್ಸು ಅಥವಾ ಜೀಪು ಹತ್ತಿ ಸಿಗಂದೂರಿಗೆ ಹೋಗಬಹುದು. ೩ ಕಿ.ಮೀ ರಸ್ತೆ ಸ್ವಲ್ಪ ದುರಸ್ತಿಯಲ್ಲಿದೆ. "ಸಿಗಂದೂರೆಶ್ವರಿ" ಅಮ್ಮನವರ ದೇವಸ್ಥಾನವು ಸುಂದರ ಪ್ರಕೃತಿಯ ಮಧ್ಯೆ, ದಟ್ಟ ಕಾನನದಲ್ಲಿದೆ. ತನ್ನ ಶಕ್ತಿಯಿಂದಲೇ ತುಂಬಾ ಪ್ರಸಿದ್ಧಿಯಾದ ಅಮ್ಮನವರ ದೇವಸ್ಥಾನದಲ್ಲಿ ದರ್ಶನ ಮುಗಿಸಿ, ಮಂಗಳಾರತಿ, ಪ್ರಸಾದ ಸ್ವೀಕರಿಸಿ ಅಲ್ಲಿಂದ ವಾಪಾಸು ಹೊಳೆಬಾಗಿಲಿಗೆ ಬಂದೆವು. ಹಿನ್ನೀರಿನ ತೀರದಲ್ಲಿ ಸ್ವಲ್ಪ ಸಮಯ ಕಳೆದೆವು. ಮನೆಯಿಂದ ತಂದಿದ್ದ ಕೋಡುಬಳೆ, ಅವಲಕ್ಕಿ ತಿಂದು ಸಾಗರಕ್ಕೆ ವಾಪಾಸು ಬಂದೆವು.

ಸಾಗರದಿಂದ ೧೫ ಕಿ.ಮೀ ದೂರ ಇರುವ ನನ್ನ ಅಜ್ಜನಮನೆ ಸುಂದರ ಹಳ್ಳಿ, ಮನೆಯ ಮುಂದೆ ಹಸಿರು ಅಡಿಕೆ ತೋಟ, ಸಣ್ಣ ಹೊಳೆ. ಮನೆಯ ಹಿಂಭಾಗ ಎತ್ತರದ ಬೆಟ್ಟ. ಅಲ್ಲಿ ಹೋದರೆ ಶರಾವತಿ ಹಿನ್ನೀರಿನ ದೃಶ್ಯ ಲಭ್ಯ. ಅಷ್ಟೇ ಸುಂದರ ಸೂರ್ಯಾಸ್ತ ಕೂಡ.

ಮನೆಯಿಂದ ಸೌತೆಕಾಯಿ, ಬಾಳೆಹಣ್ಣು, ಚಕ್ಕುಲಿ, ನೀರಿನ ಬಾಟಲ್ ತೆಗೆದುಕೊಂಡು ಗುಡ್ಡ ಹತ್ತಲು ಶುರು ಮಾಡಿದೆವು.ಮಧ್ಯಾನ್ನ ಪುಷ್ಕಳ ಊಟ ಮಾಡಿದ್ದರಿಂದ ಎಲ್ಲರೂ ಗುಡ್ಡ ಹತ್ತಲು ಸ್ವಲ್ಪ ಪ್ರಯಾಸ ಪಡಬೇಕಾಯಿತು. ಸುಮಾರು ಒಂದು ಗಂಟೆಯ ನಡಿಗೆ, ನಾವು ಬೆಟ್ಟದ ತುದಿ ತಲುಪಿದ್ದೆವು. ಸೂರ್ಯ ಮುಳುಗಲು ತಯಾರಿ ನಡೆಸುತಿದ್ದ.

ಸುಂದರ ಶರಾವತಿ ಕಣಿವೆಯ ದೃಶ್ಯ ಮನಸ್ಸಿಗೆ ಹಿತವಾಗಿತ್ತು. ತಂದಿದ್ದ ತಿನಿಸೆಲ್ಲವನ್ನು ಖಾಲಿ ಮಾಡುತ್ತಾ ಸೂರ್ಯಾಸ್ತ ದೃಶ್ಯವನ್ನು ಸವಿದೆವು. ತಣ್ಣಗಿನ ಗಾಳಿ, ಸುತ್ತಲ ಪರಿಸರ ನಮ್ಮೆಲ್ಲರನ್ನು ಮೈಮರೆಯುವಂತೆ ಮಾಡಿತ್ತು. ಕೇಸರಿ ಬಿಳಿ ಹಸಿರು ಹೋಲಿಕೆಯ ಚಿತ್ರ.

ಅಜ್ಜನಮನೆಯಲ್ಲಿ ರಾತ್ರಿಯ ಊಟ ಮಾಡಿ, ಸಾಗರ ಜಾತ್ರೆ ನೋಡಲು ಹೋದೆವು. ಜಾತ್ರೆಯಲ್ಲಿ ಅಂದು ಜನವೋ ಜನ..!ಜಾತ್ರೆಯಲ್ಲಿ ನೋಡುವುದನ್ನೆಲ್ಲ ನೋಡಿ, ತಿನ್ನುವುದನ್ನೆಲ್ಲ ತಿಂದು, ತಿರುಗಾಡಿ, ಜಾತ್ರೆಯ ಮಜ ಅನುಭವಿಸಿದೆವು.

ಗುಡವಿ ಪಕ್ಷಿಧಾಮ : ಸೊರಬ ಪಟ್ಟಣದ ಹತ್ತಿರ ಇರುವ ಗುಡವಿ ಪಕ್ಷಿಧಾಮ ಕರ್ನಾಟಕದ ಉತ್ತಮ ೫ ಪಕ್ಷಿಧಾಮಗಳಲ್ಲೊಂದು.ಪಕ್ಷಿ ವೀಕ್ಷಕರಿಗೆ ಇದು ಸ್ವರ್ಗ. ಮೇ ತಿಂಗಳಿಂದ, ಡಿಸೆಂಬರ್ ವರೆಗೆ ಸುಮಾರು ೧೯೦ ಕ್ಕೂ ವಿವಿಧ ಬಗೆಯ ಹಕ್ಕಿಗಳನ್ನು ಇಲ್ಲಿ ನೋಡಬಹುದು. ೭೫ ಹೆಕ್ಟೇರು ವಿಶಾಲ ಗುಡವಿ ಕೆರೆ, ವಿಶಾಲವಾದ ಮರಗಳು, ಕಾಡು ವಲಸೆ ಬರುವ ಹಕ್ಕಿಗಳಿಗೆ ನೆಮ್ಮದಿಯ ಆಶ್ರಯ ತಾಣ.

ನಾವು ಇಲ್ಲಿಗೆ ಹೋದಾಗ ಕೊಕ್ಕರೆ, ನೀರು ಕಾಗೆ ಇನ್ನು ಕೆಲವು ಹಕ್ಕಿಗಳನ್ನು ಬಿಟ್ಟರೆ ಹೆಚ್ಚೇನು ಇರಲಿಲ್ಲ. ಕೆರೆಯಲ್ಲಿ ನೀರು ಕೂಡ ಕಡಿಮೆ ಆಗಿತ್ತು. ಇಲ್ಲಿನ ನಿರ್ಜನ ಪ್ರದೇಶದಲ್ಲಿ "ಜೋಡಿ-ಹಕ್ಕಿ" ಗಳು ಅಲ್ಲಲ್ಲಿ ತಮ್ಮ ತಮ್ಮ ಕೆಲಸಗಳಲ್ಲಿ ಮಗ್ನವಾಗಿದ್ದವು.

ಕೆಳದಿ : ಕೆಳದಿ ನಾಯಕರ ರಾಜಧಾನಿ 'ಕೆಳದಿ'. ಶಿವಪ್ಪ ನಾಯಕ ಮತ್ತು ರಾಣಿ ಚೆನ್ನಮ್ಮ ರ ಸುವರ್ಣಯುಗದ ಆಡಳಿತ ಕಂಡ ನಾಡು. ಇವರು ಕಟ್ಟಿಸಿದ ರಾಮೇಶ್ವರ ದೇವಾಲಯ ಹೊಯ್ಸಳ-ದ್ರಾವಿಡ' ಶೈಲಿಯಲ್ಲಿದೆ. ಸುಂದರ ಕೆತ್ತನೆಗಳು ಇಲ್ಲಿನ ಪ್ರಮುಖ ಆಕರ್ಷಣೆ. ಒಂದೇ ಕಲ್ಲಿನಲ್ಲಿ ಪಂಚವಾದ್ಯದ ವಿವಿಧ ಸ್ವರ ಹೊರಡಿಸುವ ವಿಶಿಷ್ಟ ಕಂಬ ಇಲ್ಲಿದೆ. ಸರಕಾರದವರು ಒಂದು ಮ್ಯೂಸಿಯಂ ಕಟ್ಟಿಸಿ, ಪುರಾತನ ಗ್ರಂಥ ಮತ್ತು ಅವಶೇಷಗಳನ್ನು ರಕ್ಷಿಸಿದ್ದಾರೆ.

ಹೊನ್ನೇಮರಡು : ಶರಾವತಿ ಹಿನ್ನೀರಿನ ಅದ್ಭುತ ತಾಣಗಳಲ್ಲಿ ಇದು ಒಂದು ಸ್ವಚ್ಛ ಪರಿಸರ, ಜನರ ಒಡನಾಟದಿಂದ ದೂರ, ಬಿದಿರಿನ ಪೊದೆಗಳು, ಹಕ್ಕಿಗಳ ಕಲರವ, ಕಣ್ಣಳತೆಯುದ್ದಕ್ಕೂ ನೀರು, ಮದ್ಯೆ ನಡುಗದ್ದೆಗಳು, ನೀರವ ಮೌನ..ಇದು ಹೊನ್ನೇಮರಡುವಿನ ಚಿತ್ರಣ...

ಸ್ವಾಮಿ ಮತ್ತು ನೋಮಿಟೋ ದಂಪತಿಗಳು ಕಟ್ಟಿದ ಕೂಸು, ಪ್ರವಾಸಿ ತಾಣ. ಇಲ್ಲಿ ಅನೇಕ ಬಗೆಯ ಪರಿಸರಕ್ಕೆ ಸಂಬಂಧಿಸಿದ ವಿಷಯಗಳು ಲಭ್ಯ. ಹಾಗೆ ಬೋಟ್ ರೈಡಿಂಗ್, ಸ್ವಿಮ್ಮಿಂಗ್ ಕ್ಯಾಂಪ್ ಎಲ್ಲದಕ್ಕೂ ಮುಂಚಿತವಾಗಿ ತಿಳಿಸಿರಬೇಕಾಗುತ್ತದೆ.

ಸಂಜೆ ತಂಪಾದ ಗಾಳಿಯಲ್ಲಿ, ನೀರವತೆಯಲ್ಲಿ ಮಿಂದೆದ್ದು, ಎಷ್ಟೋ ಹೊತ್ತಿನ ತನಕ ಪ್ರಪಂಚವನ್ನೇ ಮರೆತಿದ್ದೆವು. ಹೊಸ ಉತ್ಸಾಹದಿಂದ ಮತ್ತೊಮ್ಮೆ ಜಾತ್ರೆಯನ್ನ ತಿರುಗಲು ಸಾಗರದ ಕಡೆ ಹೊರಟೆವು.

ನಂದಿ ಬೆಟ್ಟ

2009-04-30T03:43:00.001-07:00

೦೮-ಸಪ್ಟೆಂಬರ್-೨೦೦೭, ಬೆಂಗಳೂರಿಗರಿಗೆ ತುಂಬಾ ಹತ್ತಿರದ, ಹಾಗೆ ಸುಮ್ಮನೆ ಸಂಜೆಯನ್ನು ಕಳೆಯಲು ಸೂಕ್ತವಾದ, ಪ್ರೇಮಿಗಳ ಸ್ವರ್ಗ ನಂದಿ ಬೆಟ್ಟ ದರ್ಶನಕ್ಕೆ ನಾವು ತಯಾರಾಗಿದ್ದೆವು. ಅಂದು ಶನಿವಾರ ಅರವಿಂದ ನಂದಿ ಬೆಟ್ಟಕ್ಕೆ ಹೋಗೋಣ ಅಂದಾಗ ಮಳೆಯ ನಿರೀಕ್ಷೆಯ ನಡುವೆಯೂ ನಾನು, ಕಿರಣ್, ಸುಹಾಸ್ ಹೊರಡಲು ತಯಾರಾದೆವು. ೨ ಬೈಕ್ ನಲ್ಲಿ, ವಿಜಯನಗರದಿಂದ ಹೊರಟಾಗ ೩ ಗಂಟೆ. ಹೆಬ್ಬಾಳ ದಾಟಿ, ದೇವನಹಳ್ಳಿ ಕ್ರಾಸ್ ಬಳಿ ಎಳನೀರು ಕುಡಿದು ಬೈಕನ್ನ ನಂದಿ ಬೆಟ್ಟದತ್ತ ತಿರುಗಿಸಿದೆವು.

ಇಲ್ಲಿನ ಬೆಟ್ಟದ ರಸ್ತೆಯಲ್ಲಿ ಬೈಕು ಓಡಿಸುವುದು ಒಂದು ಅದ್ಭುತ ಅನುಭವ. ತುಂತುರು ಮಳೆಯಿಂದ ವಾತಾವರಣ ಕೂಡ ತಂಪಾಗಿತ್ತು. ನಾನು "ಶಿರಕವಚ"ವನ್ನು () ತೆಗೆದು ತಂಪಾದ ಗಾಳಿ, ಸುಂದರ ದೃಶ್ಯಗಳು, ಅಂಕು-ಡೊಂಕಾದ ರಸ್ತೆಯಲ್ಲಿ ಬೈಕ್ ಓಡಿಸುವ ಮಜವನ್ನು ಅನುಭವಿಸುತ್ತಿದ್ದೆ.

ಮಾರ್ಗ ಮಧ್ಯೆ ಎದುರಾಗುವ ಸುಂದರ ಸೇವಂತಿಗೆ ಹೂದೋಟ, ದ್ರಾಕ್ಷಿ, ದಾಳಿಂಬೆ ಹಣ್ಣಿನ ತೋಟಗಳು ಮನಸೂರೆಗೊಂಡವು. ಚಂದನೆಯ ಸೇವಂತಿಗೆ ತೋಟವಂತೂ ನಮ್ಮೆಲ್ಲರನ್ನು ಬಹಳವಾಗಿ ಆಕರ್ಷಿಸಿತ್ತು. ನಾವೆಲ್ಲ ಬೇರೆಯದೇ ಲೋಕದಲ್ಲಿದ್ದ ಹಾಗೆ ಅನ್ನಿಸಿತ್ತು. ತೋಟದಲ್ಲಿ ನಿಂತು ಫೋಟೋ ತೆಗೆಸಿಕೊಂಡು, ದ್ರಾಕ್ಷಿ ತೋಟದಲ್ಲಿ ತಾಜಾ ಹಣ್ಣುಗಳನ್ನು ತಿಂದೆವು.

ನಂದಿ ಬೆಟ್ಟ ಸದಾ ಕಾಲ ಪ್ರವಾಸಿಗರಿಂದ ತುಂಬಿರುತ್ತದೆ. ಸರ್ವ ಋತುಗಳೂ ಇಲ್ಲಿಗೆ ಭೇಟಿ ನೀಡಲು ಯೋಗ್ಯ. ಸಮುದ್ರ ಮಟ್ಟದಿಂದ ಸುಮಾರು ೧೫೦೦ ಮೀ ಎತ್ತರದಲ್ಲಿರುವ ನಂದಿ ಬೆಟ್ಟಕ್ಕೆ ನಂದಿ ದುರ್ಗ ಅಂತಲೂ ಹೆಸರಿದೆ. ಈ ಹೆಸರಿಗೆ ಕಾರಣ ಇಲ್ಲಿ ಬಂಡೆಗಳ ನಡುವೆ ಕಟ್ಟಲಾದ ಕೋಟೆ. ಅರ್ಕಾವತಿ ಮತ್ತು ಪಾಲಾರ್ ನದಿಗಳ ಉಗಮ ಸ್ಥಾನ.ಟಿಪ್ಪ ಸುಲ್ತಾನನು ತನ್ನ ಬೇಸಿಗೆಯ ದಿನಗಳನ್ನು ಕಳೆಯಲು ಇಲ್ಲಿಗೆ ಬರುತ್ತಿದ್ದ ಎಂದು ಹೇಳಲಾಗುತ್ತದೆ. ಟಿಪ್ಪು ಇಲ್ಲಿ ಅರಮನೆ ಮತ್ತು ಕೋಟೆ ಕಟ್ಟಿಸಿದ. ನಂತರ ಬ್ರಿಟಿಷರ ಕಾಲದಲ್ಲಿ ಇಲ್ಲಿ ಉದ್ಯಾನವನ ಮತ್ತು ಬಂಗಲೆಯನ್ನು ಕಟ್ಟಿಸಲಾಯಿತು. ಇಂದು ಇದೇ ಬಂಗಲೆ ಇಂದು ಸರಕಾರದ ವಸತಿ ಗೃಹವಾಗಿದೆ.

ಚೋಳ ಶೈಲಿಯ ಯೋಗ ನಂದೀಶ್ವರ ದೇವಸ್ಥಾನ, ಮಂಟಪ, ನಂದಿ, ನೆಹರು ಬಂಗಲೆ ಟಿಪ್ಪು ಡ್ರಾಪ್ ಇಲ್ಲಿನ ವಿಶೇಷತೆಗಳು.ಟಿಪ್ಪು ಸುಲ್ತಾನನು, ೬೦೦ ಅಡಿ ಎತ್ತರದಲ್ಲಿರುವ ಅಪಾಯ ಕಣಿವೆಯಿಂದ ಸೆರೆಹಿಡಿದ ಸೈನಿಕರನ್ನು ಕೆಳಕ್ಕೆ ತಳ್ಳಿ ಕೊಲ್ಲಿಸುತಿದ್ದ..ಅದಕ್ಕೆ ಟಿಪ್ಪು ಡ್ರಾಪ್ ಅಂತ ಹೆಸರು. ಕರ್ನಾಟಕ ತೋಟಗಾರಿಕೆ ಇಲಾಖೆಯು ಸುಂದರವಾದ ಉದ್ಯಾನವನ ಮತ್ತು ಮಕ್ಕಳ ಆಟದ ಮೈದಾನವನ್ನು ನಿರ್ಮಿಸಿದೆ.

ಟಿಪ್ಪು ಡ್ರಾಪ್ ಬಳಿ ಹೋದಾಗ ಸಂಜೆಯಾಗುತ್ತಲಿತ್ತು. ಮೋಡ ಮುಸುಕಿದ್ದರಿಂದ ಸೂರ್ಯ ಕಣ್ಣುಮುಚ್ಚಾಲೆ ಆಡುತ್ತಲಿದ್ದ. ಅಲ್ಲಿನ ಸುಂದರ ಪರಿಸರ, ದೂರ ದೂರದವರೆಗಿನ ದೃಶ್ಯ, ತಣ್ಣಗಿನ ಗಾಳಿ ಎಲ್ಲವೂ ಹಿತವಾಗಿತ್ತು.. ಬಂಡೆಯ ಮೇಲೆ ಕುಳಿತು ಸೂರ್ಯಾಸ್ತವನ್ನು ವೀಕ್ಷಿಸಿದೆವು. ಅಲ್ಲಿ ಹೊತ್ತು ಕಳೆದಿದ್ದೆ ಗೊತ್ತಾಗಲಿಲ್ಲ.

ಬೆಟ್ಟದ ಮೇಲಿದ್ದ ಹೋಟೆಲಿನಲ್ಲಿ ಕಾಫಿ ಕುಡಿದು, ಉದ್ಯಾನವನವನ್ನು ಒಂದು ರೌಂಡು ಹಾಕಿದೆವು. ಒಲ್ಲದ ಮನಸ್ಸಿಂದ ಬೆಟ್ಟದಿಂದ ಇಳಿದು ಬೆಂಗಳೂರಿನತ್ತ, ಟ್ರಾಫಿಕ್ ಮಧ್ಯೆ ಬೈಕ್ ಓಡಿಸಿದೆ.!

ಮಡಿಕೇರಿ ಪ್ರವಾಸ

2009-04-28T01:11:00.000-07:00

೩೧ ಡಿಸೆಂಬರ್ ೨೦೦೭ ಇಡೀ ಬೆಂಗಳೂರು ಹೊಸ ವರ್ಷದ ಸ್ವಾಗತಕ್ಕೆ ಸಿದ್ಧವಾಗುತ್ತ ಇತ್ತು. ಮರುದಿನ ನಮ್ಮ ಆಫೀಸ್ ಗೆ ಕೂಡ ರಜ ಘೋಷಿಸಿದ್ದರು. ಸಂಜೆ ಸುಮಾರು ೮ ಗಂಟೆಗೆ ಆನಂದ ಆಫೀಸ್ ನಿಂದ ಫೋನ್ ಮಾಡಿದ್ದ, ಅವನ server ಮ್ಯಾನೇಜರ್ ಹತ್ರ ಹೊಡೆದಾಡಿ ಬೇಗ ಮನೆಗೆ ಬರ್ತೀನಿ, ನೀವು ರೆಡಿ ಇರಿ, ಮೈಸೂರ್ ಗೆ ಹೋಗೋಣ ಅಂತ ಹೇಳಿದ. ನಾನು ಅರವಿಂದನಿಗೆ ಫೋನ್ ಮಾಡಿ ನಮ್ಮ ಮನೆಗೆ ಬರಲು ಹೇಳಿದೆ. ಆನಂದ ಮತ್ತು ಅವನ ಗೆಳೆಯ ಸುಧೀರ ಮನೆಗೆ ಬಂದಾಗ ೧೦ ಗಂಟೆ ಆಗಿತ್ತು. ಎಲ್ಲರು ರೆಡಿ ಆಗಿ, ಬೇಕರಿಯಲ್ಲಿ ಕೇಕು ಖರೀದಿಸಿ, ವಿಜಯನಗರ ಬಿಟ್ಟಾಗ ರಾತ್ರಿ ೧೧ ಗಂಟೆ.

ಅಂದು ಮೈಸೂರು ರಸ್ತೆ ವಾಹನಗಳಿಂದ ತುಂಬಿತ್ತು...ಎಲ್ಲರೂ ಹೊಸ ವರ್ಷದ ಆಚರಣೆಯಲ್ಲಿ ತೇಲುತಿದ್ದರು. ಕಾರುಗಳು ವೇಗದ ಮಿತಿಯನ್ನು ಮೀರಿ ಹೋಗುತ್ತಿದ್ದವು. ರಾಮನಗರದ ಸಮೀಪ ಹೋಗುವಷ್ಟರಲ್ಲಿ ೧೨ ಗಂಟೆ ಆಗಿತ್ತು. ಅಲ್ಲೇ ರಸ್ತೆ ಬದಿಯಲ್ಲಿ ಕಾರು ನಿಲ್ಲಿಸಿ, ದೀಪ ಬೆಳಗಿಸಿ, ಕೇಕ್ ಕತ್ತರಿಸಿ, ಅಪ್ಪುಗೆಯ ಹಾರೈಕೆಗಳೊಂದಿಗೆ ಹೊಸವರ್ಷವನ್ನು ಸ್ವಾಗತಿಸಿದೆವು. ಮದ್ದೂರಿನ ಕಾಫೀ-ಡೇ ಗೆ ನುಗ್ಗಿ ಅರವಿಂದನಿಗೆ ಪ್ರಿಯವಾದ ಕೆಪೆಚಿನೋ ಕುಡಿದು, ಬನ್ ತಿಂದು ಮೈಸೂರಿನತ್ತ ಹೊರಟಾಗ ರಾತ್ರಿ ೨.೩೦.

ಮೈಸೂರಿನಲ್ಲಿ ನನ್ನ ಭಾವ-ಗೆಳೆಯ ರಂಗನಾಥ ನಿಗೆ ಫೋನ್ ಮಾಡಿ ಅವನ ಮನೆಗೆ ಬರುತ್ತಿದ್ದೇವೆ ಎಂದು ಹೇಳಿದೆ. ಶ್ರೀರಂಗಪಟ್ಟಣದ ಹತ್ತಿರ ಎದುರಾದ ವೇಗನಿಯಂತ್ರಕ (hump) ಗಮನಿಸದೆ ಆನಂದ ವೇಗವಾಗಿ ಕಾರನ್ನು ಹತ್ತಿಸಿದ...!! ಒಂದು ಸಲ ಭೂಕಂಪ ಆದ ಹಾಗಾಯಿತು..!! ಸಧ್ಯ ಕಾರಿಗೆ ಹೆಚ್ಚೇನು ತೊಂದರೆ ಆಗಿರಲಿಲ್ಲ...! ಮರಳಿ ಬಂದು ಕಾರನ್ನು ಸರ್ವಿಸ್ ಗೆ ಕೊಟ್ಟಾಗಲೇ ಗೊತ್ತಾಗಿದ್ದು..ಅದರ (suspension) ಹೋಗಿತ್ತು...!!!ಮೈಸೂರಿನಲ್ಲಿ ನಮ್ಮ ಪ್ಲಾನ್ ಬದಲಾವಣೆ ಆಯಿತು. ಸೀದಾ ಮಡಿಕೇರಿಗೆ ಹೋಗುವುದೆಂದು ತೀರ್ಮಾನಿಸಿದೇವು. ಆನಂದ ಮಡಿಕೇರಿಯ ರಾಜ-ಸೀಟ್ ನಲ್ಲಿ ಸೂರ್ಯೋದಯವನ್ನು ನೋಡಲೇ ಬೇಕೆಂದು ಹೇಳಿದ...!! ಮೈಸೂರಿನಲ್ಲಿ ಮಡಿಕೇರಿಯ ದಾರಿ ಹುಡುಕುತ್ತ ೫ ರೌಂಡು ಹೊಡೆದು, ಹುಣಸೂರು ರಸ್ತೆಗೆ ಸೇರಿದಾಗ ಬೆಳಗಿನ ಜಾವ ೩.೩೦ ಆಗಿತ್ತು. ನಾನು, ಅರವಿಂದ, ಸುಧೀರ ನಿಧಾನವಾಗಿ ನಿದ್ದೆಗೆ ಜಾರಿದ್ದೆವು.

ಕುಶಾಲನಗರದ ಬಳಿ ಜೋರಾಗಿ ಬೀಸಿದ ಗಾಳಿ, ಮಳೆಗೆ ಮರವೊಂದು ಮುರಿದು, ಸೀದಾ ಕರೆಂಟು ಕಂಬದ ಮೇಲೆಯೇ ಬಿದ್ದಿತ್ತು. ಕರೆಂಟು ಲೈನುಗಳು ರಸ್ತೆಯ ಮೇಲೆ..!! ಎಲ್ಲ ವಾಹನಗಳೂ ಮುಂದೆ ಸಾಗುವ ಧೈರ್ಯವಿಲ್ಲದೆ ನಿಂತಿದ್ದವು..ಸುಮಾರು ದೂರದವರೆಗೂ ಟ್ರಾಫಿಕ್ ಜಾಮ್ ಆಗಿತ್ತು...ನಾವೂ ಸ್ವಲ್ಪ ಹೊತ್ತು ಕಾದೆವು. ಆಗ ಒಂದು ಟ್ರಕ್ ನವನು ತಂತಿಗಳ ಮೇಲೆ ಹತ್ತಿಸಿಕೊಂಡು ಹೋದ....ನಾವೂ ಅವನನ್ನ ಹಿಂಬಾಲಿಸಿ, ಸ್ವಲ್ಪ ರಿಸ್ಕ್ ತಗೊಂಡು ತಂತಿಗಳನ್ನು ಹಾದು ಹೋದೆವು...!! ಮಡಿಕೇರಿಯ ಚುಮು ಚುಮು ಚಳಿಯ ಅನುಭವ ಆಗುತ್ತ ಇತ್ತು...ಕುಶಾಲನಗರ ದಾಟಿದ ನಂತರ ರಸ್ತೆ ಪಕ್ಕದ ಟೀ ಅಂಗಡಿಯಲ್ಲಿ ಬಿಸಿ ಬಿಸಿ ಟೀ ಕುಡಿದು ಚಳಿಯನ್ನು ದೂರ ತಳ್ಳಿ, ಹುರುಪಿನಲ್ಲಿದ್ದ ಆನಂದ ಮತ್ತು ರಂಗನನ್ನು ಕಾರು ಓಡಿಸಲು ಹೇಳಿ ನಾವು ಮತ್ತೆ ನಿದ್ದೆಗೆ ಶರಣು... ಮಡಿಕೇರಿ ರಾಜ-ಸೀಟ್ ಗೆ ತಲುಪಿದಾಗ ಸಮಯ ೫.೪೫.

ತಂಪಾದ ಗಾಳಿ, ಚುಮು ಚುಮು ಚಳಿ, ಮಡಿಕೇರಿಯ ನಿಸರ್ಗ ಸೌಂದರ್ಯ...ನಿಧಾನಕ್ಕೆ ಉದಯಿಸುತಿದ್ದ ಸೂರ್ಯ.. ಮನಸ್ಸಿಗೆ ಹಿತವಾಗಿತ್ತು...ಪ್ರಯಾಣದ ಆಯಾಸ ಗಮನಕ್ಕೆ ಬರಲೇ ಇಲ್ಲ.

ಅಲ್ಲಿಯವರೆಗೂ ಒಂದೂ ಶಬ್ದಕೂಡ ಆಡದ ಸುಧೀರ, ಮಡಿಕೇರಿಯ ಇಬ್ಬನಿ, ಸುಂದರ ದೃಶ್ಯಗಳನ್ನು ನೋಡಿ ಜಿಗಿದಾಡಿಬಿಟ್ಟ. ಎಲ್ಲಿಂದಲೋ ಹೊಸ ಹುರುಪು ಬಂದಿತ್ತು ಅವನಿಗೆ...ಒಳ್ಳೊಳ್ಳೆ ಜೋಕ್ ಮಾಡುತ್ತ..ಸಕತ್ ಡೈಲಾಗ್ ಹೊಡೆಯುತ್ತ, ನಮ್ಮೆಲ್ಲರನ್ನು ಹೊಟ್ಟೆ ಹುಣ್ಣಾಗುವಂತೆ ನಗಿಸಲು ಪ್ರಾರಂಭಿಸಿದ...ಅವನ ಟ್ಯಾಲೆಂಟ್ ಗೊತ್ತಾಗಿದ್ದೆ ಆವಾಗ..!

ತುಂಬಾ ಮೋಡ ಕವಿದಿದ್ದರಿಂದ ಚಂದದ ಸೂರ್ಯೋದಯದ ಭಾಗ್ಯ ನಮಗೆ ಆಗಲಿಲ್ಲ..! ಸೂರ್ಯ ಮರೆ ಮರೆಯಾಗಿ ಕಾಣಿಸುತ್ತಿದ್ದ..

ರಾಜ-ಸೀಟ್ ಬಗ್ಗೆ : ಕೊಡಗಿನ ಮಹಾರಾಜರು ತಮ್ಮ ಪರಿವಾರದವರೊಂದಿಗೆ ಇಲ್ಲಿಗೆ ಸಂಜೆಯನ್ನು ಕಳೆಯಲು ಬರುತಿದ್ದರು ಎಂಬ ಪ್ರತೀತಿ ಇದೆ. ಹಸಿರಿನ ಉದ್ಯಾನವನ, ಸುತ್ತಲಿನ ಪರ್ವತ ಶ್ರೇಣಿಗಳ ದೃಶ್ಯ, ವಿಶಾಲವಾದ ಹಸಿರು ಗದ್ದೆಗಳು, ಕಾಫಿ ತೋಟ ನೋಡುಗರನ್ನ ತಕ್ಷಣಕ್ಕೆ ಇಷ್ಟವಾಗುವ ಹಾಗೆ ಮಾಡುತ್ತವೆ. ಹಿತವಾದ ತಂಗಾಳಿ, ಮನಮೋಹಕ ಸೂರ್ಯೋದಯದ ದೃಶ್ಯ ಎಲ್ಲರ ಹೃದಯದಲ್ಲಿ ಶಾಶ್ವತವಾಗಿ ಮನೆಮೂಡುತ್ತದೆ.

ಮಡಿಕೇರಿಯಲ್ಲಿ ಒಂದು ರೂಮು ಮಾಡಿ ೧೦ ಗಂಟೆಯ ತನಕ ಗಡದ್ದಾಗಿ ನಿದ್ದೆ ಮಾಡಿದೆವು. ಫೋನು ಬಡಿದುಕೊಳ್ಳ ಲಾರಂಭಿಸಿದಾಗಲೇ ಎಚ್ಚರ ಆಗಿದ್ದು. ಸ್ನಾನ ಕರ್ಮಾದಿಗಳನ್ನು ಮುಗಿಸಿ, ಹೊಸ ವರ್ಷದ ದಿನ "ಓಂಕಾರೇಶ್ವರ ದೇವಸ್ಥಾನಕ್ಕೆ" ಬಂದು ಶಿವನ ದರ್ಶನ ಮಾಡಿದೆವು.

ಓಂಕಾರೇಶ್ವರ ದೇವಸ್ಥಾನದ ಬಗ್ಗೆ: ಮಡಿಕೇರಿಯ ಹೃದಯ ಭಾಗದಲ್ಲಿರುವ ಈ ದೇವಸ್ಥಾನವನ್ನ ೧೮೨೦ ರಲ್ಲಿ ರಾಜ 'ಲಿಂಗರಾಜೇಂದ್ರ' ರಿಂದ ಕಟ್ಟಲ್ಪಟ್ಟಿದ್ದು. ತನ್ನ ರಾಜಕೀಯ ಹಿತಕ್ಕೋಸ್ಕರ ಬ್ರಾಹ್ಮಣ ಪುರೋಹಿತರೋಬ್ಬರನ್ನ ರಾಜನು ಕೊಲ್ಲಿಸಿದ. ಆ ಬ್ರಾಹ್ಮಣ ಮರಣದ ನಂತರ "ಬ್ರಹ್ಮರಾಕ್ಷಸ" ಆಗಿ ರಾಜನನ್ನು ಕಾಡಲು ಶುರುಮಾಡಿದ. ಇದರಿಂದ ಬೇಸತ್ತ ರಾಜನು ಕಾಶಿಯಿಂದ ಶಿವಲಿಂಗವನ್ನು ತಂದು ಇಲ್ಲಿ ಪ್ರತಿಷ್ಟಾಪಿಸಿ ದೇವಸ್ಥಾನವನ್ನು ಕಟ್ಟಿಸಿದ ನಂತರ ರಾಕ್ಷಸನ ಸಂಹಾರವಾಗಿ, ಅವನ ಕಾಟದಿಂದ ರಾಜನು ಮುಕ್ತನಾದನು ಎನ್ನುವ ಕಥೆ ಇದೆ.

ದೇವಸ್ಥಾವವು ಇಸ್ಲಾಮಿಕ್ ಮತ್ತು ಕೇರಳ ಮಾದರಿಯಲ್ಲಿ ಕಟ್ಟಲ್ಪಟ್ಟಿದ್ದು, ಕಿಟಕಿಯ ಸರಳುಗಳನ್ನ ಪಂಚಲೋಹದಿಂದ ಮಾಡಲಾಗಿದೆ.
ಮುಂಭಾಗದಲ್ಲಿ ವಿಶಾಲವಾದ ಪುಷ್ಕರಣಿ ಇದ್ದು, ಮಧ್ಯದಲ್ಲಿ ಮಂಟಪ ಇದೆ. ಗೋಡೆಗಳಲ್ಲಿ ಸುಂದರವಾದ ಚಿತ್ರಗಳನ್ನು ಬಿಡಿಸಲಾಗಿದ್ದು, ಇವು ಇತಿಹಾಸವನ್ನು ಸಾರುತ್ತವೆ.

ಅಬ್ಬೆ ಜಲಪಾತ ಅಥವಾ ಅಬ್ಬಿ ಜಲಪಾತ : ಮಡಿಕೇರಿಯಿಂದ ಸುಮಾರು ೮ ಕಿ.ಮೀ ದೂರದಲ್ಲಿರುವ ಕಾಫಿ ತೋಟದ ಮಧ್ಯೆ, ಕಾವೇರಿ ನದಿಯು ಕಪ್ಪು ಬಂಡೆಗಳ ಮೇಲೆ ಹರಡಿಕೊಂಡು, ಸುಮಾರು ೫೦ ಅಡಿ ಎತ್ತರದಿಂದ ಧುಮ್ಮಿಕ್ಕಿ ಅಬ್ಬಿ ಸುಂದರ ಜಲಪಾತವನ್ನು ಸೃಷ್ಟಿಸಿದೆ. ಸುತ್ತಲಿನ ಹಸಿರು ಪರಿಸರ, ನಯನ ಮನೋಹರ ಜಲಪಾತ ಕಣ್ಣಿಗೆ ಹಬ್ಬ. ಜಲಪಾತಕ್ಕೆ ಎದುರಾಗಿ ತೂಗುಸೇತುವೆ ಕಟ್ಟಲಾಗಿದ್ದು, ಜಲಪಾತದ ಉತ್ತಮ ವೀಕ್ಷಣೆಗೆ ಅನುಕೂಲವಾಗಿದೆ. ಇಲ್ಲಿ ನೀರಿನಲ್ಲಿ ಇಳಿಯುವುದನ್ನು ನಿಷೇಧಿಸಲಾಗಿದ್ದು, ಕಟ್ಟೆಚ್ಚರ ವಹಿಸಲಾಗುತ್ತಿದೆ.ಮಡಿಕೇರಿಯಲ್ಲಿ ಊಟ ಮಾಡಿ, ಕಾವೇರಿ ನಿಸರ್ಗ ಧಾಮಕ್ಕೆ ಹೋದೆವು.

ಕಾವೇರಿ ನಿಸರ್ಗ ಧಾಮ : ಮಡಿಕೇರಿಯಿಂದ ೩೫ ಕಿ.ಮೀ, ಕುಶಾಲನಗರದಿಂದ ೨ ಕಿ.ಮೀ ದೂರ ಇರುವ ನಿಸರ್ಗ ಧಾಮವನ್ನು ೧೯೮೮ ರಲ್ಲಿ ಕಟ್ಟಲಾಗಿದೆ. ೩೫ ಎಕರೆ ಸುಂದರ ಪರಿಸರದಲ್ಲಿರುವ ನಿಸರ್ಗ ಧಾಮ ಸುತ್ತಲೂ ಕಾವೇರಿ ನದಿಯಿದೆ. ಬಿದಿರಿನ ಮರಗಳ ಮೇಲೆ ಕಟ್ಟಿದ ಮನೆಗಳು, ಆನೆ ಸವಾರಿ, ಜಿಂಕೆ ವನ, ಕಾಡಿನಲ್ಲಿ ನಡಿಗೆ, ದೋಣಿ ವಿಹಾರ ಇಲ್ಲಿನ ವಿಶೇಷ.

ಕುಟುಂಬ ಸಮೇತ ಒಂದು ದಿನದ ರಜೆಯನ್ನು ಕಳೆಯಲು ಸೂಕ್ತ ಸ್ಥಳ. ಇಲ್ಲಿ ಕಾವೇರಿ ನದಿಯಲ್ಲಿ ಸ್ನಾನ ಮಾಡಿ, ಸುಮಾರು ಹೊತ್ತು ನೀರಲ್ಲಿ ಆಟ ಆಡಿದೆವು. ನಿಸರ್ಗ ಧಾಮದಲ್ಲಿ ಒಂದು ರೌಂಡು ಹಾಕಿ, ಜಿಂಕೆಗಳನ್ನು ಮಾತಾಡಿಸಿ, ಹೊರಟಾಗ ಸಂಜೆ ಆಗುತ್ತಲಿತ್ತು.

ಮೈಸೂರಿನಲ್ಲಿ ರಾತ್ರಿಯ ಊಟ ಮಾಡಿ, ರಂಗನನ್ನು ಮನೆಗೆ ಬಿಟ್ಟು ಬೆಂಗಳೂರಿನತ್ತ ಸಾಗಿದೆವು.

ನಾಗರಹೊಳೆ ಮತ್ತು ಇರ್ಪು ಜಲಪಾತ

2009-04-21T04:54:00.000-07:00

ನಾಗರಹೊಳೆ ಮತ್ತು ಇರ್ಪು ಜಲಪಾತ - ೨೦ ಏಪ್ರಿಲ್ ೨೦೦೮ ಭಾನುವಾರ
ಶನಿವಾರ ತುಂಬಾ ಬೋರ್ ಆಗಿ ಕಳೆದ ನಮಗೆ ಭಾನುವಾರವನ್ನೂ ವೇಸ್ಟು ಮಾಡಲು ಮನಸ್ಸಿರಲಿಲ್ಲ. ಇಂಟರ್ನೆಟ್ ನಲ್ಲಿ ಅಲ್ಪ ಸ್ವಲ್ಪ ತಡಕಾಡಿ ನಾಗರಹೊಳೆ ಒಂದು ದಿನದ ಪ್ರವಾಸಕ್ಕೆ ಯೋಗ್ಯವಾಗಿದ್ದು, ಅಲ್ಲಿ ಕಾಡುಪ್ರಾಣಿಗಳು ನೋಡಲು ಸಿಗುವುದೆಂದು ತಿಳಿದು ಅಲ್ಲಿಗೇ ಹೋಗುವುದೆಂದು ತೀರ್ಮಾನಿಸಿದೆವು. ಸಂತು, ಅರವಿಂದ, ಬನವಾಸಿ ಶನಿವಾರ ನಮ್ಮ ರೂಮಿನಲ್ಲಿ ಉಳಿದರು.

ಭಾನುವಾರ ಮುಂಜಾನೆ ೬ ಗಂಟೆಗೆ ಡಿಂಗನ ಕಾರಿನಲ್ಲಿ ನಮ್ಮ ಪ್ರಯಾಣ ಪ್ರಾರಂಭಿಸಿದೆವು. ಬೆಂಗಳೂರು-ಮೈಸೂರು ಹೆದ್ದಾರಿಯಲ್ಲಿ ಶ್ರೀರಂಗಪಟ್ಟಣ ನಂತರ ಬಲಗಡೆ ತಿರುಗಿ ಹುಣಸೂರು ತಲುಪಿದೆವು. ಅಲ್ಲಿ ಹೋಟೆಲೊಂದರಲ್ಲಿ ಬೆಳಗಿನ ಉಪಾಹಾರ ಮುಗಿಸಿದೆವು. ಪ್ಲೈನ್-ದೋಸೆ ಮತ್ತು ಕಾಫಿ ಅಷ್ಟೇನೂ ಚೆನ್ನಾಗಿಲ್ಲದಿದ್ದರೂ ಹಸಿವಾಗಿದ್ದರಿಂದ ಬೇರೆ ವಿಧಿ ಇಲ್ಲದೆ ತಿಂದು ಮುಗಿಸಿದೆವು. ನಾಗರಹೊಳೆ ಅಭಯಾರಣ್ಯ ಭಾಗದಲ್ಲಿ ಸ್ವಲ್ಪ ಮಳೆಯಾಗಿದ್ದರಿಂದ ರಸ್ತೆಯ ಪಕ್ಕ ಹಸಿರು ಕಂಗೊಳಿಸುತ್ತಿತ್ತು. ಅಂದಿನ ವಾತಾವರಣವೂ ತಣ್ಣಗಿದ್ದು, ಬಿಸಿಲಿನ ಧಗೆಯ ಬೆಂಗಳೂರಿಂದ ಹೋಗಿದ್ದ ನಮಗೆ ಹಸಿರಿನ ತಣ್ಣನೆಯ ಪರಿಸರ ಆಹ್ಲಾದಕರವಾಗಿತ್ತು.

ನಾಗರಹೊಳೆಯ ಆನೆ ಖೆಡ್ಡದಲ್ಲಿ ಒಂದು ವಾರದ ಹಿಂದೆ ಹಾಸನದಿಂದ ಹಿಡಿದು ತಂದಿದ್ದ ಸಲಗವನ್ನು ಕೂಡಿ ಹಾಕಿದ್ದರು. ನೋಡಿದರೆ ಭಯವೆನಿಸುತಿದ್ದ ಈ ಸಲಗ ಹಾಸನದ ಸುತ್ತಮುತ್ತ ೪ ಜನರನ್ನು ಬಲಿ ತೆಗೆದುಕೊಂಡಿತ್ತು. ಬಂಧನದಲ್ಲಿದ್ದ ಅದರ ಘೀಳಿಡುವಿಕೆ ಎದೆಯಲ್ಲಿ ನಡುಕ ಹುಟ್ಟಿಸಿತ್ತು.

ರಸ್ತೆಯ ಪಕ್ಕದಲ್ಲಿ ಜಿಂಕೆಗಳ ಹಿಂಡು ಕಾಣಿಸುತ್ತದೆ. ಇದು ಇಲ್ಲಿ ಸಾಮಾನ್ಯ. ಅವು ಕಾಡಿನ ಮಧ್ಯಭಾಗಕ್ಕೆ ಹೋಗುವುದಿಲ್ಲವಂತೆ. ಅಲ್ಲಿನ ಅರಣ್ಯ ಸಿಬ್ಬಂಧಿಯ ಮನೆಗಳ ಪಕ್ಕದಲ್ಲಿಯೇ ತಿರುಗಾಡಿಕೊಂಡಿದ್ದವು.

ನಾಗರಹೊಳೆ ಸಫಾರಿ ಯ ಬಳಿ ಬಂದಾಗ ಮಧ್ಯಾನ್ನ ೧೧ ಗಂಟೆ ಆಗಿತ್ತು. ಅಲ್ಲಿ ಕಾಡಿನ ಸಫಾರಿಯ ಬಗ್ಗೆ ವಿಚಾರಿಸಿದಾಗ ಆ ಸಮಯದಲ್ಲಿ ಹೆಚ್ಚು ಕಾಡುಪ್ರಾಣಿಗಳು ಕಾಣಸಿಗುವುದಿಲ್ಲ ಅಂತ ಗೊತ್ತಾಯಿತು. ಅಲ್ಲಿನ ಸಿಬ್ಬಂದಿ ಬಳಿ ಹತ್ತಿರದ ಬೇರೆ ಸ್ಥಳ ಬಗ್ಗೆ ಕೇಳಿದಾಗ, ಇರ್ಪು ಜಲಪಾತದ ಬಗ್ಗೆ ಹೇಳಿದರು. ನಾಗರಹೊಳೆಯಿಂದ ಸುಮಾರು ೩೦ ಕಿ.ಮೀ. ದೂರದ "ಕುಟ್ಟ" ಊರ ಬಳಿ ಬಂದಾಗ ೧ ಗಂಟೆ ಆಗಿತ್ತು. ಅಲ್ಲಿ ಇರ್ಪುಗೆ ಹೋಗುವ ದಾರಿ ಕೇಳಿ ಮುಂದೆ ಹೊರಟೆವು. ದಾರಿಯುದ್ದಕ್ಕೂ ಕಾಫೀ ತೋಟ ಸಿಗುತ್ತದೆ. ಅಲ್ಲಿ ಮರದ ನೆರಳಿನಲ್ಲಿ ಸ್ವಲ್ಪ ಹೊತ್ತು ವಿರಮಿಸಿದೆವು.

ಕಾರಿನ ಸ್ಟೀರಿಯೋದಿಂದ ಹಾಡು ಕೇಳಿ ಬರುತ್ತಾ ಇತ್ತು....'ಹಾಡು ಸಂತೋಷಕ್ಕೆ.......!!' ಸಂತು, ಡಿಂಗ ಅಲ್ಲೇ ಹಾಡಿಗೆ ಸ್ಟೆಪ್ ಹಾಕಲು ಶುರು ಮಾಡಿದ್ದರು...!!!

ಅದೇ ಹುರುಪಿನಲ್ಲಿ ಅಲ್ಲಿಂದ ಹೊರಟಾಗ, ಡಿಂಗ ಕಾರಿನ ಗ್ಲಾಸ್ ತೆಗೆದು, ಬಾಗಿಲ ಮೇಲೆ ಕುಳಿತುಕೊಂಡ...!

ಉಳಿದವರೂ ಹಾಗೆ ಕಾರಿನ ಮೇಲೆ ಹತ್ತಿ ಕುಣಿದಾಡಿದರು...ಜೋರಾಗಿ ಹಾಡು ಹೇಳುತ್ತಾ..ಸಾಗಿದ್ದೆವು....ಫುಲ್ ಜೋಶ್...!!

ಸ್ವಲ್ಪ ದೂರ ಹೋಗುವಷ್ಟರಲ್ಲಿ ಕಾರಿನ ಹಿಂಭಾಗದ ಟೈರ್ ಪಂಕ್ಚರ್ ಆಯಿತು...!! ಎಲ್ಲರ ಜೋಶ್ ಕಡಿಮೆ ಆಯಿತು...!!ಟೈರ್ ಬದಲಿಸಿ, ತೆಪ್ಪಗೆ ಕಾರಿನ ಒಳಗಡೆ ಕುಳಿತು ಇರ್ಪುಗೆ ಹೋದಾಗ ಗಂಟೆ ೧.೩೦ ಆಗಿತ್ತು.
ಇರ್ಪು ಜಲಪಾತ : ಇರ್ಪು ಅಥವಾ ಇರುಪ್ಪು ಜಲಪಾತವು ದಕ್ಷಿಣ ಕೊಡಗು, ಬ್ರಹ್ಮಗಿರಿ ಪರ್ವತ ಸರಣಿಯಲ್ಲಿ ಇದೆ.

ಲಕ್ಷ್ಮಣ ತೀರ್ಥ ನದಿಯು ಸುಮಾರು ೫೦ ಮೀ. ಎತ್ತರದಿಂದ ೨ ಸ್ಥರದಲ್ಲಿ ಧುಮುಕುತ್ತದೆ.

ಇಲ್ಲಿಯೇ ಶ್ರೀ ರಾಮನ ದೇವಸ್ಥಾನ ಕೂಡ ಇದೆ. ರಾಮ ಲಕ್ಷ್ಮಣರು ಸೀತೆಯನ್ನು ಹುಡುಕುವ ಸಮಯದಲ್ಲಿ ಈ ಕಾಡಿನ ಭಾಗದಲ್ಲಿ ಸಂಚರಿಸುತ್ತಿದ್ದರು...ರಾಮನ ಬಾಯಾರಿಕೆಯನ್ನು ತಣಿಸಲು ಲಕ್ಷ್ಮಣನು ನೆಲಕ್ಕೆ ಬಾಣವನ್ನು ಹೊಡೆದು ನೀರನ್ನು ಚಿಮ್ಮಿಸಿದನು...ಆಗ ಹುಟ್ಟಿದ ನದಿಯು ಲಕ್ಷ್ಮಣ ತೀರ್ಥವಾಗಿ ಇರ್ಪು ಜಲಪಾತವನ್ನು ಸೃಷ್ಟಿಸಿತೆಂಬ ಪ್ರತೀತಿ ಇದೆ..!

ಮಳೆಗಾಲದಲ್ಲಿ ತುಂಬಿ ಹರಿಯುವ ನದಿಯ ನೀರು ಬೇಸಿಗೆಯಲ್ಲಿ ಕಡಿಮೆ ಇರುತ್ತಾದರೂ, ಸಂಪೂರ್ಣ ಬತ್ತುವುದಿಲ್ಲ. ಸುತ್ತಲೂ ಹಸಿರಿನ ಕಾಡು, ಕಾಫೀ ತೋಟ, ಚಂದದ ಮಲೆನಾಡಿನ ದೃಶ್ಯಗಳು ಒಂದು ದಿನದ ಪ್ರವಾಸಕ್ಕೆ ಯೋಗ್ಯವಾಗಿದೆ. ಇರ್ಪು ಬೆಂಗಳೂರಿಂದ ಸುಮಾರು ೨೮೦ ಕಿ.ಮೀ ದೂರ, ಕೊಡಗಿನ "ಕುಟ್ಟ" ಊರಿಂದ ೭ ಕಿ. ಮೀ ಅಂತರ. ನಾಗರಹೊಳೆಯವರೆಗೂ ರಸ್ತೆ ಉತ್ತಮವಾಗಿದ್ದು, ಅಭಯಾರಣ್ಯದಲ್ಲಿ ಆನೆ, ಕಾಡುಹಂದಿ, ಮಂಗಗಳು, ಜಿಂಕೆ ವೀಕ್ಷಣೆ ಪ್ರಯಾಣಕ್ಕೆ ಉತ್ಸಾಹ ಮತ್ತೆ ಅಷ್ಟೇ ರೋಮಾಂಚನವಾಗಿರುತ್ತೆ...ಕೆಲವರಿಗೆ ಹುಲಿ ಕೂಡ ಸಿಕ್ಕ ಅನುಭವ ಆಗಿದೆ....! ಸಂಜೆ ೬ ಗಂಟೆಯ ನಂತರ ವಾಹನ ಓಡಾಟವನ್ನು ನಿಲ್ಲಿಸಲಾಗುತ್ತದೆ. ಇರ್ಪುನಲ್ಲಿ ಒಂದೇ ಹೋಟೆಲ್ ಇದ್ದು, ಊಟಕ್ಕೆ ಮುಂಚಿತವಾಗಿ ತಿಳಿಸಿರಬೇಕಾಗುತ್ತದೆ..
ಜಲಪಾತದಲ್ಲಿ ಸುಮಾರು ೨ ತಾಸು ಸ್ನಾನ ಮಾಡಿ, ಮೈ -ಮನವನ್ನು ಹಗುರಾಗಿಸಿಕೊಂಡೆವು.

ರುಚಿಯಾದ ಊಟ ಮಾಡಿ ಅಲ್ಲಿಂದ ವಾಪಾಸು ಹೊರಟೆವು. ನಾಗರಹೊಳೆಯಲ್ಲಿ ಟೀ ಕುಡಿದು ಸ್ವಲ್ಪ ಹೊತ್ತು ವಿರಮಿಸಿದೆವು. ವಾಪಸು ಬರುವಾಗ ಕಾಡಾನೆಗಳ ದರ್ಶನ ಭಾಗ್ಯ ಸಿಕ್ಕಿತು.

ಮೈಸೂರ್-ಬೆಂಗಳೂರು ಹೆದ್ದಾರಿಯಲ್ಲಿನ ಧಾಭ ಒಂದರಲ್ಲಿ ರಾತ್ರಿಯ ಊಟ ಮುಗಿಸಿ, ಸುಂದರ ನೆನಪುಗಳೊಂದಿಗೆ ಮನೆಗೆ ವಾಪಸಾದೆವು.

ಗೇರುಸೊಪ್ಪ ಮತ್ತು ಜೋಗ ಪ್ರವಾಸ.

2009-04-14T03:13:00.001-07:00

ಶನಿವಾರ ದಿನಾಂಕ ೨೧ ಜೂನ್ ೨೦೦೮ ರಂದು ಊರಿನ ನಮ್ಮ ಮನೆಯಲ್ಲಿ ಸತ್ಯನಾರಾಯಣ ಪೂಜೆ ಕಾರ್ಯಕ್ರಮ ಇತ್ತು. ಅದರ ನಿಮಿತ್ತ ಬಂದ ಗೆಳೆಯರು ಬಡಿಸುವುದರಿಂದ ಹಿಡಿದು, ತೊಳೆದಿದ್ದ ಪಾತ್ರೆಯನ್ನು ಒರೆಸಿ, ಅವರವರ ಮನೆಗೆ ಸಾಗಿಸುವ ಎಲ್ಲ ಕೆಲಸಗಳನ್ನು ಮಾಡಿದ್ದರು. ಮರುದಿನ ಭಾನುವಾರ ಬೆಳಿಗ್ಗೆ ತಿಂಡಿ ಆದನಂತರ ಅರವಿಂದ ಜೋಗ ನೋಡಬೇಕೆಂದು ಹೇಳಿದ. ಜೋಗದಲ್ಲಿ ಇನ್ನೂ ನೀರು ಬಂದಿಲ್ಲ, ಬರೀ ಬಂಡೆಗಳು ಅಂತ ಅಪ್ಪ ಹೇಳಿದರು. ಆದರೂ ಸುಮ್ಮನೆ ಕೂರುವ ಜಾಯಮಾನ ನಮ್ಮದಲ್ಲ. ಏನಾದರೂ ಒಂದು ಸಲ ನೋಡಿಯೇ ಬಿಡಬೇಕೆಂದು ತೀರ್ಮಾನಿಸಿ ಮನೆಯಿಂದ ಹೊರಟಾಗ ೧೧ ಗಂಟೆ ಆಗಿತ್ತು. ನಾನು, ಅರವಿಂದ, ಕಿರಣ, ಸುಹಾಸ ಮತ್ತು ನಮ್ಮ ಕಾರು. ಜೋಗ ಹೋಗುವ ರಸ್ತೆ ಉತ್ತಮವಾಗಿದ್ದು, ಡ್ರೈವಿಂಗ್ ನಲ್ಲಿ ಸಕತ್ ಮಜ ಇತ್ತು.

"ಮಾವಿನಗುಂಡಿ" ಯ ಹತ್ತಿರ ರಸ್ತೆಯ ಪಕ್ಕದಲ್ಲೇ ಚಿಕ್ಕದಾದ ಜಲಧಾರೆ ಇದೆ. ಮಳೆಗಾಲದಲ್ಲಿ ಸುಂದರವಾಗಿದ್ದ ಈ ಜಲಧಾರೆ ಈಗ ನೀರಿಲ್ಲದೆ ಸೊರಗಿತ್ತು.

ಮಾವಿನಗುಂಡಿಯಲ್ಲಿ ಟೀ ಕುಡಿದು ಅಲ್ಲಿಂದ ಜೋಗಕ್ಕೆ ಹೋಗುವ ಪ್ಲಾನ್ ಇದ್ದಿದ್ದು...ಆದರೆ ಜೋಗದಲ್ಲಿ ನೀರು ಕಡಿಮೆ ಇದ್ದದ್ದು ಅಲ್ಲಿ ಹೆಚ್ಚಿನ ಸಮಯ ಕಳೆಯಲು ಯಾರಿಗೂ ಇಷ್ಟ ಇರಲಿಲ್ಲ. ಆದ್ದರಿಂದ ಗೇರುಸೊಪ್ಪ ಡ್ಯಾಮ್ ನೋಡಲು ಹೋಗುವುದೆಂದು ತೀರ್ಮಾನಿಸಿ, ಕಾರನ್ನು ಅತ್ತ ತಿರುಗಿಸಿದೆ. ನುಣುಪಾದ ರಸ್ತೆ, ಇಕ್ಕೆಲಗಳಲ್ಲಿ ಹಸಿರು ಮರಗಳ ಘಟ್ಟ ಪ್ರದೇಶ, ದೂರದಲ್ಲಿ ಕಾಣುತಿದ್ದ ಜಲಧಾರೆ ಏಲ್ಲವೂ ಹೊಸ ಉತ್ಸಾಹ ತಂದಿತ್ತು.

ರಸ್ತೆಯ ಪಕ್ಕದಲ್ಲಿ ಹರಿಯುತಿದ್ದ ಸಣ್ಣ ತೊರೆಯ ಬಳಿ ಕಾರು ನಿಲ್ಲಿಸಿ, ತಣ್ಣಗಿನ ನೀರಲ್ಲಿ ಸ್ವಲ್ಪ ಹೊತ್ತು ಆಟ ಆಡಿದೆವು. ಕಾಡಿನ ಒಳಗೆ ಸ್ವಲ್ಪ ದೂರ ನಡೆದೆವು. ಚಿಕ್ಕ ಚಿಕ್ಕ ನೀರಿನ ತೊರೆಗಳು, ಬಂಡೆಯ ನಡುವೆ ಹರಿದು ಬರುತ್ತಿದ್ದ ನೀರು ಏಲ್ಲವೂ ಮನಸ್ಸಿಗೆ ಹಿತವಾಗಿತ್ತು.

ಶರಾವತಿ ಕಣಿವೆ ದೃಶ್ಯವಂತೂ ಅದ್ಭುತವಾಗಿತ್ತು. ಅಪಾರ ವನ್ಯ ಸಂಪತ್ತನ್ನೂ, ಹಚ್ಚ ಹಸಿರಿನ ದಟ್ಟ ಕಾಡನ್ನು ಶರಾವತಿ ನದಿಯು ಸೀಳಿಕೊಂಡು ಹರಿಯುತ್ತಿದೆ. ೧೨ ವರ್ಷಗಳ ಹಿಂದೆ ಇಲ್ಲಿಗೆ ಒಮ್ಮೆ ಬಂದಿದ್ದು ನನಗೆ ನೆನಪಿದೆ. ಆಗ ಶರಾವತಿ ನದಿಯು ಆಳದಲ್ಲೆಲ್ಲೋ ಹರಿಯುತ್ತಿರುವಂತೆ ತೋರುತ್ತಿತ್ತು. ಆಗಿನ್ನೂ ಗೇರುಸೊಪ್ಪ ಡ್ಯಾಮ್ ಕಟ್ಟಿರಲಿಲ್ಲ. ಈ ಪ್ರದೇಶಕ್ಕೆ "ಕತ್ಲೆಕಾನು" ಅಂತಲೂ ಕರೆಯುತ್ತಾರೆ. ಸೂರ್ಯನ ಕಿರಣ ಇಲ್ಲಿನ ಕಾಡಿನ ನೆಲಕ್ಕೆ ತಾಗದಷ್ಟು ದಟ್ಟವಾದ ಕಾಡಿದೆ. ಹಾಗಾಗಿ ಈ ಹೆಸರು. ಎಷ್ಟೊಂದು ಬಗೆಯ ವನ್ಯಜೀವಿಗಳು, ಔಷಧಿ ಸಸ್ಯಗಳು.. ಇಲ್ಲಿನ ದಟ್ಟ ಕಾಡಿನ ಸೌಂದರ್ಯವನ್ನು ನೋಡಿಯೇ ತೀರಬೇಕು. " Western Ghats are always refreshing..."

ಗೇರುಸೊಪ್ಪ ಡ್ಯಾಮ್ ನೋಡಲು ಅನುಮತಿ ಸಿಗದ ಕಾರಣ, ಅಲ್ಲಿಂದ ಹೊರಟು ಗೇರುಸೊಪ್ಪ ಊರಿನ ಕೊನೆಯಲ್ಲಿ ಹರಿಯುತ್ತಿದ್ದ ಶರಾವತಿ ನದಿಯ ಬಳಿಗೆ ಬಂದೆವು. ನದಿಯ ಈಚೆ ದಡದಲ್ಲಿ ಕಾರನ್ನು ನಿಲ್ಲಿಸಿ, ನೀರಲ್ಲಿ ಸುಮಾರು ಹೊತ್ತು ಆಟ ಆಡಿದೆವು. ಇಲ್ಲಿ ನೀರಿನ ಹರಿವು ರಭಸವಾಗಿದ್ದು, ನೀರಿನ ಆಳವು ಹೆಚ್ಚಿದೆ. ಸಹಜ ಸೌಂದರ್ಯ, ಸುತ್ತಲೂ ನೀರು, ತೆಂಗಿನ ಮರಗಳು, ದ್ವೀಪದಂತೆ ಅನ್ನಿಸುವ ಗೇರುಸೊಪ್ಪ ಬೇಗನೇ ಇಷ್ಟವಾಗುತ್ತದೆ. ಒಂದು ದಿನದ ಫ್ಯಾಮಿಲಿ ಪ್ರವಾಸಕ್ಕೆ ಕೂಡ ಯೋಗ್ಯವಾದ ಜಾಗ.

ನದಿಯ ಆಚೆ ದಡದಲ್ಲಿ " ಲಕ್ಷ್ಮೀ ವೆಂಕಟರಮಣ ಸ್ವಾಮೀ" ದೇವಸ್ಥಾನ ಇದೆ. ಅಲ್ಲಿಗೆ ಹೋಗಲು ನದಿಯನ್ನು ದೋಣಿಯ ಸಹಾಯದಿಂದ ದಾಟಬೇಕು. ದೋಣಿ ನಡೆಸುವವರು ಹಗಲು ಮತ್ತು ರಾತ್ರಿ ಕೂಡ ಪಾಳಿಯ ಪ್ರಕಾರ ಪ್ರಯಾಣಿಕರ ಸೇವೆಗೆ ಸಿದ್ಧರಿರುತ್ತಾರೆ. ಒಬ್ಬರಿಗೆ ಕೇವಲ ೧ ರೂಪಾಯಿ...! ಹಾಯಿ ದೋಣಿಯಲ್ಲಿ ನೀರಿನ ಸೆಳೆತಕ್ಕೆ ತೂಗುತ್ತ, ನದಿಯ ನೀರನ್ನು ಕೈಯಲ್ಲಿ ಚಿಮುಕಿಸುತ್ತಾ ಸಾಗುವಾಗ ಮನಸ್ಸಿಗೆ ನೆನಪಾಗುವುದು ಅದೇ ಹಾಡು...."ದೋಣಿ ಸಾಗಲಿ...ಮುಂದೆ ಹೋಗಲಿ"...!!

ಕಲ್ಲಿನದಲ್ಲದಿದ್ದರೂ ಸ್ವಲ್ಪ ಹಳೆಯ ಕಾಲದ ದೇವಸ್ಥಾನ, ಅರ್ಚಕರ ಆತಿಥ್ಯ ಮನಸ್ಸಿಗೆ ಹಿಡಿಸುತ್ತದೆ. ದೇವಸ್ಥಾನದಲ್ಲಿ ಅರ್ಚನೆ ಮಾಡಿಸಿ, ವಾಪಾಸು ನದಿಯ ದಡಕ್ಕೆ ಬಂದೆವು. ದೋಣಿಯು ಆಚೆ ದಡದಲ್ಲಿದ್ದರಿಂದ ಸ್ವಲ್ಪ ಹೊತ್ತು ಕಾಯಬೇಕಾಯಿತು. ಪ್ರಸಿದ್ಧ " ಬಂಗಾರಮಕ್ಕಿ ವೀರಾಂಜನೇಯ ಸ್ವಾಮಿ" ದೇವಸ್ಥಾನ ಇಲ್ಲಿಯೇ ಇರುವುದು. ಘಟ್ಟ ಪ್ರದೇಶದಲ್ಲಿ ದೂರದಲ್ಲಿ ಸುಂದರ ಜಲಪಾತ ಕಾಣಿಸುತ್ತದೆ. ಸಮೀಪಕ್ಕೆ ಹೋಗಲು ಸಾಧ್ಯವಿಲ್ಲದ್ದರಿಂದ ದೂರದಿಂದಲೇ ನೋಡಿ ಖುಷಿ ಪಡಬೇಕಾಯಿತು.

ಅಲ್ಲಿಂದ ಹೊರಟು ಜೋಗ ಜಲಪಾತ ವೀಕ್ಷಣೆಗೆ ಬಂದೆವು. ಜೋಗ ಜಲಪಾತ ನೀರಿಲ್ಲದೆ ಸೊರಗಿತ್ತು. ಬರಿಯ ಬಂಡೆಗಳು. ಬ್ರಿಟಿಷ್ ಬಂಗ್ಲೆ ಯ ಕಡೆ ಹೋಗಿ ಜಲಪಾತದ ನೋಡಿದೆವು. ತಣ್ಣನೆಯ ಗಾಳಿ, ಆಗಾಗ ಬರುತ್ತಿದ್ದ ತುಂತುರು ಮಳೆ, "ಮುಂಗಾರುಮಳೆ" ದೃಶ್ಯವನ್ನು ನೆನಪಿಸಿತ್ತು. ಇಲ್ಲಿಂದ ಜಲಪಾತದ ವೀಕ್ಷಣೆ ಅದ್ಭುತವೂ ಅಷ್ಟೇ ಅಪಾಯವೂ ಆಗಿದೆ. ರಾಜ ಕವಲಿನ ಮೇಲ್ಭಾಗ ಬಗ್ಗಿ ಪ್ರಪಾತ ವೀಕ್ಷಿಸುವುದು ಅದ್ಭುತ ಅನುಭವ.

ನಿರಾಸೆಗೊಂಡ ಅರವಿಂದನಿಗೆ ಮಳೆಗಾಲದಲ್ಲಿ ಮತ್ತೊಮ್ಮೆ ವೈಭವದ ಜೋಗವನ್ನು ನೋಡಲು ಬರೋಣವೆಂದು ಭರವಸೆ ನೀಡಿದೆವು.

"ರಾಜ ಕಲ್ಲು" ವ್ಯೂ ಪಾಯಿಂಟ್ ಗೆ ಬಂದು ಸ್ವಲ್ಪ ಹೊತ್ತು ವಿರಮಿಸಿ, ಕುರುಕಲು ತಿನಿಸು ತಿಂದು, ವಾಪಾಸು ಮನೆಗೆ ಬಂದಾಗ ಸಂಜೆ ೫ ಗಂಟೆ ಆಗಿತ್ತು.

ಜೋಗದ ಹೋಟೆಲೊಂದರ ಮುಂದೆ ಅರಳಿದ್ದ ಸೂರ್ಯಕಾಂತಿ ಹೂ.

ಮಳೆಗಾಲದಲ್ಲಿ ಮಲೆನಾಡು - ಸುಂದರ ಜಲಪಾತ.

2009-04-07T01:49:00.000-07:00

"ಮಳೆಗಾಲ" ಅಂದೊಡನೆ ನೆನಪಾಗುವುದು ರಚ್ಚೆ ಹಿಡಿದಂತೆ ಸುರಿಯುವ ಮಳೆ, ಎಲ್ಲೆಲ್ಲೂ ಕೆಂಪು ನೀರು, ತುಂಬಿ ಹರಿಯುವ ಹಳ್ಳ, ಹೊಳೆ, ಹಚ್ಚ ಹಸಿರಿನ ಕಾಡು, ಮರ ಗಿಡಗಳು, ಜಲಪಾತ, ಹಿತವಾದ ಚಳಿ. ಇದು ನಮ್ಮೂರಿನ ಮಳೆಗಾಲದ ನಿತ್ಯ ಬದುಕು. ಪ್ರತಿ ವರ್ಷ ಮಳೆಗಾಲದಲ್ಲಿ ಒಂದೆರಡು ದಿನ ಕೆಲಸಕ್ಕೆ ರಜ ಹಾಕಿ, ಊರಲ್ಲಿ ಮಳೆಯ ಮಜ ಅನುಭವಿಸುವುದು ನನಗೆ ತುಂಬಾ ಇಷ್ಟ. ನಿಜವಾದ ಪ್ರಕೃತಿ ಸೌಂದರ್ಯ ಅಲ್ಲಿದೆ. ಚಿಕ್ಕವನಿದ್ದಾಗಿಂದ ಕಳೆದ ಮಳೆಗಾಲದ ದಿನಗಳು ಎಂದಿಗೂ ಮರೆಯಲು ಸಾಧ್ಯ ಇಲ್ಲ. ದಿನಗಟ್ಟಲೆ ಸುರಿಯುವ ಮಳೆಯಲ್ಲಿ ಛತ್ರಿ ಇದ್ದರೂ ಬೇಕಂತಲೇ ನೆನೆಯುತ್ತಿದ್ದಿದ್ದು, ಬಿಳಿ ಅಂಗಿಗೆ (ಯುನಿಫಾರ್ಮ್) ಎಷ್ಟು ಸಾಧ್ಯವೋ ಅಷ್ಟು ಕೆಸರು ಮೆತ್ತಿಕೊಂಡಿದ್ದು, ಅಪ್ಪನಿಂದ ಯಥೆಶ್ಚ ಬೈಗುಳ... (ಬಂಡೆ ಮೇಲೆ ಮಳೆ ಸುರಿದ ಹಾಗೆ..!!) ತುಂಬಿದ ಹೊಳೆ ನೋಡಲು ಹೋಗಿ, ಸ್ವಲ್ಪದರಲ್ಲಿ ಪ್ರಾಣಾಪಾಯದಿಂದ ಪಾರಾಗಿ ಬಂದಿದ್ದು, ಸೀತಾಲಿ-ದಂಡೆ ಹೂವು, ಬಿಕ್ಕೆ ಹಣ್ಣು, ಚಳ್ಳೆ ಹಣ್ಣು, ಪಿಳ್ಳೆ ಹಣ್ಣು, ವಾರಗಟ್ಟಲೆ ಕರೆಂಟು ಇಲ್ಲದೆ ಕಳೆದ ದಿನಗಳು ಎಲ್ಲವು ಹಸಿರಾಗಿದೆ. ಈಗಲೂ ಮನೆಗೆ ಹೋದಾಗ ಸುಮ್ಮನೆ ದಿನಗಟ್ಟಲೆ ಮಳೆಯನ್ನೇ ನೋಡುತ್ತಾ ಕುಳಿತು ಬಿಡುತ್ತೇನೆ.ಇವೆಲ್ಲವನ್ನೂ ನಾನು ಅಗಾಗ ನನ್ನ ಸ್ನೇಹಿತರಲ್ಲಿ ಕೊರೆಯುತ್ತೇನೆ. ಹಾಗಾಗಿ ಕಳೆದ ಸಲ ಅವರನ್ನು ಊರಿಗೆ ಕರೆದೊಯ್ಯುವುದು ಅನಿವಾರ್ಯ ಆಗಿತ್ತು. ಹಾಗೆಯೆ ಅಲ್ಲಿನ ಸುತ್ತಮುತ್ತ ಪ್ರವಾಸಿ ತಾಣಗಳಿಗೆ ಭೇಟಿ ನೀಡುವುದು ಎಂದು ನಿರ್ಧರಿಸಿ ಜೂನ್ ೨೨ ಕ್ಕೆ ಊರಿಗೆ ಹೊರಟೆವು. ಮನೆಯಲ್ಲಿ ಬೆಳಗಿನ ಉಪಹಾರ ಮುಗಿಸಿ, ಕರ್ನಾಟಕ ಸಾರಿಗೆ ಬಸ್ಸಿನಲ್ಲಿ ಸಿದ್ದಾಪುರ ತಲುಪಿದೆವು. ಗೆಳೆಯ ಮಂಜು ನಮಗಾಗಿ ಮಾರುತಿ-ಒಮ್ನಿ ಯನ್ನು ಗೊತ್ತುಮಾಡಿದ್ದ. ಸಿದ್ದಾಪುರದಲ್ಲಿ ಸ್ವಲ್ಪ ಹಣ್ಣು, ಬಿಸ್ಕೆಟ್, ಕುರುಕುಲು, ಮಳೆಯಿಂದ ತಲೆಗೆ ರಕ್ಷಣೆ ಪಡೆಯಲು ಪ್ಲಾಸ್ಟಿಕ್ ಟೋಪಿ ಖರೀದಿಸಿದೆವು. ಅಲ್ಲಿಂದ ಹೊರಟು ಹೆಗ್ಗರಣಿ ಮಾರ್ಗವಾಗಿ ಉಂಚಳ್ಳಿ ಜಲಪಾತ ನೋಡಲು ಹೊರಟೆವು. ಬಿಡದೆ ಸುರಿಯುತ್ತಿದ್ದ ಮಳೆ, ತಂಪಾದ ವಾತಾವರಣ, ಹಸಿರು ಗದ್ದೆಗಳನ್ನು ನೋಡಿ ದೂದ್ ಉತ್ಸಾಹದಲ್ಲಿದ್ದ. ದಾರಿಯ ಮಧ್ಯೆ ಅಘನಾಶಿನಿ ನದಿಯ ಬ್ರಿಡ್ಜ್ ಸಿಗುತ್ತದೆ. ಹೆಚ್ಚಿನ ಮಳೆಯಿಂದಾಗಿ ಬ್ರಿಡ್ಜ್ ನ ಮೇಲೆ ನೀರು ಬಂದಿತ್ತು. ಕೆಂಪು ನೀರಿನ ತುಂಬಿ ಹರಿಯುವ ಅಘನಾಶಿನಿ ನಿಜಕ್ಕೂ ಭಯ ಹುಟ್ಟಿಸುತ್ತೆ. ಇಲ್ಲಿ ಹರಿಯುವ ನೀರು ಮುಂದೆ ಉಂಚಳ್ಳಿ ಜಲಪಾತವನ್ನು ಸ್ರಷ್ಟಿಸುವುದು. ಅಗಾಧ ನೀರು ಚಿಕ್ಕ ಕಣಿವೆ ಮೂಲಕ ಧುಮ್ಮಿಕ್ಕುವುದು ನಿಜಕ್ಕೂ ನಂಬಲಸಾಧ್ಯ...!!ಉಂಚಳ್ಳಿ ಜಲಪಾತ : ಇದಕ್ಕೆ "ಕೆಪ್-ಜೋಗ" ಅಂತಲೂ ಕರೆಯುತ್ತಾರೆ. ೧೦೦ ಅಡಿ ಆಳಕ್ಕೆ ಭೋರ್ಗರೆಯುತ್ತಾ ಹೆಚ್ಚಿನ ಶಬ್ದ ಮಾಡುವುದರಿಂದ ಈ ಹೆಸರು . ಮಳೆಗಾಲದಲ್ಲಿ ನೀರಿನ ಪ್ರಮಾಣ ಜಾಸ್ತಿ ಇರುವುದರಿಂದ ಕೆಳಗೆ ಇಳಿಯುವುದು ಅಸಾಧ್ಯ. ಹಾಗೆ ಭಯಾನಕ ಉಂಬಳ ಕಾಟ ಬೇರೆ... ಅಕ್ಟೋಬರ್ ನಿಂದ ಮಾರ್ಚ್ ವರೆಗೆ ಜಲಪಾತ ವೀಕ್ಷಣೆ ಸೂಕ್ತ ಸಮಯ. ಉಂಚಳ್ಳಿ ಇಂದ ಹೊರಟು ಹೆಗ್ಗರಣಿ ಗೆ ಬಂದು ಸಂಜೆಯ ಲಘು-ಉಪಹಾರ ಮಾಡಿದೆವು. "ಮಿಸಳ್-ಬಾಜಿ" ಇಲ್ಲಿ ಫೇಮಸ್ ತಿಂಡಿ. ಆಗಲೇ ಕತ್ತಲಾಗುತ್ತಾ ಇದ್ದರಿಂದ ಅಲ್ಲಿಂದ ಹೊರಟು ಗೆಳೆಯ ಮಂಜು ನ ಮನೆಗೆ ಬಂದು ಉಳಿದೆವು. ಮರುದಿನ ಬೆಳಿಗ್ಗೆ ತಿಂಡಿಗೆ "ತೆಳ್ಳವು", ಚಟ್ನಿ, ಜೇನುತುಪ್ಪ, ತುಪ್ಪ. ಲೆಕ್ಕವಿಲ್ಲದಷ್ಟು ಬ್ಯಾಟ್ಟಿಂಗ್ ಮಾಡಿ ಅವರ ಮನೆಯಿಂದ ಹೊರಟಾಗ ಮಳೆ ತನ್ನ ಪ್ರಭಾವ ಹೆಚ್ಚಿಸಿತ್ತು. ಬೆಚ್ಚನೆಯ ರೈನ್-ಕೋಟ್ ಧರಿಸಿ, ಛತ್ರಿ ಹಿಡಿದು, ತಲೆಗೆ ಟೋಪಿ ಹಾಕಿಕೊಂಡು ಅರವಿಂದ ಮುಂದಿನ ಪ್ರಯಾಣಕ್ಕೆ ರೆಡಿ ಆಗಿದ್ದ. ನಮಗೆ ಗೈಡ್ ಆಗಿ ಮಂಜು ನ ತಮ್ಮ ವಿಶ್ವನಾಥ ನನ್ನು ಕರೆದುಕೊಂಡು ಅಲ್ಲಿಂದ ಹೊರಟು ಮಂಜಗುಣಿಗೆ ಹೋದೆವು. ಸಿರಸಿ-ಕುಮಟಾ ಹೆದ್ದಾರಿಯಲ್ಲಿ, ಸಿರ್ಸಿಯಿಂದ ಸುಮಾರು ೨೨ ಕಿ.ಮೀ ಹೋದರೆ "ಕೂರ್ಸೆ" ಎಂಬ ಊರು ಸಿಗುತ್ತದೆ. ಅಲ್ಲಿಂದ ಬಲಗಡೆಗೆ ತಿರುಗಿ ೫ ಕಿ.ಮೀ. ಹೋದರೆ "ಮಂಜಗುಣಿ" ವೆಂಕಟರಮಣ ಸ್ವಾಮಿ ದೇವಸ್ಥಾನ ಸಿಗುತ್ತದೆ. ಕಲ್ಲಿನ ದೇವಸ್ಥಾನ, ರಥ, ಸುಂದರ ಪುಷ್ಕರಣಿ ಇಲ್ಲಿನ ವಿಶೇಷ. ದೇವರ ಪ್ರಸಾದ "ಅತ್ರಾಸ" ತುಂಬಾ ಸವಿಯಾದುದು. ಸುಂದರ ಪುಷ್ಕರಣಿ ದಡದಲ್ಲಿ ಸುಮಾರು ಹೊತ್ತು ಕುಳಿತಿದ್ದೆವು. ಅಲ್ಲಿಂದ ಹೊರಟು "ಹೆಗಡೆಕಟ್ಟಾ" ಮಾರ್ಗವಾಗಿ " ಯಾಣ" ಕ್ಕೆ ಹೋದೆವು.
ಯಾಣ : ಯಾಣ ಸಿರಸಿ ಯಿಂದ ೨೫ ಕಿ.ಮೀ ದೂರದಲ್ಲಿದ್ದು ದಟ್ಟ ಪಶ್ಚಿಮ ಘಟ್ಟದ ಮಧ್ಯದಲ್ಲಿದೆ. ಇಲ್ಲಿನ ಭೈರವೇಶ್ವರ ಶಿಖರ ನೆಲದಿಂದ ೧೨೦ ಮೀಟರ್ ಹಾಗೂ ಮೋಹಿನಿ ಶಿಖರ ೯೦ ಮೀಟರ್ ಎತ್ತರದಲ್ಲಿದೆ. ಈ ಶಿಖರಗಳು ಕಪ್ಪು ಸುಣ್ಣದ ಕಲ್ಲಿಂದ ಮಾಡಲ್ಪಟ್ಟಿದ್ದು ಪುರಾಣದ ಕಥೆಯನ್ನು ಸಾರುತ್ತವೆ. ಸುಮಾರು ೩ ಮೀಟರ್ ಎತ್ತರದ ಗುಹೆಯ ಒಳಗಡೆ ಶಿವಲಿಂಗ ಇದೆ. ಶಿವನ ತಲೆಯಮೇಲೆ ಸದಾಕಾಲ ನೀರು ಬೀಳುತ್ತಾ ಇರುವುದರಿಂದ "ಗಂಗೊಧ್ಭವ" ಎಂದೂ ಪ್ರಸಿದ್ದಿಯಾಗಿದೆ. "ಭಸ್ಮಾಸುರ -ಮೋಹಿನಿ" ಪುರಾಣ ಪ್ರಸಿದ್ಧ ಕಥೆಯನ್ನು ಇಲ್ಲಿನ ಶಿಖರ ಸಾರುತ್ತದೆ. ಇಲ್ಲಿಂದಲೇ "ಚಂಡೀಹೊಳೆ" ಉಗಮವಾಗಿ ಮುಂದೆ ಅಘನಾಶಿನಿ ನದಿಯನ್ನು ಸೇರುತ್ತದೆ. ಇದು ಒಂದು ಅದ್ಭುತ ನಿಸರ್ಗ ವಿಸ್ಮಯಗಳಲ್ಲೊಂದು. ಯಾಣದ ಸೌಂದರ್ಯವನ್ನು ಕಣ್ಣು ತುಂಬಿಕೊಂಡು, ಭೈರವೇಶ್ವರ ನ ದರ್ಶನ ಮಾಡಿ, ಅಲ್ಲಿಂದ ಘಟ್ಟದ ಮಧ್ಯೆ ಸಾಗುವ ದಾರಿಯಲ್ಲಿ "ವಿಭೂತಿ" ಜಲಪಾತಕ್ಕೆ ಹೊರಟೆವು. ಯಾಣದಿಂದ ನೇರವಾಗಿ ಕುಮಟಕ್ಕೆ ಹೋಗುವ ದಾರಿಯಲ್ಲಿ ಸಾಗಿದರೆ " ವಿಭೂತಿ" ಜಲಪಾತ ಸಿಗುತ್ತದೆ. ಪಶ್ಚಿಮ ಘಟ್ಟವು ಜಲಪಾತಗಳಿಗೆ ಪ್ರಸಿದ್ದಿ. ಎಷ್ಟೋ ಜಲಪಾತಗಳು ಜನರಿಗೆ ಗೊತ್ತಾಗದೆ ದಟ್ಟ ಕಾನನದ ಮಧ್ಯೆ ಹುದುಗಿ ಹೋಗಿವೆ. ಇನ್ನು ಕೆಲವು ಕೇವಲ ಮಳೆಗಾಲಕ್ಕೆ ಮಾತ್ರ ಸೀಮಿತ. ಅಂತವುಗಳಲ್ಲಿ " ಬೆಳ್ಳುಳ್ಳಿ " ಜಲಪಾತವು ಒಂದು. ಬಳಕುವ ಜಲಪಾತದ ಸೌಂದರ್ಯವನ್ನು ನೋಡಿ ಅರವಿಂದ ಚಳಿಯನ್ನೂ ಲೆಕ್ಕಿಸದೆ ನೀರಿಗೆ ಇಳಿದು ಬಿಟ್ಟ. ತುಂಬಾ ಹೊತ್ತು ಧುಮುಕುವ ನೀರಲ್ಲಿ ಆಟ ವಾಡಿದ ನಂತರ ಸ್ವಲ್ಪ ಸಮಾಧಾನ ಆಗಿದ್ದ.ಮಳೆಗಾಲದಲ್ಲಿ ಬೆಟ್ಟದ ನೀರು ಕಲ್ಲಿನ ಮಧ್ಯೆ ಹರಿದು ಬಂದು ಸುಂದರ ಜಲಪಾತ ಸೃಷ್ಟಿಸುತ್ತೆ. ಬೆಳ್ಳನೆ ಹಾಲಿನ ಹಾಗೆ ಸುಂದರವಾಗಿ ಮೆಲ್ಲನೆ ಧುಮುಕುವ ಈ ಜಲಪಾತ ನಮಗೆಲ್ಲ ತುಂಬಾ ಇಷ್ಟವಾಯಿತು.ಇಲ್ಲಿನ ಸೌಂದರ್ಯಕ್ಕೆ ಮನಸೋತ ಕಿರಣ್ ನ ಹರ್ಷೋದ್ಘಾರ...!!!
ಎಲ್ಲರೂ ನೀರಲ್ಲಿ ಆಟ ಆಡಿ ಮುಂದೆ ಸಾಗಿದೆವು. ಕಿರಣ ಅರವಿಂದ ಮತ್ತು ಸುಹಾಸ - ಮಳೆಗೆ ಸಿದ್ಧವಾಗಿ ನಿಂತಿರುವುದು.ಯಾಣದಿಂದ ಸುಮಾರು ೧೦ ಕಿ ಮೀ. ವಡ್ಡಿ ಘಾಟ್ ಮೂಲಕ ಹೋದರೆ "ಮಾಬಗಿ" ಎಂಬ ಊರು ಸಿಗುತ್ತದೆ. ಅಲ್ಲಿ ವಾಹನವನ್ನು ನಿಲ್ಲಿಸಿ, ಅಲ್ಲಿಂದ ಮುಂದೆ ಕಾಲುನಡಿಗೆಯಲ್ಲಿ ವಿಭೂತಿ ಜಲಪಾತಕ್ಕೆ ಹೋಗಬೇಕು. ಇಲ್ಲಿಯೇ ನಮಗೆಲ್ಲ ಉಂಬಳದ ನಿಜವಾದ ಮಹಿಮೆ ಅರ್ಥ ಆಗಿದ್ದು. ಅಲ್ಲಿಯ ವರೆಗೆ ಉಂಬಳದ ಬಗ್ಗೆ ಅಷ್ತೊದ್ದು ತಲೆಕೆಡಿಸಿಕೊಂಡಿರದ ಎಲ್ಲರೂ ನಿಧಾನವಾಗಿ ನಡಿಯುತ್ತ ಇದ್ದೆವು. ಜಲಪಾತವನ್ನು ಸಮೀಪಿಸಿದಾಗ ವಿಶ್ವ ಒಂದು ಸಲ ಕಾಲನ್ನು ನೋಡಿಕೊಳ್ಳಿ ಅಂದ. ಅಯ್ಯೋ...!! ಒಬ್ಬಬ್ಬರ ಕಾಲಲ್ಲಿ ಬರೋಬ್ಬರಿ ೪೦-೫೦ ಉಂಬಳ ಇದ್ದವು. ಎಲ್ಲಿ ನೋಡಿದರೂ ಉಂಬಳ..ಉಂಬಳ...!!ಹೊಳೆಯ ಮಧ್ಯೆ ನೀರಿನ ರಭಸಕ್ಕೆ ನಿಂತು ಒಂದೊಂದಾಗಿ ಉಂಬಳ ತೆಗೆದು ನೀರಲ್ಲಿ ಬಿಡುತ್ತಿದ್ದೆವು.. ಅಂತೂ ಅವೆಲ್ಲವನೂ ತೆಗೆದು ಸಾಕಾಗಿ ಹೋಯಿತು... ಜಲಪಾತವನ್ನು ನೋಡುವ ಆಸೆ ಯಾರಿಗೂ ಉಳಿದಿರಲಿಲ್ಲ...!!
ವಿಭೂತಿ ಜಲಪಾತ : ಸಿರ್ಸಿ ಇಂದ ದೇವನಹಳ್ಳಿ, ಹೆಗಡೆಕಟ್ಟ ಮಾರ್ಗವಾಗಿ ಮತ್ತಿಘಟ್ಟ ತಲುಪಿ ಅಲ್ಲಿಂದ ವಡ್ಡಿ ಘಾಟ್ ಮೂಲಕ ೧೦ ಕಿ.ಮೀ. ಸಾಗಿದರೆ ಮಾಬಗೆ ಎಂಬ ಊರು ಸಿಗುತ್ತದೆ. ಮಾಬಗೆಯಲ್ಲೇ ಮಣ್ಣಿನ ರಸ್ತೆಯಲ್ಲಿ ೨ ಕಿಮಿ ಚಲಿಸಿ ನಂತರ ೨೦ನಿಮಿಷ ನಡೆದರೆ ಸುಂದರ ವಿಭೂತಿ ಜಲಧಾರೆಯ ದರ್ಶನ.ಸುಮಾರು ೧೦೦ ಅಡಿ ಎತ್ತರವಿರುವ ಜಲಧಾರೆ ಸಮೀಪ ತೆರಳುವುದು ಮಳೆಗಾಲದಲ್ಲಿ ಕಷ್ಟ. ಸ್ವಲ್ಪ ದೂರ ನಿಂತೇ ನೋಡಬೇಕಾಗಬಹುದು. ನೀರು ಧುಮುಕುವಲ್ಲಿ ನೀರಿಗಿಳಿಯುವುದು ಅಪಾಯ. ಸುತ್ತಮುತ್ತ ಸುಣ್ಣದ ಕಲ್ಲು ಇರುವುದರಿಂದ ಜಲಪಾತಕ್ಕೆ ಈ ಹೆಸರು. ಇಲ್ಲಿ ವರ್ಷಪೂರ್ತಿ ನೀರು ಇರುತ್ತದೆ. ಅರ್ಧ ಗಂಟೆ ಜಲಪಾತದ ಸೌಂದರ್ಯವನ್ನು ಸವಿದು ಅಲ್ಲಿಂದ ವಾಪಾಸ್ ಹೊರಟೆವು. ಹೋಗುವಾಗ ಒಂದೇ ಉಸಿರಿಗೆ ೧ ಕಿ.ಮೀ ಓಡಿ ಕಾರ್ ನ ಬಳಿ ಬಂದೆವು. ಅಷ್ಟು ವೇಗವಾಗಿ ಓಡಿದರು ೧೦ ಉಂಬಳ ಆಗಲೇ ನಮ್ಮ ಪಾದ ಸೇರಿದ್ದವು...!!ಗೆಳೆಯರೆಲ್ಲರಿಗೂ ಮಳೆಗಾಲದ ಅನುಭವ ಸ್ವಲ್ಪ ಹೆಚ್ಚಾಗಿಯೇ ಆಗಿತ್ತು..!!

ಸಕಲೇಶಪುರ ರೈಲು ಹಳಿಯ ಚಾರಣ - ಭಾಗ ೨

2009-03-09T21:14:00.000-07:00

ಬ್ರಿಡ್ಜ್ ನ ಮೇಲೆ ಸಾಗುವ ರೈಲಿನ ಚಿತ್ರ....!! ಆಗ ನಾವು ಬ್ರಿಡ್ಜ್ ನ ಕೆಳಗಿದ್ದೆವು...

ಬಿಸಿಲು ನಿಧಾನವಾಗಿ ಹೆಚ್ಚಾಗುತ್ತಾ ಇತ್ತು. ಆಗಾಗ ನೆರಳಿನಲ್ಲಿ ವಿರಮಿಸಿಕೊಂಡು ನಾವು ಮುಂದೆ ಸಾಗಿದ್ದೆವು. ಚಾರ್ಮಾಡಿ ಘಟ್ಟದ ದ್ರಶ್ಯವಂತೂ ಅಧ್ಬುತವಾಗಿತ್ತು. ಅಲ್ಲಲ್ಲಿ ಸಿಗುತ್ತಿದ್ದ ಸಣ್ಣ ಸಣ್ಣ ಹಳ್ಳದಲ್ಲಿ ಬೇಸಿಗೆಯಲ್ಲೂ ಸಹ ನೀರು ಹರಿಯುತ್ತಿತ್ತು. ಝರಿಯ ನೀರು ತುಂಬಾ ಸಿಹಿಯಾಗಿತ್ತು. ದಾರಿಯುದ್ದಕ್ಕೂ ನೀರು ಸಿಗುವುದು ಮೊದಲೇ ಗೊತ್ತಿದ್ದರೆ ಮಣಭಾರದ ನೀರಿನ ಬಾಟಲ್ ಹೊತ್ತುಕೊಂಡು ಹೋಗುವುದು ತಪ್ಪುತ್ತಿತ್ತು.

ನಮಗೆ ಎದುರಾದದ್ದು ೬ ರೈಲುಗಳು. ಅಲ್ಲಿ ಸಿಗುತ್ತಿದ್ದ ಬ್ರಿಡ್ಜ್ ಗಳು ಒಂದಕ್ಕಿಂತ ಒಂದು ಅದ್ಭುತವಾಗಿತ್ತು. ಅಷ್ಟೇ ಅಪಾಯಕಾರಿ ಕೂಡ...ಸ್ವಲ್ಪ ಅಜಾಗರೂಕತೆ ತೋರಿದರೂ ೧೦೦-೨೦೦ ಅಡಿ ಕೆಳಕ್ಕೆ ಬೀಳುವುದು ಖಂಡಿತ. ಗೂಡ್ಸ್ ರೈಲುಗಳು ಆಗಾಗ ಬರುತ್ತಿರುತ್ತೆ. ಹಾಗಾಗಿ ಬ್ರಿಡ್ಜ್ ದಾಟುವಾಗ ಎಚ್ಚರ ಅಗತ್ಯ...ಸರಸರನೆ ಬ್ರಿಡ್ಜ್ ನ ದಾಟಿ ಬಿಡಬೇಕು..ಸುರಂಗದಲ್ಲಿ ನಡೆಯುವುದು ಸಕತ್ ಥ್ರಿಲ್ಲಿಂಗ್...ಟಾರ್ಚ್ ಇಲ್ಲದೆ ಸುರಂಗದಲ್ಲಿ ನಡೆಯಲು ಸಾಧ್ಯವಿಲ್ಲ... ನಮಗೆ ಸಿಕ್ಕ ಅತೀ ಉದ್ದದ ಸುರಂಗ ಅಂದರೆ ೭೫೦ ಮೀ. ಸುರಂಗದ ಒಳಗೆ ನಮಗೆ ರೈಲು ಸಿಗಲಿಲ್ಲ. ಅಲ್ಲಿ ಬಿಸಿಲಿನ ಧಗೆ ಇರುವುದಿಲ್ಲ, ಹಾಗಾಗಿ ಸ್ವಲ್ಪ ಫಾಸ್ಟ್ ಆಗಿ ನಡೆಯಲು ಸಾಧ್ಯ. ಸುರಂಗದ ಬಾಗಿಲಲ್ಲಿ ನಮ್ ಟೀಮ್. ನಾವು ಸುಮಾರು ೧೨ ಕಿ. ಮೀ. ನಡೆದಿದ್ದೆವು. ಸಂತು ಕಂಬಿಯ ಮಧ್ಯೆ ಕಾಲು ಸಿಕ್ಕಿಸಿಕೊಂಡು, ಕಾಲನ್ನು ಉಳುಕಿಸಿಕೊಂಡು ಬಿಟ್ಟ. ಅಲ್ಲಿಂದ ಅವನಿಗೆ ನಡೆಯಲು ಕಷ್ಟವಾಯಿತು. ಅಂತು ಇಂತೂ ಕಾಲೆಳೆದುಕೊಂಡು ಕುಂಟುತ್ತ ೩ ಗಂಟೆಯ ವರೆಗೆ ನಡೆಸಿದೆವು. ಅವನ ಪರಿಸ್ಥಿತಿ ತುಂಬಾ ಕಷ್ಟವಾಗಿತ್ತು, ಭಾರದ ಬ್ಯಾಗು, ಬಿಸಿಲು, ಒಂದು ಕಾಲು ಕುಂಟು... !! ಜಲ್ಲಿ ಕಲ್ಲಿನ ಮೇಲೆ ನಡೆಯಲು ಕಷ್ಟಪಡ್ತಾ ಇದ್ದ. ನಮ್ಮ ಗುರಿ ಇದ್ದಿದ್ದು "ಎಡಕುಮೇರಿ" ಎಂಬ ಸ್ಟೇಷನ್. ಇನ್ನೂ ಸುಮಾರು ೪ ಕಿ. ಮೀ. ಬಾಕಿ ಇತ್ತು. ಎಡಕುಮೇರಿ ಇಂದ ಸಕಲೇಶಪುರ - ಸುಬ್ರಮಣ್ಯ ಹೈವೇ ಸೇರಲು ಮತ್ತೂ ೪ ಕಿ. ಮೀ ನಡೆಯಬೇಕಿತ್ತು...ಅದನ್ನು ಕೇಳಿ ಸಂತು "ಉಸ್ಸಪ್ಪ" ಎಂದು ಮಲಗಿಬಿಟ್ಟ..! ನಮಗೆ ಸನಿಹದ ದಾರಿ ಹುಡುಕುವುದು ಅನಿವಾರ್ಯವಾಯಿತು.
ಅಲ್ಲಿಯೇ ಕೆಲಸ ಮಾಡುತಿದ್ದ "ಪುಟ್ಟಸ್ವಾಮಿ" ಎಂಬ ಪ್ರಚಂಡ ಆಸಾಮಿಯ ಬಳಿ ಹೈವೇ ಸೇರಲು ಬೇರೆ ದಾರಿ ಇದೆಯೇ ಅಂತ ಕೇಳಿದೆವು. ಆತ ಹತ್ತಿರದಲ್ಲಿಯೇ ಮರ ಸಾಗಿಸುವ ಲಾರಿ ಬರುತ್ತದೆ ಅದರಲ್ಲಿ ಹೋಗಬಹುದೆಂದು ತಿಳಿಸಿದ.. ನಮ್ಮ ಚಾರಣವನ್ನು ಅಲ್ಲಿಯೇ ಮೊಟಕುಗೊಳಿಸಿ ಅವನನ್ನೂ ಕರೆದುಕೊಂಡು ಕಾಡಿನ ದಾರಿಯಲ್ಲಿ ನಡೆದೆವು. ಗುಡ್ಡ ಹತ್ತಲು ಏದುಸಿರು ಬಿಡುತ್ತಾ, ಅಂತೂ ಇಂತೂ ಅವನು ಹೇಳಿದ ಜಾಗಕ್ಕೆ ಬಂದು ಸೇರಿದೆವು. ದಾರಿಯುದ್ದಕ್ಕೂ ಪುಟ್ಟಸ್ವಾಮಿ ವಟಗುಟ್ಟುತ್ತಲೇ ಇದ್ದ...!! ಬಹುಶ: ಮರದ ಬಾಯಿಯಾಗಿದ್ದರೆ ಒಡೆದೆ ಹೋಗುತ್ತಿತ್ತೇನೋ...!! ಪುಟ್ಟಸ್ವಾಮಿ ಫೋಟೋಕ್ಕೆ ಪೋಸು ಕೊಟ್ಟಿದ್ದು ಹೀಗೆ..

ಲಾರಿ ಬರುವುದು ಸ್ವಲ್ಪ ಸಮಯವಾಗುತ್ತದೆಂದು ಹೇಳಿದ. ಅಲ್ಲಿ ಸ್ವಲ್ಪ ಹೊತ್ತು ಮಲಗಿ ನಿದ್ದೆ ಮಾಡಿದೆವು...ಆ ಜಾಗ ತುಂಬಾ ಸುಂದರವಾಗಿತ್ತು... ಸುತ್ತಲೂ ಕಾಡು. ಚಂದದ ಚಾರ್ಮಾಡಿ ಘಟ್ಟ ಪ್ರದೇಶ.. !! ಅಲ್ಲಿಂದ ಮುಂದೆ ನಮ್ಮ ಪ್ರಯಾಣ ಲಾರಿಯಲ್ಲಿ ಸಾಗಿತು. ಲಾರಿಯಲ್ಲಿ "ಹೆತ್ತೂರು" ಎಂಬ ಹಳ್ಳಿಗೆ ತಲುಪಿದೆವು..ಅಲ್ಲಿಂದ ಸಕಲೇಶಪುರಕ್ಕೆ ಹೋಗುವ ಕೊನೇಯ ಬಸ್ಸು ಹೋಗಿಯಾಗಿತ್ತು...ಮಾರುತಿ ವ್ಯಾನ್ ಒಂದನ್ನು ಬಾಡಿಗೆಗೆ ಪಡೆದು "ಕೂಡುರಸ್ತೆ" ಗೆ ಬಂದೆವು.. ಅಲ್ಲಿಂದ ೧೦ ಕಿ. ಮೀ. ಬಸ್ಸಿನಲ್ಲಿ ಪ್ರಯಾಣಿಸಿ ಯಾವುದೂ ಊರಿಗೆ ಬಂದು ಸೇರಿದೆವು. ಅಲ್ಲಿಂದ ಬಾಡಿಗೆ ರಿಕ್ಷ ಒಂದನ್ನು ಪಡೆದು ಸಕಲೇಶಪುರಕ್ಕೆ ಬಂದಾಗ ೮.೩೦. ಸಕಲೇಶಪುರದಲ್ಲಿ ರೂಮ್ ಮಾಡಿ, ಪರೋಟ ಊಟಮಾಡಿ ಮಲಗಿದಾಗ ೯.೩೦. ಕಾಲುಗಳು ಆಗಲೇ ಡಾನ್ಸ್ ಮಾಡುತ್ತಿದ್ದವು... ಯಾರಿಗೂ ನಿಲ್ಲಲೂ ತ್ರಾಣ ಇರಲಿಲ್ಲ..:-) ಎತ್ತಿ ಬಿಸಾಕಿದರೂ ನಮಗೆ ಎಚ್ಚರ ಆಗುತ್ತಿರಲಿಲ್ಲ..ಅಂತಹ ಘಾಡ ನಿದ್ರೆ...!! ಹುರುಪಿನಿಂದ ಶುರುವಾಗಿ, ಸುಸ್ತು, ಪರದಾಟ ದಲ್ಲಿ ನಮ್ಮ ಚಾರಣ ಮುಗಿದಿತ್ತು...!!
ಕಾಲು ಉಳುಕಿಸಿಕೊಂಡ ಸಂತು...

ಮರುದಿನ ಭಾನುವಾರ, ೨೨ ನೆ ತಾರೀಕು. ಸ್ನಾನ, ತಿಂಡಿ ಮುಗಿಸಿದಾಗ ೯ ಗಂಟೆ. ಅಲ್ಲಿಂದ " ಮೂಕನಮನೆ ಅಬ್ಬಿ ಜಲಪಾತ" ಕ್ಕೆ ಬಾಡಿಗೆ ರಿಕ್ಷ ದಲ್ಲಿ ಹೊರಟೆವು. ಸಕಲೇಶಪುರದಿಂದ ಸುಬ್ರಮಣ್ಯ ರಸ್ತೆಯಲ್ಲಿ ೨೦ ಕಿ.ಮೀ ದೂರ ಸಾಗಿದರೆ "ಹೆತ್ತೂರು" ಎಂಬ ಹಳ್ಳಿ ಸಿಗುತ್ತದೆ. ಅಲ್ಲಿಂದ ೪ ಕಿ. ಮೀ. ದೂರಕ್ಕೆ ಕೂಡುರಸ್ತೆ ಸಿಗುತ್ತದೆ. ಅಲ್ಲಿಂದ ಬಲಕ್ಕೆ ತಿರುಗಿ "ಬ್ಯಾಡರಹಳ್ಳಿ" ಮುಖಾಂತರ ಹೋದರೆ "ಮೂಕನಮನೆ ಅಬ್ಬಿ ಜಲಪಾತ" ಅಂತ ಬೋರ್ಡ್ ಸಿಗುತ್ತದೆ. ಅಲ್ಲಿಂದ ಬಲಕ್ಕೆ ೧ ಕಿ. ಮೀ ಹೋದರೆ ಒಂದು ಮನೆ ಸಿಗುತ್ತದೆ.. ಆ ಮನೆಯ ಪಕ್ಕದಲ್ಲೇ ಇಳಿಜಾರಿನಲ್ಲಿ ಅಬ್ಬಿ ಜಲಪಾತ ಸಿಗುತ್ತದೆ. ಜಲಪಾತದ ತನಕ ವಾಹನದಲ್ಲಿ ಹೋಗಬಹುದು... !

ಜಲಪಾತ ಮಳೆಗಾಲದಲ್ಲಿ ತುಂಬಿ ಹರಿಯುತ್ತಿರುತ್ತದೆ..ಅಂತರ್ಜಾಲದಲ್ಲಿ ಸಿಕ್ಕಿದ ಅಬ್ಬಿ ಜಲಪಾತದ ಮಳೆಗಾಲದ ವೈಭವದ ಫೋಟೋ. ಬೇಸಿಗೆಯಲ್ಲಿ ನೀರಿನ ಹರಿವು ಕಡಿಮೆ ಇತ್ತಾದರೂ ಮೈ-ಮನ ತಣಿಸುವಷ್ಟಿತ್ತು..! ಸುಮಾರು ೧೫ ಅಡಿ ಎತ್ತರದಿಂದ ನೀರು ಬೀಳುತ್ತದೆ. ನೀರಿನಲ್ಲಿ ಅಪಾಯ ಇಲ್ಲ. ದಟ್ಟ ಕಾಡಿನ ನಡುವೆ ಇರುವ ಜಲಪಾತ ಇನ್ನೂ ಪ್ರಪಂಚಕ್ಕೆ ಹೆಚ್ಚಿನ ಪರಿಚಯ ಆಗಿಲ್ಲ...ಪ್ಲಾಸ್ಟಿಕ್ ಹಾಗೂ ಇತರೆ ಮಧ್ಯದ ಬಾಟಲಿಗಳ ಸುಳಿವಿರಲಿಲ್ಲ...ಸ್ವಚ್ಛ ಪರಿಸರದ ಸುಂದರ ಜಲಪಾತ...!!

ನಮಗೆ ಇಲ್ಲೂ ಸಹ ಪರದಾಟ ತಪ್ಪಲಿಲ್ಲ...ದಾರಿಯಲ್ಲಿ ಸಿಕ್ಕವರನ್ನು ಕೇಳುತ್ತಾ, ಜಲಪಾತದ ದಾರಿಯ ಬೋರ್ಡ್ ಏನೂ ಸಿಕ್ಕಿತ್ತು...ಅಲ್ಲಿಂದ ಮುಂದೆ ಮಣ್ಣು ರಸ್ತೆಯಲ್ಲಿ ಸಾಗಿದಾಗ ದಾರಿ ಇದ್ದಕ್ಕಿದ್ದ ಹಾಗೆ ಕೊನೆಗೊಳ್ಳುತ್ತೆ...ಅಲ್ಲಿಯೇ ಹೊಳೆ ಇರುವುದು... ಆದರೆ ನಮಗೆ ಜಲಪಾತ ಸಿಗಲಿಲ್ಲ...ಸುಮಾರು ಹೊತ್ತು ಎಲ್ಲ ಕಡೆ ಹುಡುಕಿದರೂ ಜಲಪಾತದ ಶಬ್ದ ಕೂಡ ಕೇಳಿಸಲಿಲ್ಲ..ಅಲ್ಲಿನ ಮನೆಯಲ್ಲೂ ಯಾರೂ ಇರಲಿಲ್ಲ...ಅಕ್ಕಪಕ್ಕದಲ್ಲಿ ಜನರ ಸುಳಿವೇ ಇಲ್ಲ...!!.ಕೊನೆಗೆ ಅದೇ ನೀರಲ್ಲಿ ಆಟ ಆಡಿ ವಾಪಾಸ್ ಹೋಗುವ ನಿರ್ಧಾರಕ್ಕೆ ಬಂದಿದ್ದೆವು..ಎಲ್ಲರಲ್ಲೂ ನಿರಾಸೆ...:-( ಕೊನೇಯ ಪ್ರಯತ್ನ ಎಂಬಂತೆ ಅರವಿಂದ ಮತ್ತೆ ದೂದ್ ನೀರಿನ ಹರಿವು ಕಡೆ ಸಾಗಿದರು... ಅಲ್ಲಿ ಸಿಕ್ಕಿತ್ತು ಜಲಪಾತ...!! ಜಲಪಾತ ನೋಡಿದ ನಮಗೆ ನಿರಾಸೆ ಆಗಲಿಲ್ಲ. ಸಾಕಷ್ಟು ನೀರು ಇತ್ತು...ಅಚ್ಚ ಬಿಳುಪಿನ ಜಲಧಾರೆ..!

ನೀರಿನ ರಭಸಕ್ಕೆ ಮೈ-ಒಡ್ಡಿ ನಿಂತು ಪುಕ್ಸಟ್ಟೆ ಮಸಾಜ್ ಮಾಡಿಕೊಂಡ್ವಿ...ಹಿಂದಿನ ದಿನದ ನೋವೆಲ್ಲ ಮಾಯವಾಗಿತ್ತು...!! ಸುಮಾರು ೨ ತಾಸು ಅಲ್ಲಿನ ಶಾಂತ ಪರಿಸರದಲ್ಲಿದ್ದು ಅಲ್ಲಿಂದ ಹೊರಟು ಸಕಲೇಶಪುರಕ್ಕೆ ಬಂದು ರಿಕ್ಷ ಡ್ರೈವರ್ ಕೃಪೆ ಇಂದ ಅಪರೂಪದ "ಹಲಸಿನ ಕಾಯಿ ಹುಳಿ" ಊಟ ಮಾಡಿ ಬೆಂಗಳೂರು ಬಸ್ಸನ್ನು ಹಿಡಿದೆವು.
ನಮ್ಮ ಟೀಮ್ ನ ಫೋಟೋ....ನಾನು, ಸಂತು, ಅರವಿಂದ, ಕಿರಣ್ ಮತ್ತು ಸುಹಾಸ್.

ಸಕಲೇಶಪುರ ರೈಲು ಹಳಿಯ ಚಾರಣ..ಭಾಗ 1

2009-03-03T03:06:00.000-08:00

೨೦೦೯ ನೇ ಇಸವಿಯ ಮೊದಲ ಚಾರಣ...ರೂಪುರೇಷೆ..
ಫೆಬ್ರವರಿ ತಿಂಗಳು ಕಳೆಯುತ್ತಾ ಬಂದಿದ್ದರೂ ನಾವು ಯಾವುದೇ ಪ್ರವಾಸ ಅಥವಾ ಚಾರಣಕ್ಕೆ ಹೋಗಿರಲಿಲ್ಲ. ಎಲ್ಲರೂ ಕೆಲಸದಲ್ಲಿ ಭಾರಿ ಬ್ಯುಸಿ. ಆದರೂ ಚಾರಣಕ್ಕೆ ಹೋಗುವ ತುಡಿತ ದಿನೇ ದಿನೇ ಜಾಸ್ತಿ ಆಗುತ್ತಾ ಇತ್ತು. ಅಸಲು ಮೈ-ಕೈ ನೋಯಿಸಿಕೊಳ್ಳದೆ ತುಂಬಾ ದಿನಗಳೇ ಆಗಿತ್ತು. ಇದ್ದಕ್ಕಿದ್ದ ಹಾಗೆ ಅರವಿಂದ ಸಕಲೇಶಪುರದ ರೈಲು ಹಳಿಯ ಚಾರಣದ ಬಗ್ಗೆ ಹೇಳಿದ. ನಾನು ಇಂಟರ್ನೆಟ್ ನಲ್ಲಿ ಅಲ್ಲಿಯ ಫೋಟೋಗಳನ್ನು ನೋಡಿದ್ದೆ. ಗೂಡ್ಸ್ ರೈಲಿನ ಓಡಾಟ ಜಾಸ್ತಿ ಇದೆ ಎಂದೂ, ಬಿಸಿಲು ಜಾಸ್ತಿ ಹಾಗು ಹಸಿರು ಕಡಿಮೆ ಆಗಿದೆ ಎಂದೂ ಪ್ರಾಥಮಿಕ ವಿಚಾರಣೆ ಇಂದ ಗೊತ್ತಾಯಿತು. ದಿನ ಕಳೆದರೆ ಅಲ್ಲಿಗೆ ಹೋಗುವುದು ಸಾಧ್ಯವೇ ಇಲ್ಲ, ಏನಾದರೂ ಅಗಲಿ, ಹೊಟ್ಟೆ ಕರಗಿಸಲು ಅಲ್ಲಿಗೇ ಚಾರಣಕ್ಕೆ ಹೋಗೋಣ ಎಂದೂ ನಾನು ಹೇಳಿದೆ. ಅದರಂತೆ ಫೆಬ್ರವರಿ ೨೧ ರಾತ್ರಿ ಬೆಂಗಳೂರಿಂದ ಹೊರಡುವುದೆಂದು ತೀರ್ಮಾನಿಸಲಾಯಿತು. ನಾನು ಇಂಟರ್ನೆಟ್ ನಲ್ಲಿ ಜಾಲಾಡಿ ಉಪಯುಕ್ತ ಮಾಹಿತಿಯನ್ನ ಕಲೆ ಹಾಕಿದೆ. ಮಿತ್ರ ವಿನಾಯಕ ಭಟ್ ಅಲ್ಲಿನ ಬಗ್ಗೆ ತುಂಬಾ ವಿವರವಾಗಿ ಮಾಹಿತಿಯನ್ನು ಕೊಟ್ಟ. ಅವನು ೨ ಬಾರಿ ನಡೆದು ಬಂದಿದ್ದ..! ದಿನಾಂಕ ೨೧ ಶುಕ್ರವಾರ ಸಂಜೆ ನಾನು ಆಫೀಸ್ ಬಿಟ್ಟಾಗ ೮ ಗಂಟೆ..! ಉಳಿದವರು ಬೇಗ ಬಂದಿರಬಹುದು ಎಂದು ಊಹಿಸಿದವನಿಗೆ ನಿರಾಸೆ...ಎಲ್ಲರೂ ಲೇಟ್...! ದೂದ್ ಒಬ್ಬ ಬೇಗ ರೆಡಿ ಆಗಿದ್ದು ೯.೩೦ ಕ್ಕೆ ಮೆಜೆಸ್ಟಿಕ್ ಗೆ ಬರುತ್ತೇನೆಂದು ಹೇಳಿದ. ಸಂತು ಕೂಡ ಮೆಜೆಸ್ಟಿಕ್ ಗೆ ಬರುತ್ತೇನೆಂದು ಹೇಳಿದ್ದ. ದೂದ್, ೪ ಮಲಗುವ ಮ್ಯಾಟ್ ಅನ್ನು ಅವನ ಮಿತ್ರರಿಂದ ಎರವಲು ತಂದಿದ್ದ. ಅರವಿಂದ ಮತ್ತು ಬನವಾಸಿ ಊಟ ಮತ್ತು ತಿಂಡಿಯ ವ್ಯವಸ್ಥೆ ಮಾಡಿದರು...ತಲಾ ೩ ಚಪಾತಿ, ಚಟ್ನಿಪುಡಿ, ಜಾಮ್ ಬಾಟಲ್, ೧/೨ ಪೌಂಡು ಬ್ರೆಡ್ಡು, ೨ ಬನ್ನು, ೧ ಸೇಬು ಹಣ್ಣು, ೨ ಕಿತ್ತಳೆ, ೧ ಕೇಕು, ೨ ಬಿಸ್ಕತ್ತು ಪೊಟ್ಟಣ, ಚಿಪ್ಸ್, ಕೋಡುಬಳೆ, ಗ್ಲೂಕೋಸು ನಮ್ಮ ನಮ್ಮ ಬ್ಯಾಗು ಸೇರಿತು...!!ನಾನು, ಬನವಾಸಿ, ಅರವಿಂದ, ಅವನ ಮನೆಯಲ್ಲಿ ಊಟ ಮಾಡಿ ಮೂಡಲಪಾಳ್ಯ ಬಿಟ್ಟಾಗ ೧೧ ಗಂಟೆ..!! ಆಗಲೇ ದೂದ್ ಎಲ್ಲರಿಗೂ ಎರಡೆರಡು ಬಾರಿ ಫೋನ್ ಮಾಡಿದ್ದ...! ಯಾಕೋ ಗೊತ್ತಿಲ್ಲ ಪ್ರತೀ ಪ್ರವಾಸದಲ್ಲೂ ದೂದ್ ಗೆ ಹೀಗಾಗುತ್ತೆ..!! ಸುಮಾರು ೨ ತಾಸು ಮೆಜೆಸ್ಟಿಕ್ ನಲ್ಲಿ ನಮಗಾಗಿ ಕಾಯುತ್ತ ಕುಳಿತಿದ್ದ..ನಾನು ಎದುರು ಸಿಕ್ಕಾಗ ನನಗೆ ಹೇಳಿದ್ದು...." ಇನ್ನು ೫ ನಿಮಿಷ ನೋಡ್ತಾ ಇದ್ದೆ..ಬರಲಿಲ್ಲ ಅಂದಿದ್ದರೆ 'ಎಂಜಾಯ್ ಯುವರ್ ಟ್ರಿಪ್' ಅಂತ ಮೆಸೇಜ್ ಮಾಡಿ ಮನೆಗೆ ಹೋಗ್ತಾ ಇದ್ದೆ.." ಸಿಟ್ಟಿನಿಂದ ಅವನ ಮುಖ ಕೆಂಪಾಗಿತ್ತು...!! ನಾನು, ಬನವಾಸಿ, ಅರವಿಂದ, ಸಂತು, ದೂದ್ ರಾಜಹಂಸ ಬಸ್ಸಿನಲ್ಲಿ ಬೆಂಗಳೂರು ಬಿಟ್ಟಾಗ ೧೨ ಗಂಟೆ. ನಿದ್ದೆ ಮಾಡಿ, ಹಾಸನ ತಲುಪಿದಾಗ ಬೆಳಗಿನ ಜಾವ ೪.೩೦. ಅಲ್ಲಿಂದ ಧರ್ಮಸ್ಥಳಕ್ಕೆ ಹೋಗುವ ಬಸ್ಸಿಗೆ "ದೋಣಿಗಲ್" ಗೆ ರಿಕ್ವೆಸ್ಟ್ ಸ್ಟಾಪ್ ಕೇಳಿ ದೋಣಿಗಲ್ಲು ತಲುಪಿದಾಗ ೬ ಗಂಟೆ ಆಗಿತ್ತು. ಅಲ್ಲಿನ ಮಲೆಯಾಳಿ ಅಂಗಡಿಯಲ್ಲಿ ಟೀ ಕುಡಿದು ನಮ್ಮ ಚಾರಣವನ್ನು ಆರಂಭ ಮಾಡಿದ್ವಿ.

ಮುಂಜಾನೆಯ ತಂಪಾದ ವಾತಾವರಣ ಮನಸ್ಸಿಗೆ ಹಿತವಾಗಿತ್ತು.. ತುಂಬಾ ದಿನದ ನಂತರದ ಚಾರಣ ಎಲ್ಲರಲ್ಲೂ ಉತ್ಸಾಹ ತಂದಿತ್ತು. ರೈಲು ಹಳಿಯನ್ನು ಸೇರಲು ಕಾಫಿ ತೋಟದ ನಡುವೆ ನಡೆದು ಹೋದೆವು. ಮುತ್ತು ಪೋಣಿಸಿದ ಹಾಗೆ ಕಾಣುವ ಕಾಫಿ ಹೂವು ನಮ್ಮ ನಡಿಗೆಯನ್ನ ಸ್ವಲ್ಪ ನಿಧಾನವಾಗಿಸಿತ್ತು.

ಸೂರ್ಯೋದಯದ ದೃಶ್ಯ..

ಸೂರ್ಯೋದಯದ ಸೊಬಗನ್ನು ಸವಿಯುತ್ತ, ಹಸಿರಿನ ಬದಿಯಲ್ಲಿ ಸಾಗುವ ರೈಲು ಹಳಿಯಲ್ಲಿ ನಡೆಯುವುದು ಚಾರಣದ ಮೊದಲ ಅನುಭವ. ಸುತ್ತಲೂ ಇರುವುದು ಚಾರ್ಮಾಡಿ ಘಟ್ಟ ಪ್ರದೇಶ. ಅಲ್ಲಿನ ನಡಿಗೆ ಮನಸ್ಸಿಗೆ ಹುರುಪು ತರುತ್ತದೆ. ಸ್ವಲ್ಪ ದೂರ ನಡೆದಾಗ ಸಿಕ್ಕಿದ್ದು ಮೊದಲ ಬ್ರಿಡ್ಜ್. ಸುಮಾರು ೫೦ ಅಡಿ ಆಳ.

ಅದನ್ನು ದಾಟುತ್ತಿದ್ದ ಹಾಗೆ ರೈಲಿನ ಶಬ್ದ ಕೇಳಿಸಿತು. ಹಿಂತಿರುಗಿ ನೋಡಿದರೆ ರೈಲು ಬ್ರಿಡ್ಜ್ ನ ಇನ್ನೊದು ತುದಿಯಲ್ಲಿ ಬರುತ್ತಾ ಇತ್ತು...!! ನಾವು ಸ್ವಲ್ಪ ನಿಧಾನ ಮಾಡಿದ್ರೆ, ಬ್ರಿಡ್ಜ್ ನ ಮಧ್ಯದಲ್ಲಿ ಇರುತ್ತಿದ್ವಿ..ಕೆಳಗೆ ಹಾರಿದರೆ ೫೦ ಅಡಿ ಆಳ...! ಸಕತ್ ತ್ರಿಲ್ಲಿಂಗು..ಅದನ್ನ ಅನುಭವಿಸಿಯೇ ತೀರಬೇಕು...ಇದು ಚಾರಣದ ಇನ್ನೊಂದು ಅನುಭವ.

ಜಲ್ಲಿ ಕಲ್ಲಿನ ಮಧ್ಯೆ ಭಾರದ ಬ್ಯಾಗನ್ನು ಹೊತ್ತು, ನಮ್ಮ ದೇಹ ತೂಕವನ್ನು ಬ್ಯಾಲೆನ್ಸ್ ಮಾಡಿಕೊಂಡು ನಡೆಯುವುದು ಮತ್ತೊಂದು ಅನುಭವ....! ೫ ಕಿ. ಮೀ. ನಡೆಯುವುದರಲ್ಲೇ ನಾವೆಲ್ಲ ಸುಸ್ತು...! ಅಲ್ಲಿಯವರೆಗೆ ಪ್ರಕೃತಿಯ ಮಧ್ಯೆ ನಮ್ಮನ್ನ ನಾವು ಮರೆತು ಬಿಟ್ಟಿದ್ವಿ...ಹೊಟ್ಟೆ ತನ್ನ ಇರುವಿಕೆಯನ್ನ ಹೇಳಿದಾಗ ನಮಗೆ ಸುಸ್ತಾಗಿದ್ದು ಅರಿವಿಗೆ ಬಂದಿದ್ದು...!ನಾವೆಲ್ಲ ಆಗಲೇ ಹಳಿಯನ್ನು ಬಿಟ್ಟು ಅದರ ಪಕ್ಕದಲ್ಲಿ ನಡೆಯಲು ಜಾಗ ಇದೆಯೋ ಅಂತ ಹುಡುಕುತ್ತ ಇದ್ವಿ..ಎಲ್ಲೆಲ್ಲಿ ಸಾಧ್ಯವೋ ಅಲ್ಲೆಲ್ಲ ಹಳಿಯ ಪಕ್ಕದಲ್ಲೇ ನಡೆದಿದ್ದು...೯.೩೦ ಗಂಟೆಯಾ ಹೊತ್ತಿಗೆ ನಮಗೆ ಒಂದು ಹಳ್ಳ ಸಿಕ್ಕಿತು. ನೀರು ಕೂಡ ತುಂಬಾ ಶುದ್ಧವಾಗಿತ್ತು. ಅಲ್ಲಿಯೇ ಸ್ನಾನ ಮಾಡಿ, ಬೆಳಗಿನ ತಿಂಡಿ ತಿಂದ್ವಿ.

ಕಾಡಿನಿಂದ ಹರಿದು ಬರುವ ತಣ್ಣೀರಿನ ಸ್ನಾನದಿಂದ ಮನಸ್ಸು ಮತ್ತು ದೇಹ ಉಲ್ಲಾಸವಾಯಿತು. ಮುಂದಿನ ನಡಿಗೆಯನ್ನ ಉತ್ಸಾಹದಿಂದಲೇ ಮತ್ತೆ ಶುರುಮಾಡಿದ್ವಿ... ಅಲ್ಲಿಂದ ಮುಂದೆ ಇರುವುದೇ ನಡಿಗೆಯ ನಿಜವಾದ ಸಾಹಸ...!! ಸುಡು ಬಿಸಿಲು..! ಕಾದ ಜಲ್ಲಿ ಕಲ್ಲು..! ಒಟ್ಟು ೧೮ ಬ್ರಿಡ್ಜ್, ೧೭ ಸುರಂಗ..

ಹಳ್ಳಿ, ಮುಂಜಾನೆಯ ಇಬ್ಬನಿ ಮತ್ತು ನವಿಲು

2009-02-25T23:03:00.000-08:00

ಶ್ರೀನಾಥ್ ಬಾವ ಮತ್ತು ಮನೀಷಾ ರ ಮದುವೆಗೆ ಅಂಥ ೨ ದಿನ ಆಫೀಸ್ ಗೆ ರಾಜ ಹಾಕಿ ಊರಿಗೆ ಹೋಗಿದ್ದೆ. ಬಾವನ ಮನೆ ಇರುವುದು ಲಿಂಗನಮಕ್ಕಿ ಹತ್ತಿರ ಅರಳಗೋಡು. ಶರಾವತಿ ಅಭಯಾರಣ್ಯದ ಒಂದು ಭಾಗವಾಗಿರುವ ಪುಟ್ಟ ಊರು. ದಟ್ಟಕಾಡು, ವಿವಿಧ ಜಾತಿಯ ದೊಡ್ಡ ದೊಡ್ಡ ಮರಗಳು, ಕಾಡು ಪ್ರಾಣಿಗಳು ಇಲ್ಲಿ ಸಾಮಾನ್ಯ. ಎಷ್ಟೊಂದು ಸಾರಿ ರಸ್ತೆಯಲ್ಲಿ ಕಾಡುಕೋಣಗಳು ಎದುರಾಗುವುದಿದೆ..! ಮನೆಯ ಎದುರು ಅಡಿಕೆ ತೋಟ. ಪಕ್ಕದಲ್ಲಿ ಭತ್ತದ ಗದ್ದೆ..ಭತ್ತದ ಕಾಳುಗಳನ್ನು ತಿನ್ನಲು ಕಾಡು ಕೋಳಿ, ನವಿಲು, ಪಾರಿವಾಳ, ಗುಬ್ಬಿ ಮುಂತಾದ ಹಕ್ಕಿಗಳು ಬರುತ್ತವೆ. ಒಮ್ಮೊಮ್ಮೆ ನವಿಲು ಮನೆಯಂಗಳಕ್ಕೆ ಬರುವುದೂ ಉಂಟು.

ಮದುವೆಯ ಗಲಾಟೆ ಮುಗಿದ ಮರುದಿನ ಮುಂಜಾನೆ ಸ್ವಲ್ಪ ಬೇಗನೆ ಎದ್ದು ಗದ್ದೆಯ ಕಡೆ ನವಿಲು ನೋಡಲು ಹೋಗಿದ್ದೆ. ಮುಂಜಾನೆಯ ಇಬ್ಬನಿ ಸುತ್ತಲಿನ ಪರಿಸರವನ್ನು ಮುತ್ತಿಕೊಂಡಿತ್ತು...ಅಲ್ಲಿ ನನಗೆ ಸೆರೆಸಿಕ್ಕ ಕೆಲವು ಛಾಯಾಚಿತ್ರಗಳು...

ನವಿಲಿನ ಈ ಚಿತ್ರಗಳನ್ನು ಗೆಳೆಯ ವಿನಾಯಕ ಭಟ್ ಸೆರೆಹಿಡಿದಿದ್ದು... ನನಗೆ ತುಂಬಾ ಇಷ್ಟವಾಗಿದ್ದರಿಂದ ಈ ಪೋಸ್ಟಿನಲ್ಲಿ ಸೇರಿಸಿದ್ದೇನೆ.

ಹೊಸ ಬಾಳಿಗೆ ಹೆಜ್ಜೆ ಇಟ್ಟಿರುವ ನವಜೋಡಿಗೆ ಶುಭವಾಗಲಿ.....

ಮಾವನ ಮನೆಯಲ್ಲಿ ಕಳೆದ ದಿನಗಳು...

2009-02-24T01:59:00.000-08:00

ನನ್ನ ಸೋದರ ಮಾವನ ಮನೆ ಹೊಸನಗರದ ಹತ್ತಿರ "ಬಾಣಿಗಾ." ಎಂಬ ಪುಟ್ಟ ಹಳ್ಳಿಯಲ್ಲಿದೆ. ಬಸ್ಸಿಂದ ಇಳಿದು ೨ ಕಿ.ಮೀ. ಮರಳು ಮಿಶ್ರಿತ ಮಣ್ಣು ದಾರಿಯಲ್ಲಿ ನಡೆದರೆ ಸಿಗುವುದು "ಪತಂಜಲಿ". ಅಂದದೂರಿನ ಮನೆಗೆ ಚಂದದ ಹೆಸರು. ಮುಳುಗಡೆಯ ಪ್ರದೇಶ ಆದ್ದರಿಂದ ಮಳೆಗಾಲದಲ್ಲಿ ಮನೆಯ ಅಂಗಳದವರೆಗೂ ಶರಾವತಿ ನದಿಯ ಹಿನ್ನೀರು ಬರುತ್ತದೆ. ಕಾರ್-ಗದ್ದೆ (ಬೇಸಿಗೆಯಲ್ಲಿ ಹೊಳೆಯ ನೀರನ್ನ ಅವಲಂಬಿಸಿ ಬೆಳೆ ಬೆಳೆಯುವದು) ಅನಿವಾರ್ಯ. ಇಲ್ಲಿನ ಪರಿಸರ ನನಗೆ ತುಂಬಾ ಇಷ್ಟ. ಹಸಿರು ಗದ್ದೆ, ತೋಟ, ಹೂವಿನ ಗಿಡಗಳು, ಕಲ್ಲಿನ ದೇವಸ್ಥಾನ, ಕಾಡು ತುಂಬಾ ಸುಂದರ. ಚಿಕ್ಕವರಿದ್ದಾಗ ಹುಡುಗರೆಲ್ಲ ಸೇರಿ ಬೇಸಿಗೆ ರಜ ಕಳೆಯಲು ಬರುತ್ತಿದ್ದೆ ಇಲ್ಲಿಗೆ. ವಿಶಾಲವಾದ ಜಾಗ, ದಟ್ಟವಾದ ಕಾಡು, ಗುಡ್ಡ, ನೀರಲ್ಲಿ ಆಟಕ್ಕೆ ಮುಳುಗಡೆಯ ನೀರು, ಕ್ರಿಕೆಟ್ ಆಟಕ್ಕೆ ಗದ್ದೆ ಬಯಲು ನಮ್ಮಂತ ಪುಂಡು ಹುಡುಗರಿಗೆ ಹೇಳಿ ಮಾಡಿಸಿದ ಜಾಗ. ಮನೆಯ ಫಾರಂ ನಲ್ಲಿ ಮಾವು, ಸಪೋಟ, ಪಪ್ಪಾಳೆ, ಪೇರಳೆ ಹಣ್ಣುಗಳು ಬೇಸಿಗೆಯಲ್ಲಿ ಸಿಗ್ತಾ ಇದ್ವು. ದಣಿವಾದಾಗ ತೋಟದ ಎಳನೀರು. ಇವಲ್ಲದೆ ಬೆಟ್ಟದಲ್ಲಿ ಸಿಗುತಿದ್ದ ನೇರಳೆ, ಹುಳಿಮಾವಿನ ಹಣ್ಣು, ಹಲಸಿನ ಹಣ್ಣು, ಮುಳ್ಳಣ್ಣು, ಗೇರುಹಣ್ಣು ಇನ್ನು ಏನೇನೋ ಹಣ್ಣುಗಳು. ಮನೆಗಿಂತ ಬೆಟ್ಟದಲ್ಲಿ ಇರುತಿದ್ದಿದ್ದೆ ಜಾಸ್ತಿ. ಪ್ರತೀವರ್ಷ ರಜ ಶುರುವಾದ ಕೂಡಲೇ ನಮ್ಮ ಗ್ಯಾಂಗ್ ಇಲ್ಲಿಗೆ ಹಾಜರ್...!! ಹಾಗೆ ಸಣ್ಣ ಪುಟ್ಟ ಕೆಲಸವನ್ನು ನಾವು ಮಾಡ್ತಾ ಇದ್ದೆವು. ಮಾವಿನ ಕಾಯಿ ಕೀಳುವುದು, ಹಲಸಿನ ಹಪ್ಪಳ ಹಚ್ಚುವುದು, ತೋಟಕ್ಕೆ ನೀರು ಹಾಯಿಸುವುದು, ಹೊಳೆಯಲ್ಲಿ ಎಮ್ಮೆ ಮೈ ತೊಳೆಯುವದು....ನಮಗೆಲ್ಲ ಏನೋ ಹುರುಪು...:-)ಅತ್ತೆ ಮಾವ, ನಾವು ಏನೇ ಕಿತಾಪತಿ ಮಾಡಿದರೂ ಯಾವುದಕ್ಕೂ ಬಯ್ಯುತ್ತಿರಲಿಲ್ಲ..ಅದೇ ನಮಗೆ ಪ್ಲಸ್ ಪಾಯಿಂಟ್....! ನಾವು ಬರದಿದ್ದರೆ ಅವರಿಗೆ ಬೇಜಾರು...ಶ್ರಮಜೀವಿಗಳು, ದೇಶಪ್ರೇಮ, ಮನೆಯಲ್ಲಿ ಸ್ವದೇಶಿ ಉತ್ಪನ್ನಗಳ ಬಳಕೆ ಜಾಸ್ತಿ. ಬೆಂಗಳೂರು ಸೇರಿದಾಗಿಂದ ಮಾವನ ಮನೆಗೆ ಹೋಗುತಿದ್ದಿದ್ದು ಅಪರೂಪ, ಹೋದರೆ ಕೆಲವೇ ತಾಸುಗಳ ಮಟ್ಟಿಗೆ ಅಥವಾ ಒಂದು ದಿನದ ಮಟ್ಟಿಗೆ. ಹುಡುಗರು ಎಲ್ಲ ಸೇರಿಕೊಂಡು ಹೋಗಿ ತುಂಬಾ ವರ್ಷಗಳೇ ಆಗಿದೆ.

ಕಳೆದ ಅಕ್ಟೋಬರ್ ನಲ್ಲಿ ಬಾವನ ಮದ್ವೆ ಇತ್ತು. ಆಗ ನಮ್ಮ ಹಳೆಯ ಗ್ಯಾಂಗ್ ಎಲ್ಲ ಒಂದೆಡೆ ಸೇರಿಕೊಂಡಿದ್ವಿ. ಎಲ್ಲರೂ ಬಾಣಿಗಕ್ಕೆ ಹೋಗಿ, ಮತ್ತೆ ಹಳೆಯ ನೆನಪುಗಳ ಮಧ್ಯೆ, ಚಿಕ್ಕ ಹುಡುಗರಾಗಿ ಸೇರಿ ಆಟ ಆಡಿ, ತಿಂದುಂಡು, ತಿರುಗಿ, ೨ ದಿನಗಳನ್ನು ನಮ್ಮಿಷ್ಟದ ಹಾಗೆ ಕಳೆದ್ವಿ... ನೆನಪುಗಳು ಈಗಲೂ ಅತೀ ಸುಂದರ...!

ಅಲ್ಲಿಗೆ ಹೋದಾಗ ಮೊದಲು ಮಾಡಿದ ಕೆಲಸ ಅಂದ್ರೆ, ಅಟ್ಟಕ್ಕೆ ಹೋಗಿ ಏನೇನು ಹಣ್ಣು ಇದೆ ಅಂಥ ನೋಡಿದ್ದು. ಬಾಳೆಹಣ್ಣು, ಚಿಕ್ಕು ಇತ್ತು. ಹಾಗೆ ಎರಡೆರಡು ಹಣ್ಣನ್ನು ಹೊಟ್ಟೆಗಿಳಿಸಿದ್ವಿ. ಅತ್ತೆ "ಪಪ್ಪಾಳೆ ಹಣ್ಣು ಇದ್ದು ಹುಡುಗ್ರ" ಅಂದ್ರು. ಹುಂ ಸರಿ, ಅದೂ ಸ್ವಾಹ ಆಯಿತು. ತೋಟವನ್ನು ಒಂದು ರೌಂಡು ಹಾಕಿ, ಬೆಟ್ಟದ ಕಡೆ ಹೊರಟೆವು. ಅಲ್ಲಿ ಕೂಗಾಡಿ, ಜಿಗಿದಾಡಿ, ಮರ ಹತ್ತಿ, ನಮ್ಮ ಚಪಲ ತೀರಿಸಿಕೊಂಡೆವು..!ಮನೆಗೆ ಬಂದಾಗ ಅಕ್ಕ ಎಳೆ ಸೌತೆಕಾಯಿ ಉಪ್ಪು, ಸೂಜಿಮೆಣಸು, ವಾಟೆಹುಳಿ, ಕೊಬ್ಬರಿಎಣ್ಣೆ ರೆಡಿ ಮಾಡಿ ಇಟ್ಟಿದ್ದಳು... ೪ ಸೌತೆಕಾಯಿ ಖಾಲಿ ಆಗಿದ್ದೆ ಗೊತ್ತಾಗಲಿಲ್ಲ....!! ಒಳ್ಳೆ ಕಾಂಬಿನೆಷನ್ನು ಅದು..!!

ಅತ್ತೆಯ ಕೈತೋಟದ ಕುಸುಮಗಳು....

ಬಿಸಿಲು ಏರುತಿದ್ದ ಹಾಗೆ ಸ್ನಾನಕ್ಕೆ ಹಿನ್ನೀರಿನ ಕಡೆ ಹೊರಟೆವು. ಊಟಕ್ಕೆ ಕರೆಯುವ ವರೆಗೆ ಹೊಳೆಯಲ್ಲಿ ಈಜಾಡಿ, ಸ್ನಾನ ಮಾಡಿದ್ವಿ. ರಂಗ ಗದ್ದೆಯ ಏಡಿ ಒಂದನ್ನ ಹಿಡಿದು ಫೋಟೋ ತೆಗೆದಿದ್ದು. ಕೆಂಪಕ್ಕಿ ಅನ್ನ, ಗೊಜ್ಜು, ತಂಬುಳಿ, ನೀರ್ಗೊಜ್ಜು ಮಾಡಿದ್ರು ಅತ್ತೆ. ಜೊತೆಗೆ ಹಲಸಿನ ಕಾಯಿ ಹಪ್ಪಳ, ಸಂಡಿಗೆ...ಹೊಟ್ಟೆ ಬಿರಿಯುವಂತೆ ಊಟ ಮಾಡಿ ೨ ತಾಸು ಗಡದ್ದು ನಿದ್ದೆ ಮಾಡಿದ್ವಿ.ಸಂಜೆ ಜೋರಾಗಿಯೇ ಗುಡುಗು ಮಳೆ ಬಂದಿತ್ತು...ಹಸಿರಿನ ವಾತಾವರಣಕ್ಕೆ ಇನ್ನಷ್ಟು ಸೊಬಗು ಬಂದಿತ್ತು...ಬಿಸಿಯಾದ ಬೆಲ್ಲದ ಕಾಫಿ ಕುಡಿದು, ಹುರಿದ ಶೇಂಗ ತಿಂದ್ವಿ...ನಿಜ, ಏನಾದರು ಒಂದು ತಿಂತಾನೆ ಇರ್ತಿದ್ವಿ...!!ಮಳೆ ನಿಂತ ಮೇಲೆ ಅಲ್ಲಿಂದ ಸುಮಾರು ೨೦ ಕಿ.ಮೀ ಇದ್ದ "ರಾಮಚಂದ್ರಾಪುರ" ಮಠಕ್ಕೆ ಹೋಗಿದ್ವಿ. ಅಲ್ಲಿ ಕುಡಿದ ಕಷಾಯ ತುಂಬಾ ರುಚಿ ಆಗಿತ್ತು. ಅಲ್ಲಿನ ಗೋಶಾಲೆ ಒಮ್ಮೆ ನೋಡಲೇ ಬೇಕಾದ ಸ್ಥಳ. ಎಷ್ಟೊಂದು ಬಗೆಯ ದೇಶೀ ತಳಿಯ ಹಸುಗಳು, ಮಠದ ಆಶ್ರಯದಲ್ಲಿ ನೆಮ್ಮದಿಯ ಬದುಕನ್ನು ಕಂಡಿವೆ. ದೇಶೀ ಗೋವಿನ ತಳಿಗಳ ಸಂಪೂರ್ಣ ಮಾಹಿತಿ ಇಲ್ಲಿ ಲಭ್ಯ. ಮುದ್ದು ಪುಟಾಣಿ ಕರುಗಳ ಜಿಗಿದಾಟ ಮನಸ್ಸಿಗೆ ಹಿತ.ಸಂಜೆಯ ನೀಲಾಕಾಶದ ಸೂರ್ಯಾಸ್ತ ನೋಡಿ ಅಲ್ಲಿಂದ ಮನೆಗೆ ಮರಳಿದೆವು.ಬೆಂಗಳೂರಿನ ಯಾಂತ್ರಿಕ ಜೀವನ ನಡೆದಿದೆ...ಮತ್ತೆ ಇದೇ ರೀತಿ ಎಲ್ಲರೂ ಸೇರುವುದು, ಬಾಣಿಗಕ್ಕೆ ಹೋಗುವುದು ಯಾವಾಗಲೋ..? ಜೀವನ ಎಲ್ಲ ಮಾವನ ಮನೆಯಲ್ಲಿಯೇ ಇರಬೇಕೆಂಬ ಬಯಕೆ....ಮಾವನಿಗೆ ಹೆಣ್ಣು ಮಕ್ಕಳಿಲ್ಲ...!!

ಭೀಮೇಶ್ವರಿ ಫಿಶಿಂಗ್ ಕ್ಯಾಂಪ್

2009-02-11T03:56:00.000-08:00

೨೧ ಸೆಪ್ಟೆಂಬರ್ ೨೦೦೮ ಭಾನುವಾರ, ಇಸ್ರೋ ಲೇಔಟ್ ಗೆ ಬಂದಾಗ ಬೆಳಿಗ್ಗೆ ೬ ಗಂಟೆ. ಅದಾಗಲೇ ಶಿಲ್ಪಾ ೨-೩ ಬಾರಿ ನನಗೆ ಫೋನ್ ಮಾಡಿದ್ದಳು. ನಾನು ಸರಿಯಾದ ಸಮಯಕ್ಕೆ ಅವಳ ಮನೆಗೆ ಬಂದೆ. ನವೀನ ಆಗಲೇ ರೆಡಿ ಆಗಿದ್ದ. ಮಾಮೂಲಾಗಿ ಬೆಳಿಗ್ಗೆ ಅಷ್ಟು ಬೇಗನೆ ಎದ್ದಿದ್ದು ಒಂದು ರೆಕಾರ್ಡ್. ನಾನು, ನವೀನ, ಶಿಲ್ಪಾ, ರೂಪ ನನ್ನ ಕಾರ್ ನಲ್ಲಿ ಇಸ್ರೋ ಲೇಔಟ್ ಬಿಟ್ಟಾಗ ೬.೩೦ ಆಗಿತ್ತು. ನೈಸ್ ರೋಡ್ ಮುಂಜಾನೆಯ ಇಬ್ಬನಿ ಹೊದ್ದು ಮಲಗಿತ್ತು. ನೈಸ್ ರೋಡ್ ನಲ್ಲಿ ಒಂದೆರಡು ಮಾರ್ನಿಂಗ್ ಫೋಟೋ ತೆಗೆದು ಮೈಸೂರ್ ರೋಡ್ ನತ್ತ ನಮ್ಮ ಪ್ರಯಾಣ ಸಾಗಿತು.ಹೊಟ್ಟೆ ಚೂರು ಗುಟ್ಟತೊಡಗಿದಾಗ ಸರಿಯಾಗಿ "ಕಾಮತ್ ಉಪಹಾರ್" ಗೆ ಬಂದಿದ್ದೆವು. ಇಡ್ಲಿ-ವಡ, ಕೇಸರಿಬಾತ್ ತಿಂದು ಕಾಫಿ ಕುಡಿದಾಗ ಸ್ವಲ್ಪ ಸಮಾಧಾನ ಆಯಿತು. ಚಳಿಗಾಲದಲ್ಲಿ ಬೆಳಿಗ್ಗೆ ಒಂದು ಲಾಂಗ್ ಡ್ರೈವ್ ಮಾಡಿ, ಇಬ್ಬನಿ ಚಳಿಯಲ್ಲಿ, ಬಿಸ್ಸಿ ಬಿಸ್ಸಿ ಕಾಫಿ ಕುಡಿಯುವುದೇ ಆನಂದ...!! ನನಗೆ ಅನ್ನಿಸಿದ್ದು "ಜೀವನ ಎಷ್ಟು ಸುಂದರ...!!"ಅಲ್ಲಿಂದ ಹೊರಟು ಕನಕಪುರ ಮಾರ್ಗ ಹಿಡಿದೆವು. ಕಾರು ಸ್ವಲ್ಪ ನಿಧಾನ ಹೋಗುತ್ತಾ ಇರೋ ಹಾಗೆ ಅನ್ನಿಸ್ತ ಇತ್ತು. ಬಹುಶ: ರುಚಿಯಾದ ತಿಂಡಿ ತಿಂದು ೪ ಜನರ ಭಾರ ಜಾಸ್ತಿ ಆಗಿತ್ತೇನೋ..!!ಕನಕಪುರ ದಿಂದ ಮಳವಳ್ಳಿ ತಲುಪಿದಾಗಲೇ ನಮಗೆ ಗೊತ್ತಾಗಿದ್ದು ನಾವು ತಪ್ಪು ಮಾರ್ಗದಲ್ಲಿ ಬಂದಿದ್ದೇವೆ ಎಂದು. ಅಲ್ಲಿಗೆ ಸುಮಾರು ೧೧೦ ಕಿ.ಮೀ. ಬಂದಾಗಿತ್ತು. ರೆಸಾರ್ಟ್ ನ ಚೆಕ್-ಇನ್ ವೇಳೆ ೧೦ ಗಂಟೆ. ಆಗಲೇ ೯.೩೦ ಆಗಿತ್ತು. ಕಾವೇರಿ ಫಿಶಿಂಗ್ ಕ್ಯಾಂಪ್ ಇರುವುದು ೨ ಕಡೆ. ಒಂದು " ಗಾಲಿಬೋರೆ ಫಿಶಿಂಗ್ ಕ್ಯಾಂಪ್", ಮಳವಳ್ಳಿ ಹತ್ತಿರ, ಮೇಕೆದಾಟು ಬಳಿ. ನಾವು ಹೋಗಬೇಕಿದ್ದದ್ದು "ಭೀಮೇಶ್ವರಿ ಫಿಶಿಂಗ್ ಕ್ಯಾಂಪ್", ಮುತ್ತತ್ತಿ ಹತ್ತಿರ. ಅಲ್ಲಿನ ಒಬ್ಬ ದನಕಾಯುವ ಹುಡುಗನ ಹತ್ತಿರ ಸರಿಯಾದ ದಾರಿ ಕೇಳಿ ಸಾತನೂರು ಮಾರ್ಗವಾಗಿ ಮುತ್ತತ್ತಿ ಗೆ ಹೊರಟೆವು.ಆಗಲೇ ಮನೆಯಿಂದ ಹೊರಟು ೫ ಗಂಟೆ ಆಗಿತ್ತು. ಎಲ್ಲರ ಮುಖದಲ್ಲೂ ಆತಂಕ, ದುಗುಡ, ಏನೋ ಸಂಕಟ...!ಭೀಮೇಶ್ವರಿ ಇನ್ನೂ ೧ ತಾಸಿನ ದಾರಿ....!! ವಿಪರೀತ "ಜಲಬಾಧೆ" .....!! ಎಲ್ಲೂ ಮುಕ್ತವಾಗಿ ಹೋಗುವ ಹಾಗು ಇರಲಿಲ್ಲ...!! ಪ್ರತೀ ನಿಮಿಷವೂ ಸಂಕಟ ಹೆಚ್ಚೆಚ್ಚು ಆಗುತ್ತಾ ಇತ್ತು...!! ಅಲ್ಲಿನ ರಸ್ತೆ ಹೊಂಡ-ಗುಂಡಿ, ತುಂಬಾ ಸ್ಪೀಡ್ ಆಗಿ ಕಾರು ಓಡಿಸುವ ಹಾಗೂ ಇಲ್ಲ...ಆಗಾಗ ದಾರಿಗಡ್ಡ ಸಿಗುತ್ತಿದ್ದ ದನಗಳ ಗುಂಪು...ನನ್ನ ಸಂಕಟ ಹೇಳ ತೀರದು...ನನಗೆ ಅನ್ನಿಸಿದ್ದು "ಜೀವನ ಎಷ್ಟೊಂದು ಕಷ್ಟ...!!!"
ಭೀಮೇಶ್ವರಿ ತಲುಪಿದಾಗ ೧೧ ಗಂಟೆ ಆಗಿತ್ತು. "ಸ್ವಾಗತ-ಪಾನೀಯ" (Welcome-Drink) ಲಿಂಬೆ ಹಣ್ಣಿನ ಶರಬತ್ತು ಕುಡಿದು ಸ್ವಲ್ಪ ದಣಿವಾರಿಸಿಕೊಂಡೆವು. ಅಲ್ಲಿನ ವಿಶ್ರಾಂತಿ ಗೃಹ ಚಿತ್ರ...ಅಲ್ಲಿ ಟ್ರೆಕ್ಕಿಂಗ್ ಮಾಡಲು ಮನಸ್ಸಾಗದೆ, ಹಾಗೆ ಕಾವೇರಿ ದಡದಲ್ಲಿ ಸ್ವಲ್ಪ ಹೊತ್ತು ನೀರಲ್ಲಿ ಆಟ ಆಡಿದೆವು. ಅಲ್ಲಿನ ಸುಂದರ ಪರಿಸರ, ದಟ್ಟವಾದ ಕಾಡು, ರಭಸವಾಗಿ ಹರಿಯುವ ಕಾವೇರಿ ನಮಗೆ ಅತ್ಯಂತ ಇಷ್ಟವಾಯಿತು. ಮಳೆಗಾಲ ಆಗ ತಾನೆ ಕಳೆದಿದ್ದರಿಂದ ನದಿಯಲ್ಲಿ ನೀರು ತುಂಬಿತ್ತು.
"ರಿವರ್ ರಾಫ್ಟಿಂಗ್" ಇಲ್ಲಿನ ವಿಶೇಷ, ತುಂಬಿ ಹರಿಯುವ ನದಿಯಲ್ಲಿ, ತೇಲುತ್ತಾ, ರಭಸವಾದ ಇಳಿಜಾರಿನಲ್ಲಿ ಬೀಳುತ್ತಾ, ಕೊರಕಲು ನಡುವೆ ಬಿಳಿ ನೋರೆಯಂತಿದ್ದ ನೀರನ್ನು ಹಿಂದಿಕ್ಕುತ್ತ ರಾಫ್ಟಿಂಗ್ ಮಾಡುವುದು ಅತ್ಯಂತ ರೋಮಾಂಚನ....! ಸಿಂಪ್ಲಿ ಸೂಪರ್..! ನೀರಿನ ಮಧ್ಯೆ ಅಪಾಯಕಾರಿ ಸುಳಿಯ ಹತ್ತಿರ ಲೈಫ್- ಜಾಕೆಟ್ ಹಾಕ್ಕೊಂಡು ತುಂಬ ಸಮಯ ಈಜಿ ಮಜ ಮಾಡಿದ್ವಿ. ಅಂತು ಸಕತ್ ಥ್ರಿಲ್ಲಿಂಗು..!! ಸುಮಾರು ೧೫ ಕಿ.ಮೀ. ನದಿಯಲ್ಲಿ ರಾಫ್ಟಿಂಗ್ ಹೋಗಿದ್ವಿ...ಊಟ ಆದಮೇಲೆ ಸ್ವಲ್ಪ ಹೊತ್ತು ಜೋಕಾಲಿ ಮೇಲೆ ಮಲಗಿದ್ದು ಒಳ್ಳೆ ನಿದ್ದೆ ಬಂತು...ತಣ್ಣನೆಯ ಗಾಳಿ...ನಿಶ್ಯಬ್ದ ವಾತಾವರಣ...ಮರದ ನೆರಳು.
ಸಂಜೆ ತಿಳಿಯಾದ ನೀರಿನಲ್ಲಿ ತೆಪ್ಪ ವಿಹಾರ ಇತ್ತು. ತೆಪ್ಪದಲ್ಲಿ ಸುಮಾರು ೧೦ ಕಿ.ಮೀ. ನದಿಯಲ್ಲಿ ಹೋಗಿದ್ದೆವು. ತೆಪ್ಪ ನಡೆಸುತ್ತಿದ್ದವನು ತುಂಬ ಚಾಕಚಕ್ಯತೆ ಇಂದ ತೆಪ್ಪ ನಡೆಸುತಿದ್ದ...ಆಮೇಲೆ ನಮಗೆ ತಿಳಿದಿದ್ದು ಅಲ್ಲಿ ಭಾರಿ ಸುಳಿ ಇರೋ ವಿಷ್ಯ...ಮೊದಲೇ ಹೇಳಿದ್ರೆ ನಾವು ಹೆದರಿಕೊಳ್ತಾ ಇದ್ದ್ವಿ ಅಂಥ ಹೇಳಿರಲಿಲ್ಲ.ಸ್ಟ್ರಾಂಗ್ ಟೀ ಕುಡಿದಾದ ಮೇಲೆ, ನಾವು ಮೀನು ಹಿಡಿಯಲು ಹೋದ್ವಿ. "ಮಹಶೀರ್" ಮೀನು ಇಲ್ಲಿನ ವಿಶೇಷ..ದೊಡ್ಡ ಗಾತ್ರದ ಮೀನನ್ನು ಹಿಡಿದು ತೂಕ ಮಾಡಿ ಮತ್ತೆ ನೀರಿಗೆ ಬಿಡುವುದು ಇಲ್ಲಿನ ಪ್ರಮುಖ ಆಕರ್ಷಣೆ. ನನಗೆ ಒಂದು ಸಣ್ಣ ಮೀನು ಸಿಕ್ಕಿತ್ತು...ತೂಕ ಮಾಡಲು ಹೋಗಲಿಲ್ಲ...! ಸುಂದರ ದಿನವನ್ನು ಕಳೆದು ಸವಿ ನೆನಪುಗಳೊಂದಿಗೆ ಅಲ್ಲಿಂದ ಹೊರಟೆವು. ಹಲಗೂರು-ಚನ್ನಪಟ್ಟಣ ಬಳಸಿ ಸೀದಾ ಬೆಂಗಳೂರಿಗೆ ವಾಪಾಸು ಬಂದಾಗ ರಾತ್ರಿ ೮ ಗಂಟೆ ಆಗಿತ್ತು.
ಭೀಮೇಶ್ವರಿ ಫಿಶಿಂಗ್ ಕ್ಯಾಂಪ್ ಬಗ್ಗೆ ಹೆಚ್ಚಿನ ಮಾಹಿತಿಗಾಗಿ ಕೆಳಗಿನ ಲಿಂಕ್ ನೋಡಿ
http://www.karnataka.com/tourism/bangalore/bheemeshwari.html

ಒಂದು ಸುಂದರ ಸಂಜೆ - ಮಂಚನಬೆಲೆ ಡ್ಯಾಮ್ / ಜಲಾಶಯ.

2009-02-05T02:54:00.000-08:00

೦೭ ಸೆಪ್ಟೆಂಬರ್ ೨೦೦೮, ಭಾನುವಾರ ಬೆಳಿಗ್ಗೆ ಎದ್ದಾಗ ೯ ಗಂಟೆ. ಹೊಟ್ಟೆ ತಾಳ ಹಾಕಲು ಶುರುವಾಗಿದ್ದೆ ಎಚ್ಚರ ಆಗಲು ಕಾರಣ. ಮೊಬೈಲ್ ಆಗಲೇ ಒಂದೆರಡು ಸಲ ಶಬ್ದ ಮಾಡಿ ಮತ್ತೆ ನಿದ್ದೆಗೆ ಜಾರಿತ್ತು....!!ಗೆಳತಿಯರ ಮುಂಜಾನೆಯ ಶುಭ ಹಾರೈಕೆಯ ಸಂದೇಶಗಳು....!!

ನಿತ್ಯಕರ್ಮ ಮುಗಿಸಿ, ಸ್ವಲ್ಪ ಲೈಟ್ ಆಗಿ ತಿಂಡಿ ತಿಂದು ಬೆಂಗಳೂರ್ ಟೈಮ್ಸ್ ಓದುತ್ತ ಕುಳಿತಿದ್ದೆ. ನಂಗೆ ಇಷ್ಟವಾದ ಹರಿಹರನ್ ಗಝಲ್ ಮ್ಯೂಸಿಕ್ ಸಿಸ್ಟಮ್ ಇಂದ ಕೇಳಿಬರ್ತಿತ್ತು. ಅಂದು ಯಾವುದೇ ಪರ್ಸನಲ್ ಕೆಲಸ ಇರಲಿಲ್ಲ. ಹೊರಗಡೆ ಮೋಡ ಕವಿದ ವಾತಾವರಣ. ಸಣ್ಣಗೆ ತುಂತುರು ಮಳೆ ಕೂಡ ಬಂದು ಹೋಗಿತ್ತು. ಹಾಗೆ ಸುಮ್ಮನೆ ಒಂದು ರೌಂಡು ಲಾಂಗ್ ಡ್ರೈವ್ ಹೋಗಲು ಮನಸ್ಸಾಯಿತು. "ಸ್ವೀಟಿ" ಯನ್ನ ಮನೆಗೆ ತಂದು ಒಂದು ವಾರವಷ್ಟೇ ಆಗಿತ್ತು. ಮಂಚನಬೆಲೆ ಡ್ಯಾಮ್ ಬಗ್ಗೆ ನಾವೆಲ್ಲ ಕೇಳಿದ್ದೆವು, ಅಲ್ಲಿಗೇ ಹೋಗುವುದೆಂದು ತೀರ್ಮಾನಿಸಿ, ಮಧ್ಯಾನ್ಹ ೧೧ ಗಂಟೆಗೆ, ನಾನು, ಬನವಾಸಿ, ಅಭಿ, ದೂದ್, ಸ್ವೀಟಿ ಮೈಸೂರ್ ರೋಡ್ ಕಡೆಗೆ ಹೊರಟೇ ಬಿಟ್ಟೆವು. ಸ್ವೀಟಿ ಗೆ ಇದು ಮೊದಲ ಟ್ರಿಪ್ಪು. ಅರವಿಂದ ಅಮೇರಿಕಾ ಪ್ರವಾಸದಲ್ಲಿದ್ದ.

ಮೈಸೂರ್ ರೋಡ್ ನಲ್ಲಿ ಟ್ರಾಫಿಕ್ ಸ್ವಲ್ಪ ಕಡಿಮೆಯೇ ಇತ್ತು. ಕಪ್ಪು ಬಣ್ಣದ ಕಾರ್ಮೋಡಗಳು ಎಲ್ಲ ಕಡೆ ತುಂಬಿತ್ತು. ಬೆಂಗಳೂರಿಂದ ಸುಮಾರು ೫೦ ಕಿ. ಮೀ. ದೂರದಲ್ಲಿರುವ " ಕಾಮತ್ ಉಪಚಾರ್" ನಲ್ಲಿ ಮಧ್ಯಾನ್ಹದ ಊಟ ಮಾಡಿದ್ವಿ. ನವಿರಾದ ಜೋಳದ ರೊಟ್ಟಿ, ಎಣಗಾಯಿ ಪಲ್ಲ್ಯ, ಕಾಳು ಪಲ್ಯ, ಕೆಂಪ್ ಚಟ್ನಿ, ಗಟ್ಟಿ ಮೊಸರು, ಗುರೆಳ್ಳು, ಶೇಂಗ ಚಟ್ನಿ ಇವಿಷ್ಟು ಊಟದ ಮೆನು. ಭರ್ಜರಿ ಊಟ ಮಾಡಿ ರಾಮನಗರ ದಿಂದ ಎಡಕ್ಕೆ ತಿರುಗಿ ಮಂಚನಬೆಲೆ ಕಡೆಗೆ ಹೊರಟೆವು.

ಮೋಡ ಸ್ವಲ್ಪ ತಿಳಿಯಾಗಿತ್ತು. ರಸ್ತೆಯ ಅಕ್ಕ ಪಕ್ಕ ಹಸಿರು ಅಡಿಕೆ ಮತ್ತು ತೆಂಗಿನ ತೋಟ ಇದೆ. ಮಳೆಗಾಲ ಕಳೆದು ಹಸಿರು ಭತ್ತದ ಗದ್ದೆಗಳು ನಿಸರ್ಗಕ್ಕೆ ಮತ್ತಷ್ಟು ಸೊಬಗು ತಂದಿತ್ತು. ನುಣುಪಾದ ರಸ್ತೆ ಡ್ರೈವಿಂಗ್ ಗೆ ಸಕತ್ ಖುಷಿ ಕೊಡ್ತಾ ಇತ್ತು.

ಮಂಚನಬೆಲೆ ಡ್ಯಾಮ್ ಬಗ್ಗೆ...
ಬೆಂಗಳೂರಿಂದ ಸುಮಾರು ೪೦ ಕಿ. ಮೀ. ದೂರದಲ್ಲಿ , ರಾಮನಗರ ಜಿಲ್ಲೆಯಲ್ಲಿರುವ ಈ ಜಲಾಶಯ ಮಾಗಡಿ ತಾಲೂಕಿಗೆ ನೀರಾವರಿಗೋಸ್ಕರ ಕಟ್ಟಲಾಗಿದೆ. ಅರ್ಕಾವತಿ ನದಿಗೆ ಅಡ್ಡಲಾಗಿ ಕಟ್ಟಲಾದ ಈ ಜಲಾಶಯದ ಸುತ್ತಮುತ್ತ ವಿವಿಧ ಬಗೆಯ ಹಕ್ಕಿಗಳು ಕಾಣಿಸುತ್ತವೆ. ಡ್ಯಾಮ್ ನ ಮೇಲೆ ಹೋಗುವುದನ್ನು ನಿಷೇಧಿಸಲಾಗಿದೆ. ಈ ಸುಂದರ ಪರಿಸರ ವೀಕೆಂಡ್ ಕಳೆಯಲು ಸೂಕ್ತವಾಗಿದೆ. ಜೋಡಿ ಹಕ್ಕಿಗಳು ಕಾಲಕಳೆಯಲು ಇಲ್ಲಿಗೆ ಬರುವುದು ಸಾಮಾನ್ಯ.

ಸಂಜೆಯಾಗುತ್ತಾ ಇದ್ದರಿಂದ ನಾವ್ಯಾರೂ ನೀರಿಗೆ ಇಳಿಯಲಿಲ್ಲ. ದಡದಲ್ಲಿ ಕೂತು ಅಲ್ಲಿನ ಸೌಂದರ್ಯವನ್ನು ನೋಡಿದೆವು. ದೂದ್ ಮತ್ತು ಅಭಿ ಅಲ್ಲೇ ಪಕ್ಕದಲ್ಲಿದ್ದ ಕಲ್ಲಿನ ಬೆಟ್ಟ ಹತ್ತಿ, ಸಣ್ಣ ಟ್ರೆಕ್ಕಿಂಗ್ ಮಾಡಿದರು. ಶಾಂತವಾದ ಪರಿಸರ ಮನಸ್ಸಿಗೆ ಹಿತವಾಗಿತ್ತು. ಅಲ್ಲಿಂದ ಹೊರಟು ಮತ್ತೆ ರಾಮನಗರಕ್ಕೆ ಬಂದು ಟೀ ಕುಡಿದು ಬೆಂಗಳೂರಿನತ್ತ ಗೂಡು ಸೇರಲು ಹೊರಟೆವು.
"ಸ್ವೀಟಿ" ಪೋಸು

ಹೊಸ ವರ್ಷದ ಆಚರಣೆ...೨೦೦೯.

2009-01-29T02:58:00.000-08:00

ಪ್ರತೀ ವರ್ಷದ ಕೊನೆಯ ದಿನ ಬೆಂದಕಾಳುರನ್ನು ಬಿಟ್ಟು, ಯಾವುದಾದರೊಂದು ಸ್ಥಳಕ್ಕೆ ಪ್ರವಾಸ ಕೈಗೊಂಡು ಹೊಸ ವರ್ಷವನ್ನು ಸ್ವಾಗತಿಸುವುದು ನಮ್ಮ ಅಭ್ಯಾಸವಾಗಿತ್ತು.

ಆದ್ರೆ ಈ ಸಲ ಡಿಸೆಂಬರ್ ೩೧ ಬುಧವಾರ ಬಂದಿದ್ದು, ಗುರುವಾರ ಆಫೀಸ್ ಗೆ ರಜ ಇಲ್ಲದ ಕಾರಣ ನಮ್ಮ ಪ್ರವಾಸ ಕ್ಯಾನ್ಸಲ್ ಆಗಿತ್ತು.ಬುಧವಾರ ಸಂಜೆಯತನಕ ಎಲ್ಲರೂ ಅವರವರ ಮನೆಯಲ್ಲಿ ಹೊಸ ವರ್ಷದ ಆಚರಣೆ ಅಂಥ ತೀರ್ಮಾನ ಮಾಡಿದ್ದೆವು. ಡಿಂಗನಿಗೆ ಆಫೀಸ್ನಲ್ಲಿ ನೈಟ್ ಶಿಫ್ಟ್ ಬೇರೆ...!!! ಹೋಗಲೇ ಬೇಕೆಂದು ದೂದ್ ಆಫೀಸ್ ಗೆ ರಜ ಹಾಕಿದ್ದ..!!! ನಾವೆಲ್ಲ ಬರೋಲ್ಲ ಅಂಥ ಹೇಳಿದಾಗ ಸಿಕ್ಕಾಪಟ್ಟೆ ಕೋಪ ಬಂದಿತ್ತು ಅವನಿಗೆ....!!! No Much happening this year end.. :-(

ಸಂಜೆ ನಾನು ಮನೆಗೆ ವಾಪಾಸ್ ಹೋಗ್ತಾಯಿರೋವಾಗ ಡಿಂಗ ಫೋನ್ ಮಾಡಿದ...!! ಇವತ್ತು ಆಫೀಸ್ ಇಂದ ಬೇಗ ಬರ್ತಾ ಇದೀನಿ, ನ್ಯೂ ಇಯರ್ ಪಾರ್ಟಿ ಗೆ ರೆಡಿ ಮಾಡು ಅಂದ.

Happening begins...!! :-)

ಸೊ ನಾನು ಗಡಿಬಿಡಿಯಲ್ಲಿ ಅರವಿಂದನಿಗೆ, ದೂದ್ಗೆ ಫೋನ್ ಮಾಡಿದೆ...ಸೀದಾ ನಮ್ಮ ಮನೆಗೆ ಬನ್ನಿ ಅಂಥ...! ದೂದ್ ಮೊದಲು ನಂಬಲಿಲ್ಲ, ಕೊನೆಗೆ ಅವನೇ ಮೊದಲು ಬಂದಿದ್ದು...!
ನಾನು ಸ್ವಲ್ಪ ತರಕಾರಿ ತಗೊಂಡು ಮನೆಗೆ ಹೋದೆ....! ಅರವಿಂದ + ಅರವಿಂದ ( ಡಿಂಗ ನ ಕಸಿನ್ ಬ್ರದರ್)(ಅಭಿ - ಅವನ ಶಾರ್ಟ್ ನೇಮು) ಸರಿಯಾದ ಸಮಯಕ್ಕೆ ಮನೆಗೆ ಬಂದ್ರು..ಎಲ್ಲ ಸೇರಿ ಪ್ಲಾನ್ ರೆಡಿ ಮಾಡಿದ್ವಿ.ನಾನು ಮತ್ತೆ ದೂದ್ ಹೋಗಿ ಕೇಕ್ ತಂದ್ವಿ...ಅವತ್ತಿನ ದಿನ ಎಲ್ಲ ಬೇಕರಿ ಅಂಗಡಿ ಫುಲ್ ರಷ್ಯು..!!ಅಭಿ ಒಂದಷ್ಟು ದಿಢೀರ್ ತಿಂಡಿ ರೆಡಿ ಮಾಡಿದ...! ನಾನು ಚಿತ್ರಾನ್ನ ಕಲಸಿದೆ...( ೮ ವರ್ಷದ ಅನುಭವ ಇದೆ)

ಡಿಂಗ ಮನೆಗೆ ಬಂದಾಗ ೧೦ ಗಂಟೆ ಆಗಿತ್ತು. ಎಲ್ಲರೂ ಸೇರಿ ಪಾನೀಯ ಸೇವಿಸಿ, ತಿಂಡಿ ತಿಂದು ಮೊದಲ ಹಂತದ ಕೊನೆಗೆ ಬಂದಿದ್ದೆವು...

ಸರಿಯಾಗಿ ೧೨ ಗಂಟೆಗೆ ಕೇಕ್ ಕಟ್ ಮಾಡಿ, ಎಲ್ಲರಿಗೂ ವಿಶ್ ಮಾಡಿದ್ವಿ...!! ಅರವಿಂದ ಸ್ವಲ್ಪ ಜೋಶ್ ನಲ್ಲೆ ಇದ್ದ...ಇದು ಅವನ ಕೊನೆಯ ಅವಿವಾಹಿತ ಹೊಸ ವರ್ಷದ ಆಚರಣೆ..!! ಹೊಟ್ಟೆ ತುಂಬಾ ಊಟ ಮಾಡಿ ಮಲಗಿದಾಗ ಗಂಟೆ ೩... !! ಇರೋದ್ರಲ್ಲೇ ಸಕತ್ ಮಜ ಇತ್ತು..!

೧ ನೆ ತಾರೀಕು ಆಫೀಸ್ ಗೆ ಬರಲೇ ಬೇಕಿತ್ತು...., ಅರವಿಂದ ಅವತ್ತಿಂದ ಇವತ್ತಿನ ತನಕ ವಟಗುಟ್ಟುತ್ತಲೇ ಇದ್ದಾನೆ... " ಮಕ್ಕಳ್ರಾ, ನ್ಯೂ ಇಯರ್ ದಿನ ಎಲ್ಲೂ ಹೋಗಿಲ್ಲ, ಸೊ ವರ್ಷ ಪೂರ್ತಿ ಎಲ್ಲೂ ಹೋಗಕೆ ಆಗೋಲ್ಲ...!!"ಸ್ವಲ್ಪ ನಿಜ ಇದ್ರೂ ಇರಬಹುದು...!! ಮೊನ್ನೆ ೪ ದಿನ ಲಾಂಗ್ ವೀಕೆಂಡ್ ಇದ್ರೂ ನಮಗೆ ಎಲ್ಲೂ ಹೋಗಲಾಗಲಿಲ್ಲ...!!ನೋಡೋಣ....ಉಳಿದ ದಿನಗಳು ಇನ್ನೂ ೩೩೬..!

ವಯನಾಡ್ ಪ್ರವಾಸ.....

2009-01-28T00:38:00.001-08:00

ಡಿಂಗ ಅವತ್ತು ತುಂಬ ಖುಷಿ ಆಗಿದ್ದ, ಮಾನಸ ಊರಿಗೆ ಹೋದ ಕಾರಣ ಅವನು ಫ್ರೀ...!!

ತುಂಬ ದಿನಗಳ ನಂತರ ಎಲ್ಲರೂ ಸೇರಿ ಪ್ರವಾಸ ಹೋಗುವುದೆಂದು ತೀರ್ಮಾನ ಮಾಡಿದ.

ಅದರಂತೆ ಡಿಸೆಂಬರ್ ೨೦ ರಂದು ಮುಂಜಾನೆ ೩.೩೦ ಕ್ಕೆ ಬೆಂಗಳೂರು ಬಿಟ್ಟು ಮೈಸೂರ್ ದಾರಿ ಹಿಡಿದೆವು.ಬೆಳಿಗ್ಗೆ ಬೆಳಿಗ್ಗೆ ಸಕತ್ ಛಳಿ, ಇಬ್ಬನಿ, ೫ ಜನ ಗೆಳೆಯರು, ೧ ಝೆನ್ ಕಾರು.....!!ಡಿಂಗ ಸ್ವಲ್ಪ ಮುನಿಸಿಕೊಂಡು ಬಿಟ್ಟಿದ್ದ...!! ಅವನ ಕೋಪ ಶಮನಕ್ಕೆ ತಣ್ಣಗಿನ "ಯುಬೀ ನೀರು" ಬೇಕಾಯ್ತು.

ಪ್ಲಾನ್ ಪ್ರಕಾರ ನಾವು ಬೆಳಿಗ್ಗೆ ೭ ಗಂಟೆಗೆ "ನಾಗರಹೊಳೆ" ಅಭಯಾರಣ್ಯವನ್ನ ಪ್ರವೇಶ ಮಾಡಿದೆವು. ಆನೆ, ಕಾಡು ಜಿಂಕೆ ಬಿಟ್ಟರೆ ಬೇರ್ಯಾವುದೇ ಕಾಡು ಪ್ರಾಣಿ ನಮಗೆ ಎದುರಾಗಲಿಲ್ಲ....ಮತ್ತೆ ಸ್ವಲ್ಪ ನಿರಾಶೆ ಎಲ್ಲರ ಮುಖದಲ್ಲಿ...ದೂದ್ ಪೇಡ ಸ್ವಲ್ಪ ಖುಷಿ ಯಲ್ಲಿದ್ದ.......! ಝೆನ್ ಕಾರು ೮೦ ಕಿ. ಮೀ. ಕ್ಕೂ ಜಾಸ್ತಿ ಸ್ಪೀಡ್ನಲ್ಲಿ ಹೋಗ್ತಾ ಯಿತ್ತು...!!! ಗಡಿಭಾಗದ "ಕುಟ್ಟ" ಪಟ್ಟಣ ತಲುಪಿದಾಗ ೮.೩೦ ಆಗಿತ್ತು. ಡಿಂಗ ಮೊದಲೇ "ನಾರಿಕಡಿ " ಹೋಂ ಷ್ಟೇ ಬುಕ್ ಮಾಡಿದ್ದ. ಸುಂದರ ಕಾಫಿ ಎಸ್ಟೇಟ್ ಮಧ್ಯದಲ್ಲಿ, ಕೊಡವ ಮನೆತನದವರು ಪ್ರೀತಿಯಿಂದ, ಆದರದಿಂದ ಕೂಡಿದ ಸತ್ಕಾರ ನಿಜಕ್ಕೂ ಗ್ರೇಟ್...!! ತುಂಬಾ ಯಿಷ್ಟ ಆಗುತ್ತೆ...!!ಉಪಾಹಾರ ನಿಮಿತ್ತ ಮಾಡಿದ್ದು ರೊಟ್ಟಿ, ಪಲ್ಯ, ಜಾಮ್, ತುಪ್ಪ, ಬ್ರೆಡ್ ಅಮ್ಲೆಟ್, ಎಗ್ಗ್ ಕರಿ, ಶಾವಿಗೆ ಉಪ್ಪಿಟ್ಟು. ..ಬಿಸ್ಸಿ ಬಿಸ್ಸಿ ಕಾಫಿ..!! ಬಾಳೆಹಣ್ಣು...!

ಅಲ್ಲಿಂದ ಸೀದಾ ಹೊರಟಿದ್ದು ತಿರುನೆಲ್ಲಿ ದೇವಸ್ಥಾನಕ್ಕೆ. ಪ್ರಕೃತಿಯ ಮಡಿಲಲ್ಲಿರುವ, ಹಸಿರು ಬೆಟ್ಟಗಳ ಮಧ್ಯೆ ಸಾಗಿ, ದೇವರ ದರ್ಶನ ಕಿಟಕಿಯಿಂದಲೇ ಮಾಡಿದೆವು...!! ದೇವಸ್ಥಾನದ ಪುನರುತ್ಥಾನ ಕೆಲಸ ಕಾರಣದಿಂದ ದರ್ಶನ ಭಾಗ್ಯ ಸಿಗಲಿಲ್ಲ.

"ಎಡಕಲ್ಲು ಗುಡ್ಡ" ತಲುಪಿದಾಗ ಮಧ್ಯಾನ್ಹ ೧೨.೩೦, ತುಂಬ ಬಿಸಿಲು ಇದ್ದ ಕಾರಣ ಯಾರು ಬೆಟ್ಟ ಹತ್ತುವ ಧೈರ್ಯ ಮಾಡಲಿಲ್ಲ.....!! ದೂದ್ ಪೇಡ ಸುಮ್ಮನಿದ್ದ......!!! ಬೆಟ್ಟ ಹತ್ತುವುದರಲ್ಲಿ ನಮ್ ಟೀಂ ನಲ್ಲಿ ಅವನದು ಎತ್ತಿದ ಕೈ.(ಕಾಲು)..

ಸ್ವಲ್ಪ ವಿಚಾರ ವಿಮರ್ಶೆ, ಘರ್ಷಣೆ ನಂತರ ಡಿಂಗ "ಸೂಚಿಪ್ಪರ" ಜಲಪಾತಕ್ಕೆ ಹೋಗಲು ಒಪ್ಪಿದ. ಅಲ್ಲಿಗೆ ಹೋಗಿಲ್ಲದಿದ್ದರೆ ನಾವು ನಿಜವಾದ ಕೇರಳ ಸೌಂದರ್ಯ ಮಿಸ್ ಮಾಡಿಕೊಳ್ತಾ ಯಿದ್ವಿ.... "ಹ್ಯಾರಿಸೋನ್ ಮಲಯಾಳಂ ಟೀ ಎಸ್ಟೇಟ್ " ಒಂದು ನಿಸರ್ಗ ರಮಣೀಯ ಪ್ರದೇಶ...ಎಲ್ಲೆಲ್ಲೂಹಸಿರು ಹಸಿರು ಬೆಟ್ಟಗಳು...!! ವಾಹ್....!! ಮಧ್ಯೆ ಜಲಪಾತ..!!! ಅಲ್ಲಿ ಡ್ರೈವ್ ಮಾಡುವುದೇ ಖುಷಿ..!!ಡಿಂಗ ಈಗ ಸ್ವಲ್ಪ ಸಮಾಧಾನದಲ್ಲಿದ್ದ..!!!ಸುಚಿಪ್ಪರ ಜಲಪಾತ ನೋಡಲು ಲೋಕಲ್ ಜೀಪ್ ಮಾಡಿಕೊಂಡು ಹೀಗೆ ಹೋಗಿ ಹಾಗೆ ನೋಡಿಕೊಂಡು ಬಂದ್ವಿ....!! ತೆಗದುಕೊಂಡ ಸಮಯ ಬರೋಬ್ಬರಿ ೨೦ ನಿಮಿಷಗಳು...!!!! ಕಾರಣ ಡಿಂಗನ ಅವಸರ...!! ಮುಂದಿನ ಕಾರ್ಯಕ್ರಮಕ್ಕೆ ಅಡಚಣೆ, ವಿಳಂಬ ಆಗಬಾರದೆಂಬ ಬಯಕೆ...!!! ಜಲಪಾತ ನಿಜಕ್ಕೂ ಸುಂದರವಾಗಿದ್ದು...ಜಲಕ್ರೀಡೆಗೆ ಸೂಕ್ತವಾದ, ಕುಟುಂಬ, ಗೆಳೆಯರು, ಒಮ್ಮೆ ನೋಡಲೇಬೇಕಾದ ಜಾಗ.ಸತತ ೨ ಗಂಟೆಗಳ ಡ್ರೈವ್ ಮಾಡಿ ಎಲ್ಲರನ್ನು home stay ವಾಪಾಸ್ ಕರೆತಂದಾಗ ೮.೩೦ ಆಗಿತ್ತು.
ಒಳ್ಳೆ ಊಟ, ಫೈರ್ ಕ್ಯಾಂಪ್...ಹಾಡು, ಕುಣಿತ... ಒಟ್ಟಾರೆ Rocking !!

ಮರುದಿನ ೨೧ ಡಿಸೆಂಬರ್ ಸಂಡೇ....ಇಬ್ಬನಿ ಹಿತವಾಗಿ ಯಿದ್ದರಿಂದ ಹೂವಿನ ಅಂದ ಹೆಚ್ಚ್ಚಿತ್ತು...!! ಪ್ರತಿ ಸಲದಂತೆ ಈ ಬಾರಿಯೂ ನನ್ನ ಫೋಟೋ ತೆಗೆಯುವ ಕೆಲಸ ಮುಂದುವರೆಸಿದೆ...!!.....ಈ ಸಲ ಫೋಟೋಕ್ಕೆ ಅರವಿಂದ ಮೆಚ್ಚುಗೆ ಹೇಳಿದ, ಮುಂದಿನ ಪ್ರವಾಸಗಳಲ್ಲಿ ಇನ್ನೂ ಹೆಚ್ಚಿನ ತೊಂದರೆ ಕೊಡುವ ನಿರ್ಣಯ ತೆಗೆದುಕೊಂಡೆ..!!

ಬನವಾಸಿ, ಅರವಿಂದ, ದೂದ್ ಎಲ್ಲ ತುಂಬ ಜೋಶ್ ನಲ್ಲಿ ಇದ್ರು...ಬೆಳಗ್ಗೆ ಬೆಳಗ್ಗೆ ಬ್ಯಾಡ್ಮಿಂಟನ್ ಆಟ ಶುರುಮಾಡಿ ಬಿಟ್ಟಿದ್ರು.. !! ಸತತ ೨ ತಾಸು ಆಡಿ, ಮೈಕೈ ಎಲ್ಲ ನೋವು ಮಾಡಿಕೊಂಡು....ತಿಂಡಿ ಸಮಯಕ್ಕೆ ಭರ್ಜರಿ ಬ್ಯಾಟಿಂಗ್ ಮಾಡ್ಬಿಟ್ರು...!!!

ಯಿರ್ಪು ಜಲಪಾತಕ್ಕೆ ಹೊರಟಾಗ ಕಾರ್ ನ ಟೈರ್ ಪಂಕ್ಚರ್ ಆಗಿತ್ತು. ೪ ಜನ ಧಾನ್ಡಿಗರನ್ನ ಹೊತ್ತು ಅದಕ್ಕೂ ಸಾಕಾಗಿರಬೇಕು...ಪಾಪ...!ಯಿರ್ಪು ಜಲಪಾತ ದಲ್ಲಿ ನೀರಿನ ಸೆಳೆತಕ್ಕೆ ಮೈ ಒಡ್ಡಿ ನಿಂತು, ನೀರಲ್ಲಿ ಆಟ ಆಡಿ, ಸಕತ್ ಮಜ ಬಂತು.ಅಲ್ಲಿಂದ ಹೊರಟು ಮಧ್ಯಾನ್ನ ದಾಭಾ ನಲ್ಲಿ ಊಟ ಮಾಡಿದ್ವಿ.
home stay ವಾಪಾಸ್ ಬಂದು ಬಟ್ಟೆ ಬರೆ ಎಲ್ಲ ಪ್ಯಾಕ್ ಮಾಡಿ, ಮಾಲೀಕರಿಗೆ ಒಂದು ಥ್ಯಾಂಕ್ಸ್ ಹೇಳಿ ಅಲ್ಲಿಂದ ಹೊರೆಟೆವು. ಅಂದದೂರು ಬೆಂಗಳೂರಿಗೆ ವಾಪಾಸ್ ಬಂದಾಗ ಸಂಜೆ ೮ ಗಂಟೆ.

ಒಟ್ಟು ಪ್ರಯಾಣ - ೫೮೫ ಕಿ. ಮೀ.

ವರ್ಷದ ಕೊನೆಯ ಪ್ರವಾಸ...೨೦೦೮

2009-01-27T19:57:00.000-08:00

ಈ ವರ್ಷದ ಕೊನೆಯ ಪ್ರವಾಸವನ್ನ ನಾನು ನಿರ್ಧರಿಸಿ ಆಗಿತ್ತು. ಅದರಂತೆ ಕ್ರಿಸ್ಮಸ್ ರಜೆಯ ವೇಳೆ ನಮ್ಮ ಊರಿಗೆ ಹೋಗುವುದು, ಅಲ್ಲಿಂದ ಸಾತೊಡ್ಡಿ ಜಲಪಾತ ವೀಕ್ಷಣೆ ಅಂಥ ಹೇಳಿದ್ದೆ. ಆದರೆ ದೂದ್ ಪೇಡ ಯಾಕೋ ಸಮಾಧಾನ ಆದಂಗೆ ಅನ್ನಿಸಲಿಲ್ಲ...ಅವನಿಗೆ ಪೂರ್ತಿ ೪ ದಿನ ರಜೆಯನ್ನು ಸುಮ್ಮನೆ ಕಳೆಯಲು ಇಷ್ಟವಿರಲಿಲ್ಲ. ಹಾಗಾಗಿ ೪ ದಿನದ ಪ್ರಯಾಣವನ್ನು ರೂಪರೇಷೆಯನ್ನು ಸಿದ್ಧಪಡಿಸಿ, ಹಣಕಾಸಿನ ವ್ಯವಸ್ಠೆ ಮಾಡಿ ಬಿಟ್ಟಿದ್ದ...!! ಜೈ ದೂದ್ ಪೇಡ...!!!

೨೪ ರಾತ್ರಿ ಸಾಗರಕ್ಕೆ ಹೋಗಲು ೪ ಟಿಕೆಟ್ ನ್ನು ಬನವಾಸಿ ಟ್ರೈನ್ ಗೆ ಬುಕ್ ಮಾಡಿ ಮೇಲ್ ಕಳಸಿದ. ಡಿಂಗನ ಮಡದಿಯ
ಅಪ್ಪಣೆ ಯಿಲ್ಲದ ಕಾರಣ ಡಿಂಗ ಈ ಪ್ರವಾಸಕ್ಕೆ ಚಕ್ಕರ್...!

೨೫ ಡಿಸೆಂಬರ್ ಗುರುವಾರ, ಬೆಳಿಗ್ಗೆ ೭.೩೦ ಕ್ಕೆ ಸಾಗರದ ನಮ್ಮ ಮನೆಯಲ್ಲಿ ತಿಂಡಿ ತಿಂದು, ಸ್ವಲ್ಪ ಸ್ನಾನ ಮಾಡಿದ್ವಿ. "ಸ್ವೀಟಿ" ಲಾಂಗ್ ಟ್ರಿಪ್ ಹೊರಡಲು ರೆಡಿಯಿದ್ದಳು....!! ( ನನ್ನ ಝೆನ್ ಕಾರ್ ಗೆ ಇಟ್ಟ ಹೆಸರು ಸ್ವೀಟಿ). ಅವಳಿಗೂ ಹೊಟ್ಟೆಗೆ ತುಂಬಿಸಿ (ಪೆಟ್ರೋಲ್) ಸಾಗರ ಬಿಟ್ಟಾಗ ೧೦.೨೦.

ಸಿರ್ಸಿ ತಲುಪಿದಾಗ ೧೨ ಗಂಟೆ. ಮೊದಲು "ಗಣಪತಿ ದೇವಸ್ಥಾನ" ಕ್ಕೆ ಹೋಗಿ ದರ್ಶನ ಮಾಡಿದೆವು. ಅಲ್ಲಿಂದ ಪ್ರಸಿದ್ಧ "ಮಾರಿಕಾಂಬ ದೇವಸ್ಥಾನ" ಕ್ಕೆ ಹೋದೆವು. ಅರವಿಂದ "ಕೋಣ" ನೋಡಿ ಹೆದರಿಬಿಟ್ಟ...!!ಮಧುವನ ಹೋಟೆಲ್ ನಲ್ಲಿ ಊಟ ಮಾಡಿ "ಸಹಸ್ರಲಿಂಗ" ಕ್ಕೆ ಹೋದ್ವಿ.

ಸಹಸ್ರಲಿಂಗ ಹೆಸರೇ ಹೇಳುವಂತೆ ನದಿಯ ಮಧ್ಯದಲ್ಲಿ ನೂರಾರು ಲಿಂಗ, ಬಸವನ ವಿಗ್ರಹಗಳು ಇವೆ. ಹಚ್ಚ ಹಸಿರಿನ ಕಾಡಿನ ಮಧ್ಯೆಯಿರುವ ನದಿಯಲ್ಲಿ ತುಂಬ ಸಮಯ ಆಟ ಆಡಿದೆವು. ಬನವಾಸಿ ವಿವಿಧ ಭಂಗಿ ಯಲ್ಲಿ ನಿಂತು ಫೋಟೋಕ್ಕೆ ಪೋಸು ಕೊಟ್ಟ.ಅಲ್ಲಿಂದ ಹೊರಟಿದ್ದು "ಗಣೇಶ್ ಫಾಲ್" ಗೆ. ಯಿನ್ನು ೨ ಕಿ. ಮೀ. ಯಿರುವಾಗ ನನ್ನ ಅಜಾಗರೂಕತೆ ಯಿಂದಾಗಿ ನಮ್ಮ ಕಾರು ಚರಂಡಿ ಗೆ ಬಿತ್ತು. ಅಕ್ಕ ಪಕ್ಕ ಯಿದ್ದವರನ್ನು ಸಹಾಯಕ್ಕೆ ಕರೆದು ಅಂತು ಕಾರನ್ನು ರಸ್ತೆ ಗೆ ಎತ್ತಿ ಇಟ್ತ್ವಿ. ಸಧ್ಯ ನಮಗೂ ಕಾರಿಗೂ ಏನೂ ಆಗಿರಲಿಲ್ಲ...!!!!ಮುಂದಿನ ಪ್ರಯಾಣವನ್ನು ಅಲ್ಲಿಗೆ ಮೊಟಕುಗೊಳಿಸಿ ಸೀದಾ "ಯಲ್ಲಾಪುರ" ಕ್ಕೆ ಹೊರಟೆವು. ಸಿಹಿಯಾದ ಸೌತೆಕಾಯಿ ತಿನ್ನುತ್ತಾ ಯಲ್ಲಾಪುರ ತಲುಪಿದಾಗ ಸಂಜೆ ೫.೩೦.ಅಲ್ಲಿ ಹೋಟೆಲ್ ನಲ್ಲಿ ರೂಮ್ ಬುಕ್ ಮಾಡಿ "ಕವಡಿ ಕೆರೆ" ಗೆ ಪ್ರಯಾಣ ಮಾಡಿದ್ವಿ. ಕವಡಿಕೆರೆ ಸುಮಾರು ೬೦ ಎಕರೆ ದೊಡ್ಡದಾದ ಕೆರೆ. ದಡದಲ್ಲಿ "ಕವಡಿಯಮ್ಮ" ದೇವಸ್ಥಾನ. ಸುಂದರ, ಶಾಂತವಾದ, ನಯನ ಮನೋಹರ ಮುಸ್ಸಂಜೆ, ವಾಪಸ್ಸು ಹೊರಡಲು ಮನಸ್ಸೇಯಿರಲಿಲ್ಲ... ಎಲ್ಲರಿಗೂ ತುಂಬ ಯಿಷ್ಟವಾದ ಜಾಗ....!!

೨೬ ಶುಕ್ರವಾರ ಬೆಳಿಗ್ಗೆ ಬೇಗನೆ ಎದ್ದು "ಜೇನುಕಲ್ಲು" ಗುಡ್ಡಕ್ಕೆ ಹೋದೆವು. ದೂದ್ ಪೇಡ ತುಂಬಾ ಜೋಶ್ ನಲ್ಲಿ ಯಿದ್ದ.....ಗುಡ್ಡ ಅವನ ಫೇವರಿಟ್..!!!ಕಾಳಿ ನದಿ ಕಣಿವೆ, ನಿತ್ಯಹರಿದ್ವರ್ಣದ ಕಾಡು, ಸುಂದರ ಸೂರ್ಯೋದಯ - ಜೇನುಕಲ್ಲು ಗುಡ್ಡದ ವಿಶೇಷ.

ಅಲ್ಲಿಂದ "ಮಾಗೋಡು ಜಲಪಾತ"ಕ್ಕೆ ಪಯಣ. ಜಲಪಾತದಲ್ಲಿ ನೀರು ಸ್ವಲ್ಪ ಕಡಿಮೆಯೇ ಯಿತ್ತು. ಮುಂಜಾನೆ ಹೋಗಿದ್ದರಿಂದ ಜನರು ಸಹ ಯಿರಲಿಲ್ಲ. ಪ್ರಕೃತಿ ಯಾ ನಿಜವಾದ ಸೌಂದರ್ಯ ಅಲ್ಲಿ ನೋಡಿ ವಾಪಾಸ್ ಯಲ್ಲಾಪುರಕ್ಕೆ ಬಂದೆವು.

"ಸಾತೊಡ್ಡಿ ಜಲಪಾತಕ್ಕೆ" ಹೋಗುವ ದಾರಿ ಸ್ವಲ್ಪ ಕಠಿಣ, ಕಚ್ಚಾ ರಸ್ತೆ, ಎಷ್ಟು ಹೋದರು ಜಲಪಾತದ ಸುಳಿವೇಯಿಲ್ಲ. ಯಾವ ವಾಹನದ ಸುಳಿವೂ ಯಿಲ್ಲ. ಇನ್ನೇನು ವಾಪಾಸ್ ಹೋಗುವುದು ಅಂಥ ನಾವು ಹೇಳಿದೆ. ಬನವಾಸಿ ಏನಾದ್ರು ಆಗ್ಲಿ ಮುಂದೆ ಹೋಗಿ ನೋಡಿಯೇ ಬಿಡೋಣ ಅಂಥ ಧೈರ್ಯ ತುಂಬಿದ. ಸ್ವಲ್ಪ ದೂರ ಹೋದಾಗ ಒಂದು ಹಿಂದೂ ಹುಡುಗರು ನೀರಲ್ಲಿ ಆಟ ಆಡ್ತಾ ಯಿರೋದು ಕಾಣಿಸ್ತು. ಸಧ್ಯ ಅವರ ಬಳಿ ಕೇಳೋಣ ಅಂಥ ಹೋದ್ರೆ, ಅವರಿಗೂ ಗೊತ್ತಿಲ್ಲ...ಅವರು ಕೂಡ ಬೇರೆಯವರು ಬರಲಿ ಅಂಥ ಕಾಯುತ್ತ ಯಿದ್ರು....!! "ಕಾಳಿ ನದಿ ಹಿನ್ನೀರು ಪ್ರದೇಶ" ನಿಜಕ್ಕೂ ಅದ್ಬುತ. ಅಲ್ಲಿ ಸ್ವಲ್ಪ ಹೊತ್ತು ತಣ್ಣನೆಯ ಗಾಳಿ ಸೇವಿಸ್ತ ಯಿದ್ವಿ, ದೂದ್ ಆಗಲೇ ಸ್ವಲ್ಪ ದೂರ ಹೋಗಿ ಆಗಿತ್ತು....ಅದು ಅವನ ಚಟ..!! ಒಂದು ಕಡೆ ಸುಮ್ಮನೆ ನಿಲ್ಲಲಿಕ್ಕೆ ಆಗೋಲ್ಲ ಅವನಿಗೆ..!!ಅಲ್ಲಿಂದ ಸಾತೊಡ್ಡಿ ಜಲಪಾತಕ್ಕೆ ಬಂದಾಗ ಗಂಟೆ ೧. ಅಬ್ಭಾ!!! ನಿಜಕ್ಕೂ ರಮಣೀಯ ಜಲಪಾತ. ಕರ್ನಾಟಕದ ನಯಾಗರ ಅಂತಲೂ ಹೇಳಬಹುದು. ಹುಡುಗರು ತುಂಬ ಖುಷಿ ಆದರು.. ಸೀದಾ ಜಲಪಾತದ ಬುಡದ ತನಕ ಹೋದ್ವಿ...ನೀರಿನ ರಭಸಕ್ಕೆ ಬೆನ್ನು ಕೊಟ್ಟು ನಿಂತು ಸ್ನಾನ ಮಾಡುವುದು ಅತ್ಯಂತ ಯಿಷ್ಟ ಅರವಿಂದ ನಿಗೆ. ಈ ಸಲ ದೂದ್ ಅರವಿಂದ ನ್ನು ಕರೆದುಕೊಂಡು ಜಲಪಾತದ ಒಂದು ಸುತ್ತು ಹಾಕಿದ....!! ಸಧ್ಯ "ಇಷ್ಟೇನಾ.....?" ಅಂಥ ದೂದ್ ಹೇಳಲಿಲ್ಲ....!! ಅಲ್ಲಿಗೆ ಹೋಗಿದ್ದು ಸಾರ್ಥಕ...!!ಅಲ್ಲಿಂದ ವಾಪಾಸ್ ಬರಲು ನನಗೂ ಇಷ್ಟ ಯಿರಲಿಲ್ಲ...ಅಷ್ಟು ಸುಂದರ ಜಲಪಾತ..!!

ಅಲ್ಲಿಂದ "ಅರಬೈಲ್" ಘಾಟಿ ಮುಖಾಂತರ "ಗೋಕರ್ಣ" ಕ್ಕೆ ಹೋದಾಗ ಸಂಜೆ ೭ ಗಂಟೆ ಆಗಿತ್ತು. ಬೀಚ್ ಪಕ್ಕ ಗುಡಿಸಲಿನಲ್ಲಿ ರಾತ್ರಿ ಕಳೆಯುವ ಬಗ್ಗೆ ಬನವಾಸಿ ಆಲೋಚನೆ ಮಾಡಿದ..ಓಂ ಬೀಚ್ ಒಂದು ರೌಂಡು ಹಾಕಿ ಬಂದ್ರು ಒಂದೇ ಒಂದು ಗುಡಿಸಲು ಸಿಗಲಿಲ್ಲ. ಲಾಡ್ಜ್ ಮಾಡಿ ರಾತ್ರಿ ಕಳೆಯುವ ನಿರ್ಧಾರ ಮಾಡಿದೆವು. ಗೋಕರ್ಣದಲ್ಲಿ ಯಾವುದೇ ಲಾಡ್ಜ್ ಸಿಗದೇ ಪರದಾಡಿ ಸುಸ್ತಾದಾಗ ಬನವಾಸಿ ಯಾ ಗೆಳೆಯನ ಗೆಳೆಯ ಆಪಧ್ಬಂದವನಂತೆ ಬಂದು ಸಹಾಯ ಮಾಡಿ ಒಂದು ಲಾಡ್ಜ್ ಕೊಡಿಸಿದ. ಅಲ್ಲಿ ಹೊದೆಯಲು ಏನೂ ಕೊಡಲಿಲ್ಲ....ನಾನು ಅರವಿಂದ ನ ಪಂಚೆಯನ್ನೇ ಹೊದ್ದು ಮಲಗಿದೆ...ಪಾಪ ದೂದ್ ಗೆ ನಿದ್ದೆ ಬರಲಿಲ್ಲ...!!!

೨೭ ಶನಿವಾರ ಬೆಳಿಗ್ಗೆ ತಣ್ಣೀರು ಸ್ನಾನ ಮಾಡಿ " ಮಹಾಭಲೇಶ್ವರ ದೇವಸ್ಥಾನ" "ಆತ್ಮಲಿಂಗ" ದರ್ಶನ ಮಾಡಿದೆವು. ಹಾಗೆ ಒಂದು ರೌಂಡು ರಥ ಬೀದಿ, ಬೀಚ್, ಪುಣ್ಯಕೋಟಿ ಪುಷ್ಕರಣಿ ಸುತ್ತಾಡಿ ಓಂ ಬೀಚ್ ಗೆ ಹೊರಟೆವು.

ಓಂ ಬೀಚ್ ನಲ್ಲಿ ಸನ್ ಬಾತ್ ಮಾಡಿ, ಸ್ವಲ್ಪ ಹೊತ್ತು ಸಮುದ್ರ ಸ್ನಾನ ಮಾಡಿದ್ವಿ. ದೂದ್ ಸಮುದ್ರಕ್ಕೆ ಯಿಳಿಯಲಿಲ್ಲ.....ಉದ್ದಕ್ಕೆ ರೌಂಡು ಹೋಗಿ ಹಿಪ್ಪಿಗಳ ದರ್ಶನ ಭಾಗ್ಯ ಪಡೆದ....!!! ಉರಿ ಬಿಸಿಲಿನಲ್ಲೂ ತಂಪು ಕನ್ನಡಕ ಹಾಕಿಕೊಂಡು ಹಿಪ್ಪಿಗಳನ್ನು ನೋಡಿ ಮತ್ತಷ್ಟು ತಣ್ಣಗಾದ...!!ಮಧ್ಯಾನ್ನ ಅಲ್ಲಿಂದ ಹೊರಟು "ಇಡಗುಂಜಿ" ಗೆ ಬಂದು "ಮಹಾಗಣಪತಿ" ದೇವರ ದರ್ಶನ, ಅರ್ಚನೆ ಮಾಡಿಸಿ ಸ್ವಲ್ಪ ಶಾಪಿಂಗ್ ಮಾಡಿದ್ವಿ.

ಸಂಜೆ ಸೂರ್ಯಾಸ್ತ ನೋಡಲು "ಮುರುಡೇಶ್ವರ" ಕ್ಕೆ ಹೋಗಿ ಸಿಕ್ಕಾಪಟ್ಟೆ ಟ್ರಾಫಿಕ್ ಜಾಮ್ ನಲ್ಲಿ ಸಿಕ್ಕೊಂಡು ಸ್ವಲ್ಪ ಬೇಜಾರು ಆಯ್ತು. ಆದ್ರೆ ಅಲ್ಲಿನ ಮೋಹಕ ಸಮುದ್ರ, ಎತ್ತರದ ಗೋಪುರ, ಶಿವನ ವಿಗ್ರಹ ಎಲ್ಲವೂ ಮನಸೂರೆಗೊಂಡವು. ಅಲ್ಲಿವರೆಗಿನ ಆಯಾಸ ದಣಿವು ಎಲ್ಲ ಮಾಯಾ...!! ಗೋಪುರ, ವಿಗ್ರಹ ದ ಕೆತ್ತನೆ ಎಲ್ಲದಕ್ಕೂ ಹ್ಯಾಟ್ಸ್ ಆಪ್...!! ಸಂಜೆ ಅಲ್ಲೇ ಊಟ ಮಾಡಿ ಸ್ವೀಟಿ ಗು ಸ್ವಲ್ಪ ಹೊಟ್ಟೆಗೆ ಹಾಕಿಸಿ ಅಲ್ಲಿಂದ ಗೇರುಸೊಪ್ಪ ಮಾರ್ಗವಾಗಿ ಸಾಗರ ತಲುಪಿದಾಗ ರಾತ್ರಿ ೧೧ ಗಂಟೆ....!!

ಒಂದು ನೆನಪಿನಲ್ಲಿ ಉಳಿಯುವಂಥ ಪ್ರವಾಸ....ಸಕತ್ ಮಜ ಬಂತು...ದೂದ್ ಖುಷಿ ಆದ...!!

ಒಟ್ಟು ಪ್ರಯಾಣ - ೫೬೦ ಕಿ. ಮೀ.

Arragatrum into blog world.

2008-12-10T03:39:00.000-08:00

Hi...

Today i am stepping my foot into the world of bloggers.

From the day i started thinking i trust in human relationship and love. I am Njoying my life as it comes...lots lots of happenings...feelings...surprises..Etc.

I love travel, reading and interested in cars.

Waiting for next happening in life....DILSE..!!